Ko e Puha Tote ne Moua Mai e Tau Mena Kai Fakaagaaga

Ko e Tau Fakamoli a Iehova ne loga lahi e mena kai fakaagaaga kua moua mai he Initanete he mogonei. Ka e falu faahi he lalolagi, nakai lahi e tupe he tau matakainaga ha tautolu ke totogi aki e Initanete. Falu ne nonofo he tau matakavi ne mate tumau, fakatuai, po ke nakai fai Initanete.

Pete ia, tokologa e tau matakainaga ha tautolu kua maeke mogonei ke moua mai e tau koloa faka-Tohi Tapu ka e nakai fai Initanete! Maeke fēfē e mena nei?

Ko e JW Box ko e puha tote ne ta atu ke he tau fakapotopotoaga ne fakakaupā e Initanete. Ha ha i ai e router ne fakatau mai he taha kamupanī, ko e software ne taute he Faahi Gahua Komopiuta he Peteli, mo e tau tohi mo e tau vitiō he jw.org. Totogi he taha e puha ko e kavi $75 U.S.

He Fale he Kautu, fakaaoga he tau matakainaga e tau telefoni mo e tau tepelete ha lautolu ke matutaki ke he JW Box ti moua mai e tau tohi mo e tau vitiō. Maeke foki a lautolu ne tuai po ke tau mukamuka e tau telefoni mo e tau tepelete ke matutaki ki ai. Ka nakai fai Initanete e fakapotopotoaga, moua fēfē he JW Box e tau koloa foou? Fakafano atu tumau he la ofisa e tau USB flash drive ne kavi ke $4 U.S. he taha, ne ha ha e tau vala foou he jw.org kua maeke ke tuku he JW Box.

Kua lagomatai fēfē he JW Box e tau matakainaga ha tautolu? Ko Nathan Adruandra, ko e matua taane ne nofo he Democratic Republic of Congo, ne fakamaama: “Ne leva e lali haaku ke moua mai e tau taute tala ‘O Jehovah, . . . I Trust in You’ mo e Remember the Wife of Lot. Ka e nakai maeke ti fakalolelole he mena ia au. Maeke au mogonei ke moua mai e tau vitiō nei ke he telefoni haaku, ti lagomatai he mena nei a maua ko e tau mamatua ke fakaako fakamitaki e fanau ha maua.”

Ko e matakainaga taane ne lagomatai e tau fakapotopotoaga i Nigeria ke tukutuku fakalataha e JW Box, ne pehē: “Onoono e tau matakainaga ke he JW Box ko e mena fakaalofa uho mai ia Iehova. Fiafia lahi a lautolu ha kua mukamuka mogonei ke moua mai e tau tohi mo e tau vitiō he Puha Koloa Fakaako.”

Molea 1,700 e puha pehēnei ne kua fakafano ke he tau matakainaga ha tautolu i Africa, Oceania, mo South America, ti fitā he fakatoka ke fakafano ai ke he loga atu foki e fakapotopotoaga. Moua mai i fe e tau tupe ke totogi aki e fakaholoaga nei? Mai he tau mena fakaalofa ke he gahua he lalolagi katoa, ti loga ne tuku ai puhala he donate.jw.org. Fakaaue ke he lalagoaga fakamokoi ha mutolu.