Ko e Pekau-V he Pepe Kāpisi Tea

Fakaaoga he pepe e mafana he laa ke fakamafana aki e tau alaga haana ato lele. Ka malumalu e aho ko e pepe kāpisi tea ne lele mua he falu pepe. Ko e ha ne pihia ai?

Manamanatu: Ato felele, loga e tau faga pepe ne fakamafana he laa mo e tau pekau ne pa po ke hafagi fakalālā. Ka ko e pepe kāpisi tea ne hafagi e tau pekau tuga e V. He tau kumikumiaga ne fakakite kua fakaaoga he pepe e tau pekau tuga e V ke moua e mafanatia lahi. Ko e mafana he laa ke he tau pekau ne kua fakamafana e tau alaga he pepe ke maeke ke lele.

Ko e tau tagata kumikumi he University of Exeter i England, ne kumikumi ko e maeke nakai ke taute e tau lapa sola ke mua atu e malolō he fifitaki ke he tau pekau V he pepe. He taute pihia e lautolu mo e kitia kua holo ki mua e malolō ke teitei ke 50 e pasene.

Mailoga foki he tau tagata kumikumi e kalopalopa he pekau he pepe. He fifitaki ke he V mo e kalopalopa he pekau ne taute he tau tagata kumikumi e tau lapa sola ke māmā mo e mua atu e malolō. Ko e tau mena nei ne moua e Professor Richard ffrench-Constant, ko ia taha he matakau kumikumi, ne fakahigoa e pepe kāpisi tea “ko e mena iloilo he fakaaoga e malolō he laa.”

Ko e heigoa e manatu haau? Na tupumainoa kia e pekau V he pepe kāpisi tea? Po ke talaga kia?