“Kia Mahani Foki a Mutolu ke Fakaaue”
1 He magaaho ne fakamaulu e Iesu e tau lepela tokohogofulu, taha ni ia lautolu ne liu atu ke fakaaue ki a ia. Ne hūhū a Iesu: “Ka e nakai kia ko e mena fakamea e tokohogofulu? ti ko e fe kia e tokohiva?” (Luka 17:11-19) Ko e aoga ha ia ma tautolu ke loto fakaaue mo e ke fakakite a tautolu kua fakaaue ke he tau mena fakaalofa mitaki oti mo e tau mena fakaalofa oti kua katoatoa ai e mitaki ne foaki mai he ha tautolu a Matua he lagi, ko Iehova ko e Atua ne mahani fakamokoi mo e fakaalofa!—Kolo. 3:15; Iako. 1:17.
2 Ko e heigoa falu mena kua lata ke fakaaue a tautolu ki ai? Kua fakaaue a tautolu ke he lukutoto, ko e mena fakaalofa mua ue atu he Atua ke he tau tagata. (Ioane 3:16) Kua fakaaue foki a tautolu ki a Iehova he futia atu a tautolu ki a ia. (Ioane 6:44) Ko e taha kakano foki ma e fakaaue ko e kau fakalatahaaga faka-Kerisiano ha tautolu. (Sala. 133:1-3) Nakai fakauaua kua loga atu e mena fakaalofa mai ia Iehova ka manamanatu a koe ki ai. Nakai manako a tautolu ke eke tuga e tau Isaraela nakai loto fakaaue ne nimo e tau gahua a Iehova ne eke ma lautolu!—Sala. 106:12, 13.
3 Fakatātā e Fakaaue: Liga loto fakaaue oti e tau lepela tokohogofulu ke he mena ne taute e Iesu ma lautolu, ka e tokotaha ni ne fakakite e fakaaue haana. (Luka 17:15) Pihia foki, kua fakatātā e tautolu e loto fakaaue he gahua fakamakai ke he fekafekauaga. Ka loto fakaaue mooli a tautolu ke he tau mena oti nukua taute he ha tautolu a Matua he lagi, to fakalagalaga e tau loto ha tautolu ke fakaata e fakaalofa mo e mahani fakamokoi haana he tutala ke he falu hagaao ki a ia. (Luka 6:45) Ko e fua, he tutala a tautolu ke he falu hagaao ke he ‘tau gahua a Iehova mo e hana a tau manatu ki a tautolu,’ to tupu e fakaalofa mo e loto fakaaue ha tautolu ki a Iehova.—Sala. 40:5.
4 Fakaohooho e Loto Fakaaue he Falu: Kua lata ia tautolu ke mataala ke lagomatai e tau tama ha tautolu mo e tau tagata fakaako Tohi Tapu ke feaki e loto fakaaue. Loga e magaaho ke taute he tau mamatua e mena nei, tuga ka kitekite auloa mo e fanau ha lautolu e tufugatia a Iehova. (Roma 1:20) Ka taute e fakaakoaga Tohi Tapu, kua liga hūhū a tautolu ke he tagata fakaako ha tautolu, “Ko e heigoa ne talahau he mena nei ki a taua hagaao ke he peresona ko Iehova?” He tupu e loto fakaaue he tagata fakaako, to pihia foki e fakaalofa haana ma e Atua mo e fifiliaga haana ke fakafiafia a ia.
5 He tau vahā fakamui nei, tokologa e tagata ne nakai loto fakaaue. (2 Timo. 3:1, 2) Ko e fiafia ha ia ki a Iehova ke kitia e tau fekafekau fakamooli haana ne fakatātā e loto fakaaue he gahua fakamakai a lautolu ke he fekafekauaga!—Iako. 1:22-25.