Magaaho ka Kehekehe e Tau Onoonoaga

Kehekehe e tau manako, tau mahani mo e tau aga fakatagata ka fehagai mo e hoa mau. Ka ko e falu lekua ne uka ke fakatutala ki ai tuga i lalo:

• Fiha e leva ke fakalataha mo e magafaoa

• Puhala ke leveki e tupe

• To fai tama nakai

Ko e heigoa haau mo e hoa ka taute he nakai tatai e tau onoonoaga?

• Ko e heigoa ne kua lata ke iloa e koe

• Ko e heigoa haau ka taute

Ko e heigoa ne kua lata ke iloa e koe

Pete he fetataiaki ka e nakai tatai e tau manamanatuaga. Ko e taane mo e hoana ne fetataiaki ka e nakai tatai e tau manamanatuaga ha laua ke he tau mena ne mua atu e aoga.

“Tupu hake au he magafaoa ne lafi tumau. He tau matahiku he faahi tapu, ne lafi tumau a mautolu mo e tau tupuna, tau agikolo, tau anitī, mo e tau kasini. Ko e magafaoa he taane haaku ne nakai lafi auloa tumau. Kehekehe e tau onoonoaga ha maua ke fakalataha mo e magafaoa po ke matutaki mo e tau magafaoa ne nonofo mamao.”​—Tamara.

“Nakai tatai e tupu hake ha maua ke he puhala ke fakaaoga e tupe. He tau mahina fakamua he fakamauaga ne taufetoko a maua he falu magaaho hagaao ke he mena nei. Lagaloga ne fakatutala he lali ke moua e fifiliaga ne talia tokoua ki ai.”​—Tyler.

Falu lekua ne nakai moua e mafola he talia noa ni. Ma e fakatai, ka e kua ka gagao e matua fugavai mo e lata ke leveki? Po ke taha hoa ne manako ke fai tama ka e nakai manako e taha?a

“Lagaloga ne fakatutala a maua ke fai tama. Manamanatu tumau a ia ke he mena nei, mo e tau onoonoaga ha maua kua nakai tatai. Nakai felauaki e tau manatu ha maua.”​—Alex.

Kehekehe e tau onoonoaga ka e tumau e fakamauaga. Pehē e falu pulotu ka nakai fetataiaki a koe mo e hoa haau ke he tau lekua lalahi, kua lata ni a koe ke taute e mena ne loto a koe ki ai​—tuga ke fakaoti e fakamauaga haau. Ko e “talahauaga” ia kua peehi lahi ke he tau logonaaga haau mo e tote e logonaaga ne omonuo ke he Atua ke pipiki ke he hoa mau, pete ni e tau lekua ka tutupu.

Ko e heigoa haau ka taute

Eketaha ke fakalilifu e omonuoaga he fakamauaga haau. He fakavēaga pihia, to lagomatai a koe ke gahua tokoua ke he tau lekua ha mua.

Matapatu fakaakoaga he Tohi Tapu: “Ko ia kua fakalataha he Atua, aua neke vevehe he taha tagata.”​—Mataio 19:6.

Manamanatu mua. Ma e fakatai, taha e hoa ne manako ke fai tama ka e nakai manako e taha. Loga e tau mena ke manamanatu ki ai, tuga e:

• Malolō he fakamauaga haau.

  Malolō nakai e fakamauaga haau ka tupetupe he fai tama?

• Ko e kotofaaga he tau mamatua.

  Loga atu foki e tau mena ke moua ne nakai ni ko e fagai, tau mena tui mo e fale.

• Tuaga fakatupe haau.

  Maeke nakai a koe ke lalago e gahua, magafaoa mo e falu a levekiaga foki?

Matapatu fakaakoaga he Tohi Tapu: “Ko hai taha ia mutolu kua manako ke ati e kolo, ka e nakai nofo fakamua ki lalo ke totou e tau tupe ke palepale aki?”​—Luka 14:28.

Manamanatu ke he tau mena oti he lekua. Liga maeke a koe ke talia e falu mena ne nakai manako a koe ki ai. Ma e fakatai, tuga e lekua to fai tama nakai, ko e hoa ne nakai manako ke fai tama kua lata ke hūhū hifo ki a ia:

• ‘Ka pehē au nakai manako tama a au, ko e kakano kia to nakai fai tama tukumalagi po ke hagaao ke he mogonei?’

• ‘Fakauaua kia a au he matakutaku neke nakai ko e matua mitaki?’

• ‘Matakutaku kia a au neke tiaki he hoa?’

Ka e taha faahi, ko e hoa ne manako ke fai tama kua lata ke manamanatu ke he tau hūhū nei:

• ‘Kua mautali nakai a maua ke he kotofaaga he tau mamatua?’

• ‘Maeke nakai a maua he tuaga fakatupe ke fai tama?’

Matapatu fakaakoaga he Tohi Tapu: “Ko e iloilo mai luga, kua . . . totonu.”​—Iakopo 3:17.

Mailoga e onoonoaga mitaki he hoa haau. Maeke e tau tagata tokoua ke onoono ke he takatakaiaga ka e kehekehe e tau onoonoaga ki ai. He pihia, ko e hoa mau ne igatia a laua mo e kehekehe e tau onoonoaga ke he lekua tuga e puhala ke fakaaoga e tupe. Ato fakatutala ke he tau tutūaga ne nakai fetataiaki, kua lata ke kamata ke he tau mena ne talia tokoua a mua ki ai.

• Ko e heigoa ha mua ne talia tokoua ki ai?

• Ko e heigoa e onoonoaga mitaki takitokotaha ha mua?

• Ke lata mo e fakamauaga, maeke nakai he taha ha mua ke hiki e onoonoaga ke tatai mo e taha?

Matapatu fakaakoaga he Tohi Tapu: “Aua neke kumi e taha e mitaki hana ni, ka kia takitokotaha mo e kumi e mitaki he falu.”​—1 Korinito 10:24.