Ko e Heigoa ne Talahau he Tohi Tapu Hagaao ke he Levekiaga ma e Tau Matua Momotua?

Ko e tali he Tohi Tapu

Ko e tau fanau lalahi kua uho kia lautolu ke leveki e tau matua momotua ha lautolu. Pehē e Tohi Tapu ko e tau fanau lalahi “kia ako e lautolu ke fakamua e mahani mitaki ke he tau faoa ha lautolu, mo e taui atu ke he tau matua ha lautolu; ha ko e mena . . . , fakafiafia ke he Atua” a ia. (1 Timoteo 5:4, New International Version) Ka leveki he tau fanau lalahi e tau matua momotua ha lautolu, ko e omaoma a ia ke he poaki he Tohi Tapu ke fakalilifu e tau matua ha lautolu.​—Efeso 6:2, 3.

Nakai fai fakaakoaga pauaki e Tohi Tapu ke he puhala ke leveki e tau matua momotua. Ka e fai fakataiaga mai he tau tagata taane mo e fifine ne tua, kua taute pihia. Fai lagomatai foki ke he tau tagata leveki.

• Leveki fēfē he falu magafaoa e tau matua momotua he vahā Tohi Tapu?

• Ko e heigoa e lagomatai mai he Tohi Tapu ke he tau tagata leveki?

• Pehē nakai e Tohi Tapu kua lata e tau matua momotua ke leveki i kaina?

Leveki fēfē he falu magafaoa e tau matua momotua he vahā Tohi Tapu?

Loga e puhala ne taute e lautolu ke he magaaho mo e tau tutūaga.

• Nofo mamao a Iosefa mai he matua taane fuakau haana ko Iakopo. Magaaho fakamui ne kua tamai e ia a Iakopo ke tata ki a ia. Foaki e Iosefa e fale, fagai, mo e puipui e matua taane haana.​—Kenese 45:9-11; 47:11, 12.

• Fano a Ruta ke he motu he matua fifine fugavai haana mo e gahua lahi ke leveki a ia.​—Ruta 1:16; 2:2, 17, 18, 23.

• Ato mate a Iesu, ne kotofa e ia e taha tagata ke leveki e matua fifine haana ko Maria, ko e takape he mogoia.​—Ioane 19:26, 27.a

Ko e heigoa e lagomatai mai he Tohi Tapu ke he tau tagata leveki?

Talahau he Tohi Tapu e tau matapatu fakaakoaga ka lagomatai a lautolu ne leveki ke fahia ke he tau paleko he tino, mo e logonaaga uka he leveki e tau matua momotua.

• Fakalilifu e tau matua haau.

  Talahauaga he Tohi Tapu: “Kia fakalilifu a koe ke he hau a matua tane, mo e hau a matua fifine.”​—Esoto 20:12.

  Fakaaoga fēfē e matapatu fakaakoaga? Fakakite e fakalilifu ke he tau matua haau he fakaatā a laua ke taute e tau mena kua maeke agaia ke taute. Ka maeke foki, toka a laua ke taute e tau fifiliaga ke he levekiaga ha laua. Ka e fakakite ki a laua e fakalilifu haau he taute e tau lagomatai kua lata.

• Kia maama mo e fakamagalo.

  Talahauaga he Tohi Tapu: “Kua fakatuai e tagata ke ita, ha ko e hana loto manamanatu; ko e hana fakahekeaga foki, ke nakai manatu a ia ke he mena ne holifono ai e tagata kia ia.”​—Tau Fakatai 19:11.

  Fakaaoga fēfē e matapatu fakaakoaga? Ka vagahau kelea po ke nakai fakaaue ke he levekiaga e matua motua haau, hūhū hifo ki a koe, ‘Fefe e logonaaga haaku ka lauia he magaaho ka motua pihia?’ Ka lali a koe ke maama mo e fakamagalo atu, to mukamuka e tuaga.

• Fakatutala auloa.

  Talahauaga he Tohi Tapu: “Kua ulu e tau mena ne manamanatu ki ai kaeke kua nakai fai pulega; ka e fakamau ai ni ke he tau pule tokologa.”​—Tau Fakatai 15:22.

  Fakaaoga fēfē e matapatu fakaakoaga? Kumikumi e puhala ke lagomatai e tau lekua he malolō tino he tau matua haau. Kumi e falu puhala he matakavi ke lagomatai e levekiaga kia laua. Tutala ke he falu ne kua leveki e tau matua momotua. Ka fai lafu a koe, lata ke fono auloa mo e magafaoa ke fakatutala ke he tau mena kua lata ma e tau matua, puhala ke leveki a laua mo e gahua auloa.

  

• Kia mahani fakatokolalo.

  Talahauaga he Tohi Tapu: “Ha ha i ai e iloilo kia lautolu kua fakatokolalo.”​—Tau Fakatai 11:2.

  Fakaaoga fēfē e matapatu fakaakoaga? Mailoga e tau mena ne fahia a koe ki ai. Ma e fakatai, fai kaupaaga e tau tagata oti ke he magaaho mo e malolō. Ko e tau mena nei ne fahia a koe ki ai, kua maeke a koe ke taute ma e tau matua. Ka tupetupe a koe he lahi e gahua ke leveki e tau matua momotua, ole lagomatai ke he falu he magafaoa po ke tau tagata gahua malolō tino.

• Leveki ni e koe a koe.

  Talahauaga he Tohi Tapu: “Ha kua nakai fakai taha ke fakavihia hana a tino, ka kua fagai mo e leveki ai e ia.”​—Efeso 5:29.

  Fakaaoga fēfē e matapatu fakaakoaga? Pete ni ko e gahua haau ke leveki e tau matua, ka e lata foki a koe ke leveki e tau manako haau mo e magafaoa haau kaeke kua mau a koe. Kua lata a koe ke kai mitaki, fai okioki mo e mohe mitaki. (Fakamatalaaga 4:6) Kua lata a koe foki ke fakamaoki he taha magaaho. He taute pihia, ti fahia a koe ke he logonaaga, manamanatuaga mo e malolō e tino ke leveki e tau matua haau.

Pehē nakai e Tohi Tapu kua lata e tau matua momotua ke leveki i kaina?

Nakai fai talahauga pauaki pihia e Tohi Tapu kua lata e tau fanau lalahi ke leveki e tau matua i kaina. Ko e fifiliaga he falu magafaoa ke leveki e tau matua momotua i kaina, ato hoko e magaaho ne manatu a lautolu ke uta e tau matua ke leveki he fale leveki fuakau. Ti fono auloa e magafaoa ko e heigoa ne latatonu mo lautolu ne kua putoia he levekiaga.​—Kalatia 6:4, 5.