Kia Fakaeneene he Gahua he Fonua
1. Ko e ha kua lata ke fakaeneene he gahua he fonua?
1 “Tuga e tau mamoe ke he vaha loto he tau luko,” ko e tau fekafekau he Atua kua fakamatala ke he “hau fakakeukeu mo e faliuliu.” (Mata. 10:16; Filipi 2:15) Ko e tau hokotaki matakutakuina he tau taufetului he tau tagata, latau fakamatakau, mo e tau uta pulenoa favale aga mau, ko e tau fakamooliaga kua tolomaki atu “ke au atu he kelea.” (2 Timo. 3:13) He fakagahua e tau matapatu fakaakoaga Tohi Tapu fe ka lagomatai a tautolu ‘kia loto matala a tautolu’ he gahua he fonua?—Mata. 10:16.
2. Ko e heigoa e tau tuaga kua liga ke fakatonu ke toka e fonua mo e fakamatala he taha matakavi foki?
2 Fakalotomatala: Peehi he Tau Fakatai 22:3 e pulotu he ‘fakamumuli ai a tautolu’ mai he kelea. Kia nonofo mataala! Ko e tau tuaga he tuutakaina haohao mitaki ka amanaki ti hiki fakaofo. Maeke ia koe ke kitia e holo ki mua he gahua he leoleo po ke toloaga ne taute he puhalatū. Falu mogo kua talahau he tagata totonu he kaina e hatakiaga. He nakai heleaki he manamanatu teao, kua fakalotomatala ke ō kehe fakamafiti mo e matutaki ke he taha matakavi foki.—Fakatai 17:14; Ioane 8:59; 1 Tesa. 4:11.
3. Fakagahua fēfē e matapatu fakaakoaga ia Fakamatalaaga 4:9 ke he gahua he fonua ha tautolu?
3 Gahua Auloa: “Mua he mitaki e tokoua ke he tokotaha,” he ui he Fakamatalaaga 4:9. Liga kua mahani a koe he gahua tokotaha mo e nakai haofia he gahua he fonua, ka e haohao mitaki nakai mogonei ke taute pihia? Mitaki he falu matakavi. Ka e he falu, kua nakai haohao mitaki ma e matakainaga fifine po ke tama fuata ke gahua tokotaha he taha gutuhala ke he taha gutuhala, mua atu ka tō e laā. Ko e tau mena tutupu kua fakamooli kua aoga lahi e hoa mataala. (Fakama. 4:10, 12) Kia mataala tumau ke he falu tagata foki he matakau haau. Kia fakamahani a koe ke fakailoa ke he falu kua toka e koe e fonua.
4. Maeke fēfē a tautolu ke gahua ke puipui e tau tagata oti he fakapotopotoaga?
4 Ko e tau motua ne ‘leoleo ke he tau agaga ha tautolu,’ kua fakalago ki a lautolu ke foaki e takitakiaga aoga hagaao ke he tau tuaga he matakavi. (Hepe. 13:17) Ko e fakamonuinaaga a Iehova kua mauokafua he fakakite e tautolu e mahani fakalatalata faka-Kerisiano mo e kaufakalataha katoatoa mo lautolu. (Mika 6:8; 1 Kori. 10:12) Kia lafi e tautolu oti ko e tau fekafekau he Atua ke he foakiaga he fakamatala lauia mitaki ke he fonua ha tautolu, ka e mataala tumau ai.