Moumou Kia he Tau Fakamoli a Iehova e Tau Magafaoa po ke Atihake a Lautolu?
Ha ko e Tau Fakamoli a Iehova, kua gahua malolō a mautolu ke atihake e tau magafaoa ha mautolu mo e tau magafaoa he tau katofia ha mautolu. Fakalilifu e mautolu e Atua ko e Tufuga he fakatokaaga he magafaoa. (Kenese 2:21-24; Efeso 3:14, 15) Fakaako mai e ia he Tohi Tapu e tau matapatu fakaakoaga kua lagomatai e tau tagata he lalolagi katoa ke malolō mo e fiafia e tau fakamauaga.
Puhala ne Omoomoi he Tau Fakamoli a Iehova e Tau Magafaoa ke Mauokafua
Eketaha a mautolu ke muitua e fakatonuaga he Tohi Tapu ha kua lagomatai he mena nei a mautolu ke eke mo tau taane, tau hoana, mo e tau matua mitaki. (Tau Fakatai 31:10-31; Efeso 5:22–6:4; 1 Timoteo 5:8) Ko e pulotu he Tohi Tapu kua lagomatai e tau magafaoa ne kehekehe e tau lotu ke kautū. (1 Peteru 3:1, 2) Manamanatu ke he tau talahauaga nei he tau hoa nakai tua ti eke fakamui mo Tau Fakamoli a Iehova:
“He ono e tau fakamua he ha maua fakalataha ne puke he taufetoko mo e fakahogohogo manava. He eke a Ivete mo taha he Tau Fakamoli a Iehova, kua totonu mo e mahani fakauka a ia. Ko e tau hikiaga ne taute e ia kua fakahao e fakamauaga ha maua.”—Clauir i Brazil.
“Totoko au ke he taane haaku ko Chansa he kamata a ia ke fakaako e Tohi Tapu mo e Tau Fakamoli a Iehova he manatu au kua moumou e lautolu e tau magafaoa. Tali mai ai, kitia e au kua lagomatai he Tohi Tapu e fakamauaga ha maua.”—Agness i Zambia.
He gahua fakamatala ha mautolu, fakakite e mautolu ke he tau katofia e fakagahua e iloilo he Tohi Tapu ka lagomatai a lautolu
Ke ua taufetoko
Ke fakaako ke fakamagalo atu
Ke fakamahani e tau fanau
Tamai kia he liliuina e taufetoko ke he fakamauaga?
Maeke ai he falu magaaho. Ma e fakatai, ko e hokotaki he 1998 he kamupanī kumikumi Sofres ne moua 1 mai he 20 e fakamauaga ne taha ni e hoa mau ne Fakamoli a Iehova ne hagahaga kelea he mogo ne liliuina e hoa ne nakai tua.
Talahau tuai e Iesu ko lautolu ne mumui ke he tau fakaakoaga haana he falu magaaho kua matematekelea he taufetoko e magafaoa. (Mataio 10:32-36) Ko e tagata fakamau tala tuai ko Will Durant ne talahau i lalo he Pule Roma, “Fakahala e tau Kerisiano he moumou e tau magafaoa,”a ti fehagai e falu he Tau Fakamoli a Iehova mo e fakahala taha nei mogonei. Ka e kakano kia e mena nei kua fakatupu he Tau Fakamoli e feveheveheaki?
European Court of Human Rights
He fakafili ke he hokotaki kua moumou he Tau Fakamoli a Iehova e tau magafaoa, ko e European Court of Human Rights ne pehē ko e tau tagata ne nakai ko e Tau Fakamoli he tau magafaoa kua fa fakatupu e taufetoko he fakaheu “ke talia mo e fakalilifu e atāina he tau magafaoa fakalotu ha lautolu ke fakakite mo e taute e lotu haana.” Lafi he Court: “Ko e aga mau anei ke he tau fakamauaga ne nakai tatai e taofiaga ti ko e mena taha ia foki ne tupu ke he Tau Fakamoli a Iehova.”b Pete foki ka fehagai mo e tau totokoaga fakalotu, kua eketaha e Tau Fakamoli a Iehova ke muitua e fakatonuaga he Tohi Tapu: “Aua neke taui atu e kelea ke he kelea he taha. . . . Kaeke kua maeke ia mutolu, kia nonofo fakamitaki mo e tau tagata oti kana.”—Roma 12:17, 18.
Ko e ha ne talitonu e Tau Fakamoli a Iehova kua lata ni a lautolu ke mau ki loto he lotu ha lautolu
Ko e Tau Fakamoli a Iehova ne muitua ke he tau fakatonuaga he Tohi Tapu ke mau ni “kia lata mo e Iki,” kua kakano ni ke mau ke he tagata ne tatai e tua. (1 Korinito 7:39) Ko e poakiaga nei mai he Tohi Tapu mo e kua aoga. Ma e fakatai, ko e vala tala he 2010 he Journal of Marriage and Family ne pehē ko e “tau hoa ne tatai e tau taofiaga fakalotu, tau matagahua, mo e tau fakaakoaga” ne fa mitaki lahi e tau fakafetuiaga.c
Ka e nakai fakamafana he Tau Fakamoli ki a lautolu ne fakalataha ke he tua ke vevehe kehe mai he tau hoa mau ha lautolu ne nakai ko e Fakamoli. Pehē e Tohi Tapu: “Kaeke ke ha ha ia taha matakainaga e hoana kua nakai tua, kua loto ke nonofo mo ia, aua neke mavehe mo ia. Ko e fifine foki, kaeke ke ha i ai e tane kua nakai tua kua loto ke nonofo mo ia, aua neke mavehe a ia mo ia.” (1 Korinito 7:12, 13) Pipiki mau e Tau Fakamoli a Iehova ke he poakiaga nei.
a Kikite Caesar and Christ, lau 647.
b Kikite e fakafiliaga ne fakahoko ma e Jehovah’s Witnesses of Moscow and Others v. Russia, lau 26-27, paratafa 111.
c Kikite Journal of Marriage and Family, Volume 72, Number 4, (August 2010), lau 963.