To Moumou Kia e Fua Lalolagi?

Ko e tali he Tohi Tapu

Nakai, to nakai moumou e fua lalolagi he vela he afi po ke hukui aki taha mena. Fakaako he Tohi Tapu na tufuga he Atua e lalolagi ke nonofo tukulagi [muatua] e tau tagata.

• “To eke ni e motu ma e tau tagata tututonu, to nonofo muatua ai a lautolu.”​—Salamo 37:29.

• “Ko ia [Atua] ne fakave e lalolagi ki luga he hana tau fakave, kia nakai tuai gahuahua a ia tukulagi tukumuitea.”​—Salamo 104:5.

• “Ka ko e lalolagi kua tumau tukulagi haia.”​—Fakamatalaaga 1:4.

• “Ko ia ni ko e Atua; ko ia ne tufugatia e lalolagi mo e eke ai; . . . nakai eke noa ai e ia, ne eke e ia ke nonofo ai e tau tagata.”​—Isaia 45:18.

To moumou kia he tau tagata e fua lalolagi?

To nakai fakaatā e tau tagata ke moumou katoatoa e lalolagi he takiva, felakutaki, po ke falu puhala. Ka e to “moumou ai foki a lautolu kua moumou e lalolagi.” (Fakakiteaga 11:18) To taute fēfē e ia?

To hukui he Atua e tau fakatufono he tagata, ne nakai maeke ke puipui e fua lalolagi, aki e Kautu mitaki katoatoa he lagi. (Tanielu 2:44; Mataio 6:9, 10) Ko Iesu Keriso ko e Tama he Atua ka pule ke he Kautu ia. (Isaia 9:6, 7) He nofo a Iesu he lalolagi, ne fakaaoga e ia e malolō mana ke he tau tufugatia. (Mareko 4:35-41) Ko ia e Patuiki he Kautu he Atua, to pule ke he tau mena oti kana he lalolagi. To liu a ia fakafoou e tau tuaga he lalolagi ke tuga he katene ko Etena.​—Mataio 19:28; Luka 23:43.

Nakai kia fakaako he Tohi Tapu to vela e lalolagi he afi?

Nakai. Ko e tau manatu nakai mooli pihia ne fa tupu mai he nakai maama mitaki e 2 Peteru 3:7, ne pehē: “Ka ko e lagi a enei mo e fonua kua fakatoka . . . kia taofi ma e afi.” Manamanatu ke he ua e matakupu aoga ka lagomatai a tautolu ke maama e kakano he tau kupu ia:

1. Fakaaoga he Tohi Tapu e tau kupu “lagi,” “lalolagi,” mo e “afi” ke hagaao ke he falu mena. Ma e fakatai, pehē e Kenese 11:1: “Ne taha maka e vagahau, . . . he lalolagi oti.” Hagaao e “lalolagi” he kupu nei ke he tau tagata.

2. Fakamaama he 2 Peteru 3:7 e kakano he tau kupu ia ko e lagi, lalolagi, mo e afi. Kupu 5 mo e 6 ne fakatatai ke he Fakapuke he vahā ia Noa. Mogoia, ne moumou e lalolagi i tuai, ka e nakai galo e fua lalolagi. Ne holoholo kehe he Fakapuke e tau tagata po ke “lalolagi” mahani favale. (Kenese 6:11) Moumou foki e vahega ko e “lagi”​—ko e tau tagata ne pule ke he tau tagata ia he lalolagi. Ko e tau tagata kelea ne moumou ka e nakai ko e fua lalolagi. Fakahao a Noa mo e magafaoa he moumou e lalolagi ia ti nonofo hifo he lalolagi palaneta he mole e Fakapuke.​—Kenese 8:15-18.

Tuga e tau vai he Fakapuke, ko e moumouaga po ke “afi,” he 2 Peteru 3:7 ka fakaotioti e lalolagi he tau tagata mahani kelea ka e nakai ko e lalolagi palaneta. Mavehe mai he Atua e “lagi fou mo e lalolagi fou, tuga ne hana talahaua mai, ke nofo ai e tututonu.” (2 Peteru 3:13) Ko e “lalolagi fou,” po ke tau tagata kua fakafoou he mogoia, to pule mai he “lagi fou” po ke takitakiaga foou​—ko e Kautu he Atua. I lalo hifo he takitakiaga he Kautu ia, to eke e lalolagi mo parataiso mafola.​—Fakakiteaga 21:1-4.