Ha Tautolu a Fekafekauaga—Ko e Gahua Fakaalofa Hofihofi Noa
1 Ne mailoga e Iesu ko e moto tagata ne fanogonogo ke he fekau haana “ne fakafita a lautolu, mo e tiaki atu ai, tuga e tau mamoe nakai fai leveki.” (Mata. 9:36) He momokoina mo e fakaalofa, ne fakaako e ia a lautolu ke he tau puhala a Iehova, fakamafana ki ai, mo e lagomatai fakaalofa hofihofi noa ke he tau manako fakaagaaga ha lautolu. He manamanatu fakahokulo ke he tau puhala haana, ne ako e tautolu ke manamanatu mo e logona hifo e mena ne taute e Iesu, ti ko e aga fakaalofa hofihofi noa nei ne kitia ai ke he fekafekauaga ha tautolu.
2 Manamanatu la ke he puhala ne tali atu a Iesu he magaaho ne o atu e tau tagata ne manako lagomatai lahi ki a ia. (Luka 5:12, 13; 8:43-48) Kua manamanatu a ia ki a lautolu he tau tuaga pauaki ia. (Mare. 7:31-35) Ne mataala a ia ke he tau logonaaga he falu ti tupetupe ai. Ne ono muatua a ia ke he tau loto. (Luka 7:36-40) Mooli, ne fakakite katoatoa e Iesu e fakaalofa hofihofi noa lahi he Atua ha tautolu.
3 “Hohofi Hana Fakaalofa”: Ne nakai taute e Iesu e fekafekauaga haana ko e matagahua noa. Kua “hohofi hana fakaalofa” ke he tau tagata. (Mare. 6:34) Pihia foki he vahā nei, ne nakai uta noa ni e tautolu e fekau ka e lali ke fakahao e tau momoui uho lahi. Lali ke maama e kakano he tau tali he tau tagata. Ko e ha ne fakaatukehe po ke lavelave a lautolu? Kua tiaki mo e fakapouli kia he tau leveki he lotu fakavai a lautolu? Ko e fiafia mooli ha tautolu ke he falu kua maeke ke fakalagalaga a lautolu ke fanogonogo ke he tala mitaki.—2 Kori. 6:4, 6.
4 Kua hokotia e fakaalofa hofihofi noa ke he tau loto. Ke fakatai: Ne mamahi lahi e taha fifine he mate haana tama fifine tolu e mahina he moui. He aahi atu e Tau Fakamoli ke he gutuhala haana, ne uiina e ia ki fale mo e amanaki ke totoko e manatu ha laua ke he kakano ne fakaatā he Atua e matematekelea. Ka e, ne talahau he fifine he mogo fakamui: “Ne fanogonogo a laua ki a au mo e fakaalofa hofihofi noa, ti ko e mogo ne o a laua, ne mitaki e logonaaga haaku ati talia e au ke liliu mai foki a laua.” Lali lahi nakai a koe ke fakakite e fakaalofa hofihofi noa ke he tau tagata oti ne feleveia mo koe he fekafekauaga?
5 He feaki e fakaalofa hofihofi noa ka lagomatai a tautolu ke tamai e mafanatia mooli ke he falu. He taute pihia, kua fakaheke e tautolu e “Matua hana e fakaalofa hofihofi,” ko Iehova.—2 Kori. 1:3.