Puha Hūhū
◼ Ko e heigoa e tau puhala aoga ke lagomatai e tautolu e tau paionia?
He lalolagi katoa he tau he fekafekauaga 2009, teitei 800,000 he tau matakainaga ne fekafekau ko e tau paionia tumau mo e tau paionia pauaki. Kua foaki he tau fekafekau mau nei e tau fua uluaki he ha lautolu a tau magaaho, malolō, mo e tau koloa fakatino ke maeke ke folafola e tala mitaki he Kautu. (Fakatai 3:9) Fiafia lahi mooli a Iehova ke he tau laliaga oti ha lautolu! He tau puhala fe ka fakaata e tautolu e onoonoaga a Iehova mo e lafi ke he olioli mo e fakauka ha lautolu ke he matagahua nai?
Ko e tau kupu fifili mitaki mooli ha tautolu ka fakamalolō a lautolu ke matutaki ke fekafekau ko e tau paionia. (Fakatai 25:11) Maeke nakai ia tautolu ke hikihiki ha tautolu a fakaholoaga he faahi tapu ke maeke ke gahua mo lautolu he fonua? Ka gahua auloa, liga maeke ia tautolu ke tala age ke fakaaoga e motokā ha tautolu ka e toka ha lautolu. Ka heke a tautolu he motokā ha lautolu, maeke ia tautolu ke foaki e tupe ke lagomatai ke totogi e levekiaga he tau motokā ha lautolu. (1 Kori. 13:5; Filipi 2:4) Fakatātā foki e tautolu e lalagoaga fakaalofa he fakakite e fakamokoi mo e uiina e tau paionia falu magaaho ke he tau kaina ha tautolu ke kai.—1 Pete. 4:8, 9.
Kua fakamooli he tau Tohiaga Tapu to foaki e Iehova e tau levekiaga tino ma lautolu hane tuku fakamua haana a Kautu. (Sala. 37:25; Mata. 6:33) Taha puhala kua taute e ia e mena nei ko e mai he tau matakainaga Kerisiano fakaalofa ha tautolu. (1 Ioa. 3:16-18) Mooli, kua nakai amanaki e tau paionia ke leveki he falu e tau totogiaga fakatupe ha lautolu. Ti nakai mafiti a lautolu ke fakailoa ke he falu ka manako lagomatai a lautolu. Pete ia, maeke ia tautolu ke lagomatai e tau paionia fakamooli ke he ‘ha lautolu a nonofogati’ he tau puhala lagomatai he mataala mo e matakite ki ai.—2 Kori. 8:14, 15.
He magaaho ne fenoga a Fipe, ko e fekafekau he fakapotopotoaga i Kenekerea he senetenari fakamua, ne fakamafana e Paulo e tau matakainaga i Roma: “Kia talia e mutolu a ia ke he Iki, tuga ne mena kua lata ke he tau tagata fakatapu, kia lagomatai foki a mutolu kia ia ke he mena ha mutolu kua manako ki ai a ia.” (Roma 16:1, 2) Kua ha ha ia tautolu e magaaho ke fakakite e lalagoaga fakaalofa pihia ki a lautolu he fakapotopotoaga ha tautolu hane fakapuloa nakai oki foki e tala mitaki he eke mo e tau paionia tumau mo e tau paionia pauaki.—Gahua 5:42.