“Tau Mena Kai ke he Tau Magaaho Tonu”
1. Lagomatai fēfē he aho toloaga pauaki ne mole laia a koe mo e falu?
1 Mole e fina atu ke he ha tautolu a aho toloaga pauaki, fa pehē a tautolu, “Latatonu mooli e mena ia mo tautolu!” Talahau he taha leveki takaiaga he nakaila leva e mole e logona he fakaholoaga, ne talahau he falu he takaiaga haana e manako ke fakalahi e gahua ha lautolu he fonua. Taha e leveki faifano ne pehē: “Ne lagomatai a mautolu ke manamanatu fakahokulo ke he magahala kua haia a mautolu i ai mogonei he liu a mautolu kitekite ke he tau fifiliaga ha mautolu he moui.” Taha foki ne pehē, “Tokologa e tagata fakailoa ne talahau ko e liu fafagu anei ki a lautolu ke mailoga mooli kua hagaaki a lautolu ke he mena kua mua atu e aoga, ko e gahua he fonua.” Lagomatai fēfē he aho toloaga pauaki a koe?
2. Ko e heigoa ka fakatutala ke he fakaholoaga he tau he fekafekauaga ka hau?
2 Ko e fakaholoaga ma e tau he fekafekauaga hane hau to latatonu mooli foki mo tautolu. Ko e matakupu ‘Malu kia Iehova’ ne moua mai he Salamo 118:8, 9. Hanei falu matakupu ka fakatutala ki ai: “Puhala ne Taue a Iehova he Tau Magaaho Matematekelea,” “Lagomatai e Falu ke Malu i Lalo he Tau Tapakau a Iehova,” “Fifitaki a Iehova he Foaki e Maluaga,” “Tau Fuata Ikiiki, Eke a Iehova mo Mauokafua ha Mutolu!” mo e “Ha Tautolu a Parataiso Fakaagaaga—Ko e Foakiaga a Iehova ma e Maluaga.”
3. Maeke fēfē a tautolu ke aoga katoa mai he haia i ai?
3 Ke Aoga Mai Ai: Ka fakailoa e aho, kia taute e tau fakatokaaga kua mau ke hoko atu, ti uiina e tau tagata fakaako Tohi Tapu haau ke ō mo koe. Ke maeke ia tautolu ke “fua mai e tau fua ke he fakauka,” kua lata ia tautolu ke taofi mau ke he mena kua logona e tautolu. (Luka 8:15) Ti fanogonogo fakamitaki ke he fakaholoaga, mo e fakamau hifo fakakū e tau matapatu manatu pihia foki mo e fakaakoaga kua fakatoka e koe ke fakagahua he haau a moui mo e gahua he fonua. Fakatoka e magaaho ka oti e toloaga ke tutala mo e magafaoa ke he fakaholoaga, ti manamanatu ke he tau puhala pauaki ka fakaaoga e koe mo e magafaoa haau e vala tala.
4. Ko e ha kua lata ia tautolu ke onoono lahi atu ke he aho toloaga pauaki ha tautolu hane hau?
4 Tuga e mena kai lolo mo e huhua mitaki, ko e aho toloaga pauaki he tau nei kua lahi e fakaalofa mo e manamanatu tuai ke he puhala ne tauteute aki. Kia fakamonuina e Iehova e tau laliaga haau ke hoko atu mo e ke aoga mai he tau mena kai ke he tau magaaho tonu nei, ke fagai fakaagaaga e tau fekafekau Kerisiano.—Mata. 24:45.