Tau Fana Favale Matakutakuina he Lalolagi Katoa​—Ko e Heigoa ne Talahau he Tohi Tapu?

Ia Iulai 2022, ko e tau gahua matakutakuina he tau fana favale ne kaputia e lalolagi katoa:

•  “Ko e tamate he tagata politika talahaua i Sapanī [Takitaki Fakatufono fakamua ko Shinzo Abe] ne lutu e motu mo e ofo lahi e tau tagata he lalolagi katoa, mua atu ha ko e motu ne tote e favale mo e nakai fakaatā he matafakatufono e tau fana.”​—Iulai 10, 2022, The Japan Times.

• “Ko e tau tagata i Denmark ne ofomate ha kua tokotolu ne fana he tagata he fale koloa lahi i Copenhagen.”​—Iulai 4, 2022, Reuters.

• “South Africa: Toko 15 ne mamate he fana fakahanoa he tau tagata he fale kava he taone ko Soweto.”​—Iulai 10, 2022, The Guardian.

• “Molea e 220 ne fana ti mamate he tau fana favale i U.S. ia Iulai 4 he okioki matahiku vahātapu.”​—Iulai 5, 2022, CBS News.

Fai amaamanakiaga nakai to fakaoti e favale pihia? Ko e heigoa ne talahau he Tohi Tapu?

Fakaoti e Favale

Fakamaama he Tohi Tapu e magaaho ha tautolu ko e “tau aho fakamui,” ko e magaaho he tau tagata ka vale lahi, fakamamahi fakakelea, mo e kelipopo tagata. (2 Timoteo 3:1, 3) Ko e tau gahua vale pihia ne fakatupu e tau tagata ke momoui matakutaku. (Luka 21:11) Ka e mavehe he Tohi Tapu e magaaho ka fakaoti e vale mo e “to nonofo foki haku motu ke he mena ke monuina ai, mo e tau fale ke nakai haofia ai.” (Isaia 32:18) To fakaoti fēfē e vale?

To utakehe he Atua e mahani kelea mo e moumou oti e tau kanavaakau tau.

• “To vevehe kehe mai he motu a lautolu ne mahani kelea.”​—Tau Fakatai 2:22.

• “Kua fakahiku e ia [Atua] e tau ato hoko ke he fakatulakiaga he lalolagi; kua fafati e ia e kaufana, mo e tūtū e tao; kua huhunu foki e ia e tau kariota ke he afi.”​—Salamo 46:9.

To moumou he Atua tupu maiaga he tau gahua vale he fakaako e tau tagata ke nonofo mafola.

• “Nakai mahani kelea a lautolu, to nakai moumou mena ai e lautolu ke he haku a mouga tapu oti; ha ko e mena to puke e lalolagi ke he maama kia Iehova, tuga ne toka kua ūfia ke he puke tahi.”​—Isaia 11:9.

• Pihia foki mogonei, fakaako he Atua e tau tagata he lalolagi katoa ke kalo kehe he vale mo e fakaaoga e tau kanavaakau, to “tukituki e lautolu e tau pelu ha lautolu ke eke mo tau koho, ko e tau tao foki ha lautolu ke eke mo tau titipi ke taute aki e tau vine.”​—Mika 4:3.

Ke iloa foki e maveheaga he Tohi Tapu ke he lalolagi nakai fai matakutaku, totou e vala tala “Freedom From Fear​—Is It Possible?”

Ke iloa foki ke he tali mauokafua ke he vale, totou e vala tala “Peace on Earth at Last!”