Maeke ia Koe ke Maukoloa!
1. Ko e ha ne manamanatu ai ke he paionia tumau?
1 Kua lali nakai a koe ke olioli mo e fai kakano lahi e moui haau? Moua nakai e koe e fiafia mo e makona he lagomatai falu? Manako nakai a koe ke fakalahi e fekafekauaga haau ki a Iehova? Kaeke ko e tali haau ko e ē ke he taha he tau hūhū nei, kua liga lata mogoia a koe ke manamanatu ke he paionia tumau. Mooli, ko e magafaoa mo e falu kotofaaga faka-Tohi Tapu, pihia mo e malolō tino mo e tau fakakaupāaga fakatino, kua lata ke manamanatu ki ai.
2. Talahau falu monuina fakaagaaga ne moua he tau paionia tumau.
2 Ne tuku fakalataha e Solomona he tau tohi ne omoomoi faka-Atua e monuina ha Iehova mo e maukoloa. (Fakatai 10:22) He vahā nei, ko e tau monuina ha Iehova kua fakavē ni ke he maukoloa fakaagaaga. Kua loga lahi e tau monuina pihia ma e tau paionia tumau. Ma e fakatai, kua iloa e lautolu e fiafia lahi he foaki atu ke he falu he “fakatau e tau magaaho” mai he tau tutuliaga fakatagata. (Kolo. 4:5, NW; Gahua 20:35) Ko e tau gahua fakaalofa ha lautolu kua mailoga mo e loto fakaaue a Iehova ki ai. Ko e ‘tau koloa pihia he lagi’ to tumau tukulagi e aoga. (Mata. 6:20; Hepe. 6:10) Lafi ki ai, kua tumau e tau paionia ke ‘fakamukamuka e tau mata’ mo e falanaki ki a Iehova ke foaki mai e tau mena kua lata, ne tupu malolō lahi e fakafetuiaga ha lautolu mo ia.—Mata. 6:22, 25, 32; Hepe. 13:5, 6.
3. Ko e heigoa e kehekehe he tutuli e maukoloa fakaagaaga mo e tutuli he maukoloa fakatino?
3 Ko e tutuli ke maukoloa ke he tino kua fa takitaki atu ke he “tau manako lahi ne loga kua goagoa ai mo e kelea.” (1 Timo. 6:9, 10; Iako. 5:1-3) Ne nakai fa pihia e tau monuina ha Iehova. He lahi e magaaho ha lautolu ne fakaaoga ke he fekafekauaga kua lagomatai e tau paionia tumau ke mauokafua e lagotatai fakaagaaga mo e onoonoaga mahino ke he tau mena kua mua e aoga. (Filipi 1:10) Taha e matakainaga taane ne fakaoti e feua haana ko e enesinia, ne lahi e magaaho ne fakamole ki ai, ke maeke ke paionia. Ne pehē a ia: “Ne fakaokaoka lahi e gahua tupe haaku. Nakai pihia e paionia. Kua maeke au mogonei ke lagomatai e tau tagata mo e fakaako ki a lautolu e kupu mooli. Kua mua atu e fai kakano mo e fiafia e gahua nei.”
4. Kua fakamonuina fēfē e tau paionia tumau he ta atu e tau monuina ke he falu?
4 Tau Monuina ke he Falu: He vahā nei, kua fehagai e tau tagata oti mo e “tau aho uka.” (2 Timo. 3:1) Kua latatonu e tau tagata he tau matakavi oti ke moua e amaamanakiaga. Kua olioli e tau tagata fakapuloa he Kautu ka kitia kua maeke e tau fofoga fakaagitau he tau tagata ke hiki he fai amaamanakiaga ha kua talia e lautolu e tala mitaki. Kua lahi mooli e olioli ia ma e tau paionia tumau he foaki molea e 800 tulā he tau tau takitaha ke he gahua fakamoui nei!—1 Timo. 4:16.
5, 6. Ko e heigoa ka liga lagomatai a koe ke eke mo paionia tumau?
5 Kua manamanatu fakahokulo nakai a koe ke fekafekau ko e paionia tumau? Liga lata ke “fakatau e tau magaaho” mai he tau tutuliaga ne aoga tote. (Efeso 5:15, 16, NW) Tokologa ne taute pihia mo e fakamukamuka e tau momoui ha lautolu, ti maeke ke mumutu hifo e magaaho gahua tupe ha lautolu ke maeke ke fakaaoga fakalahi e magaaho ke he tau mena he Kautu. Maeke nakai ia koe ke fakatokatoka e tau matagahua haau ke fakalataha mo lautolu?
6 Ole ma e pulotu a Iehova ke fakatoka taha setulu aoga. (Iako. 1:5) Ko e heigoa e tau monuina kua amanaki a koe ke moua? Ko e maukoloa fakaagaaga kua lahi mahaki! To fakamonuina foki e Iehova a koe ke he tau koloa fakatino ne lata ki ai. (Mata. 6:33) Ko lautolu ne kamatamata a Iehova ke he puhala nei to moua “e monuina . . . lahi ue atu.”—Mala. 3:10.