“Aua Neke Matakutaku”
1. Ko e heigoa e tau paleko ne fehagai mo tautolu kua fehagai mo Ieremia?
1 Ne logona e Ieremia e maimainā he magaaho ne moua e ia e kotofaaga ko e perofeta. Ka e fakamafana e Iehova a ia, “aua neke matakutaku,” ti totonu a ia he fakamalolō a Ieremia ke taute e kotofaaga haana. (Iere. 1:6-10) He vahā ha tautolu, ko e mahani mā po ke temotemoai e mauokafua ka lauia e fakalataha ha tautolu ke he gahua he fonua. Ko e matakutaku ke he puhala ka tali po ke onoonoaga he tau tagata ki a tautolu ka fakamataofi a tautolu he falu magaaho. Maeke fēfē a tautolu ke fahia mai he tau matakutaku pihia, ti ko e heigoa e tau monuina fakatagata ka moua?
2. To lagomatai fēfē he tauteute a tautolu ke fakatotoka e tau matakutaku ha tautolu he gahua he fonua?
2 Tauteute tuai: Ko e mautauteute mitaki ka lagomatai ke fakatotoka hifo e tau matakutaku ha tautolu. Tuga anei, ka kumikumi tuai e tautolu e puhala ke fehagai mo e tau tagata ka taofi fakatutalaaga, to mautauteute a tautolu ke tali e tau totokoaga fa mahani. (Fakatai 15:28) He ha he fakaaoga e tau magaaho fakamahani he Tapuakiaga he Magafaoa ke tauteute ma e tau paleko kehekehe he aoga mo e gahua he fonua?—1 Pete. 3:15.
3. Lagomatai fēfē he falanaki ki a Iehova a tautolu ke kautū mai he matakutaku?
3 Falanaki ki a Iehova: Ko e tuluiaga mooli ma e matakutaku ko e falanaki ke he ha tautolu a Atua. Ne mavehe e Iehova to lagomatai e ia a tautolu. (Isaia 41:10-13) Fai haohao mitaki lahi foki kia ka moua e tautolu? Lafi ki ai, ne fakamafana e Iesu a tautolu pete ne tau tuaga nakai amanaki ki ai, to fakamalolō he agaaga tapu he Atua a tautolu ke talahau atu ke he puhala mitaki. (Mare. 13:11) Ko e mena ia, olelalo tumau ki a Iehova ma e agaaga tapu haana.—Luka 11:13.
4. Ko e heigoa e tau monuina kua fua mai he fakamanavalahi ke he gahua he fonua pete ne tau paleko?
4 Tau monuina: He fakamanavalahi a tautolu ke gahua he fonua pete ne tau paleko, kua fakamalolō a tautolu ke kautū ka fehagai mo e tau kamatamata mai mua. Kua feaki e tautolu e loto toa mo e fakamalolo—ko e tau aga ha lautolu kua puke ke he agaaga tapu. (Gahua 4:31) Lafi ki ai, he kautū a tautolu mai he tau matakutaku fakatagata ha ko e lagomatai e Iehova, kua fakamalolō e tua mo e falanaki ha tautolu ke he lima fakahao haana. (Isaia 33:2) Kua moua foki e tautolu e olioli mo e makona he iloa kua fakafiafia e tautolu ha tautolu a Matua he lagi. (1 Pete. 4:13, 14) Kia nakai matakutaku mogoia a tautolu ke fakailoa fakamalolo e fekau he Kautu, he mauokafua tumau to lagomatai e Iehova!