Ko e Ha ne Fakahigoa a Iesu ko e Tama he Atua?

Tali he Tohi Tapu

Fa fakahigoa he Tohi Tapu a Iesu “ko e Tama he Atua.” (Ioane 1:49) Ko e talahauaga “Tama he Atua” ne fakakite ko e Atua e Tufuga, po ke Punaaga he tau mena momoui oti, ne putoia ai a Iesu. (Salamo 36:9; Fakakiteaga 4:11) Nakai fakaako he Tohi Tapu ko e matua taane e Atua ke he tama tuga he puhala taha ne fanau he tau tagata e tau tama.

Fakahigoa foki he Tohi Tapu e tau agelu ko e “tau tama tane he Atua.” (Iopu 1:6) Talahau he Tohi Tapu ko e tagata fakamua ko Atamu ko e “tama a ia he Atua.” (Luka 3:38) Ka ko Iesu e tufugatia fakamua he Atua ti ko ia ni ne tufuga tokotaha he Atua, ti fakamaama ai he Tohi Tapu ko Iesu ko e Tama uluaki he Atua.

• Moui kia a Iesu he lagi ato fanau mai a ia ke he lalolagi?

• Ko e heigoa ha Iesu ne taute ato hifo mai ke he lalolagi?

Moui kia a Iesu he lagi ato fanau mai a ia ke he lalolagi?

Ē. Ko Iesu ne moui fakaagaaga he lagi ato fanau mai a ia ko e tagata ke he lalolagi. Ui ni e Iesu: “Hifo mai au he lagi.”​—Ioane 6:38; 8:23.

Tufuga mua he Atua a Iesu ato tufuga e ia e tau mena oti ne toe. Hagaao ki a Iesu, pehē e Tohi Tapu:

• “Ko ia . . . ko e uluaki he tau mena oti kana kua eke.”​—Kolose 1:15.

• “Ko ia ko e kamataaga he tau mena ne eke he Atua.”​—Fakakiteaga 3:14.

Fakamooli e Iesu e perofetaaga hagaao ki a ia “ne tali mai he vaha fakamua, tali mai i tuai tigahau.”​—Mika 5:2; Mataio 2:4-6.

Ko e heigoa ha Iesu ne taute ato hifo mai ke he lalolagi?

Ha ha ia ia e tuaga tokoluga he lagi. Hagaao a Iesu ke he tuaga haana he mogo ne liogi a ia: “Ma Matua na e, kia tuku mai a e koe kia au e fakahekeaga . . . ko e fakahekeaga ne toka ia taua mo koe, ka e nakala eke e lalolagi.”​—Ioane 17:5.

Lagomatai e ia e matua haana ke tufuga e tau mena oti kana. Gahua fakalataha a Iesu mo e Atua “ko e tufuga.” (Tau Fakatai 8:30) Hagaao ki a Iesu, pehē e Tohi Tapu: “Ko e mena ne eke e ia e tau mena oti kana, ko e tau mena ha he lagi, mo e tau mena ha he lalolagi.”​—Kolose 1:16.

Tufuga he Atua e tau mena oti ne toe fakavē ki a Iesu. Putoia he tau tufugatia nei e tau agelu, ti pihia mo e lagi likoliko mo e lalolagi katoa. (Fakakiteaga 5:11) Ha ha i ai foki e kaufakalataha he Atua mo Iesu kua tuga e tagata ne talaga e palana ne gahua tokoua mo e tagata ne talaga e fale ke mau.

Eke a ia mo Kupu. He tutala ke he moui fakamua ha Iesu, ne fakahigoa he Tohi Tapu a Iesu ko e “Loko” po ke Kupu. (Ioane 1:1) Maaliali ai, kua kakano e mena nei kua fakaaoga he Atua e Tama haana ke tala age e tau vala tala mo e tau fakatonuaga ke he falu agelu.

Eke foki a Iesu mo Gutuvagahau he Atua ke he tau tagata he lalolagi. Liga tutala e Atua puhala ia Iesu ko e Kupu he foaki e tau fakatonuaga ki a Atamu mo Eva he kaina ko Etena. (Kenese 2:16, 17) Liga ko Iesu e agelu ne takitaki a Isaraela i tuai he tutakale mo e ko e leo ma e tau Isaraela ke omaoma fakatonu ki ai.​—Esoto 23:20-23.a