Tau Mena Tutupu
◼ Ausetalia: Ko John ko e tagata pulotu, fano tapu a ia he vahā tote ti “ko e tagata malolō lahi he talitonu ko e mena nakai fai Atua.” Ne age he paionia e porosua Was Life Created? ti liu atu ai mo e age foki e porosua Origin of Life. Ne matutaki e paionia ke feaki e fiafia ha John he foaki e tau mekasini foou mo e fakakite age ha vala tala ke he tufugatia po ke perofetaaga he Tohi Tapu. Mogo ne manatu a ia kua mautali tuai a John, ne age e ia e tohi The Bible—God’s Word or Man’s? He oti he totou e John, ne kamata a ia ke fakamaama ko ia ko e “tagata kua nakai malolō lahi e talitonu ke he nakai fai Atua.” Ne fakakite age he paionia e tohi Fakaako he Tohi Tapu, ti fakakite ki a John e paratafa 8 he lau 20 mo e paratafa 13-16 he lau 23-24. Ne fiafia lahi a John he tau kupu Tohi Tapu i ai ti pehē a ia, “Liga lata au ke liu kikite foki ke he Tohi Tapu.”
◼ Mesikō: Taha e tagata taane ne tala age ke he tagata fakailoa kua nakai talitonu a ia ko e mena omoomoi he agaga he Atua e Tohi Tapu. Ne pehē e tagata fakailoa to fakakite age e ia e fakamooliaga ko e mena omoomoi he Atua e Tohi Tapu. He mole falu fakatutalaaga, ne kamata e loto he tagata ke lauia he tau mena haana ne fakaako mai he Tohi Tapu. Ne fakalagalaga lahi a ia ke he tau mena haana ne fakaako hagaao ke he tau tuaga faka-Atua. Ne tala age a ia ke he tagata fakailoa: “He mogo fakamua ne totou e taua e Tohi Tapu, kua tuga ko e fakatonuaga mai he ha tohi noa ni ti nakai lauia au. Ka ko e mogonei ka totou a taua ki ai, mua atu ke he fakatonuaga hagaao ke he tau mahani, kua lauia e loto manamanatu haaku.”
◼ Tau Faahi Kaufakalataha: He fakamatala pauaki he taone, ne feleveia e hoa mau mo e fifine mai i Taiwan ne talitonu ke he Atua ka e logona hifo ko e Tohi Tapu ma e tau tagata he Faahi Lalo. Ne fina atu a ia ke he fata ne fakatātā e laua e tau tohi ha kua logona e ia e fakahakuhaku pete he monuina e moui haana. Ne amanaki a ia ke lagomatai he Tohi Tapu a ia ke fai kakano e moui. Ne kamata e hoa ke fakaako mo ia e tohi Fakaako he Tohi Tapu mo e porosua Lasting Peace and Happiness—How to Find Them. Ne nakai fakaako a lautolu ke he veveheaga 2 he tohi, ka e fakatutala ke he vala he porosua ne mataulu “Ko e Tohi ke Monuina e tau Tagata Oti Kana.” He oti e fakatutala ke he tau paratafa ono fakamua he vala ia, ne ofo e fifine he kehe lahi mahaki e Tohi Tapu ka fakatatai ke he falu tohi fakalotu. He oti e fakatutala ke he tau perofetaaga he Tohi Tapu ne kua fitā he fakamooli, ne pehē a ia, “Kua nakai fai tohi foki ne maeke au ke manamanatu ki ai ne hakotika tuga e Tohi Tapu!”
◼ Sapanī: Pete he tala age e tagata he kaina ke he tagata fakailoa ko e mena nakai talitonu a ia ke he Atua, ne matutaki ni e tagata fakailoa ke ahiahi atu fakakū ki a ia, mo e fakatutala mo ia hagaao ke he tau vala tala he Awake! ne mataulu “Tufugatia Kia?” Fano fakahaga ai, ne hiki e onoonoaga he tagata ti kamata ke talahau kua liga fai Tufuga. Kua talitonu a ia mogonei ko e mena fai Atua, ti kua fakaako e tagata fakailoa mo ia he porosua Tala Mitaki Mai he Atua!
◼ Kanatā: Ne foaki he matakainaga fifine e tau mekasini foou ke he fifine hane fina atu ke he motokā haana. He liu atu e matakainaga fifine, ne mauokafua e fifine he tala age kua nakai fiafia a ia ti nakai talitonu foki a ia ke he Atua. Ne fifili e matakainaga fifine ke nakai toka pihia a ia ka e age e porosua A Satisfying Life—How to Attain It. He moua he matakainaga fifine a ia he kaina, ne tala age ke he fifine kua pete he iloa kua nakai talitonu a ia ke he Atua, kua manamanatu e matakainaga fifine ki a ia ha ko ia ko e matua fifine tokotaha. Ne fakakite age he matakainaga fifine e paratafa 6 he lau 4 he porosua, ne fakatutala ke he moua mai i fe e fakatonuaga mitaki. Ti fakamafana he matakainaga fifine a ia ke totou e tau puhala he fakaakoaga 2 hagaao ke he feaki he tau fanau. Ne fiafia lahi e fifine ke uta e porosua.