PUHALA NE FAKAAOGA E TAU MENA FAKAALOFA HAAU
Mau Maopoopo e Tau Matagahua Talaga Ato Hoko e Pandemic
NOVEMA 1, 2020
Totou teau afe ne papatiso he tau tau takitaha ti kua lata ke fakalahi hake e numera he tau fale fakateokarasi. He tau he fekafekauaga 2020, ko e Local Design/Construction Departments he lalolagi katoa ne fakatokatoka ke talaga mo e liu fakafoou ke he molea e 2,700 he tau fale ma e tapuakiaga.a
Ka e nakai taute e tau fakatokatokaaga nei ha kua lauia he COVID-19 pandemic. Ke puipui ha tautolu a tau matakainaga mo e omaoma ke he tau poaki he fakatufono, ko e Komiti Fakailoaaga he Kau Fakatufono ne fakamaoki e matagahua talaga ke he lalolagi katoa. Ko e magahala he tau he fekafekauaga 2020, molea e 1,700 he tau fale tapuakiaga kua talaga mo e liu fakafoou ato kamata e pandemic. Kitia ai kua molea e 100 he tau matagahua talaga kua mau. Manamanatu la kua maeke fēfē he ua e matagahua talaga nei ke fakaoti mo e aoga ke he tau matakainaga.
La ofisa i Cameroon. Ke he la ofisa fakamua ne toka i Douala, kua tote mo e lata ke liu fakafoou. Ko e Komiti Fakailoaaga ne fakatoka ke liu talaga e la ofisa, ka e molea lahi e tupe ke talaga aki. Ti kumikumi foki a lautolu kua maeke nakai ke talaga taha fale foou po ke fakatau mo e liu talaga foki e fale tuai, ka e nakai fakamooli e tau mena ua nei.
Fai magaaho, ne mailoga he tau matakainaga ke he faahi tokelau i Douala, ko e fakatufono he matakavi ia ne fakatoka ke talaga e puhalatū, ke he faahi taha mo e Fale he Toloaga ha tautolu. To hagahaga mitaki e puhalatū he mogoia ke tamai e tau koloa ke he matakavi. Ko e mena nei ne manako pauaki e la ofisa ki ai. Ko e Kau Fakatufono ne fakaatā e talaga he la ofisa foou he taha vala fonua he Fale he Toloaga.
Ko e tau matakainaga ne lagomatai ke talaga e la ofisa foou i Cameroon
Ko e Tau Fakamoli mo e falu tagata, ne gahua auloa a lautolu ke he matagahua talaga. Ti nakai lahi e magaaho mo e tupe ne fakaaoga. Ko e matagahua talaga kua mau maopoopo ke he molea ua e miliona talā (U.S.) ne tote hifo ke he tupe ne amanaki ke fakaaoga ai! Ato tupu e COVID-19, ko e magafaoa Peteli kua fitā he fale foou.
Kua mau e la ofisa i Cameroon ato hoko e COVID-19 pandemic
Ko e tau tagata gahua he Peteli i Cameroon, kua aoga mai ha lautolu a tau momoui mo e tau tuaga gahua foki, ti kitia e lautolu ko e foakiaga nei mai he fakaalofa a Iehova. Ne pehē taha hoa mau, “Manako a maua ke gahua fakamalolō mo e nakai uta fakateaga e mena uho nei.”
Ko e tau matakainaga ne gahua he ofisa foou ato hoko e pandemic
Ofisa Fakaliliu Matutaki Mamao Tojolabal i Mexico. He loga e tau tau, ko e matakau fakaliliu Tojolabal ne gahua he la ofisa i Central America, ne tata atu ki Mexico City. Ko e tau tagata vagahau Tojolabal kua nonofo i Altamirano mo Las Margaritas ne teitei 1,000 kilomita he mamao! Ko e mena ne tupu, kua uka he tau tagata fakaliliu ke taofi mau e vagahau Tojolabal. Ti uka ke kumi e tau matakainaga taane mo e fifine ne tata mai, kua lotomatala ke lagomatai e fakaliliuaga Tojolabal mo e tapaki e tau leo.
Ko e tau matakainaga ne lagomatai e gahua he Ofisa Fakaliliu Matutaki Mamao
Ko e tau kakano nei, kua manako e Komiti Tohia Tohi he Kau Fakatufono ke liu fakatū e matakau fakaliliuaga ke he matakavi ne vagahau Tojolabal. Ke hokotia ke he mena nei, ne manatu e la ofisa ke fakatau e taha fale mo e liu fakafoou. Tau mukamuka he taute pihia ka e nakai talaga po ke totogi falu ofisa ke fakaaoga.
Taha tagata fakaliliu ne fakamaama e aoga ki a ia: “He hogofulu e tau ne gahua fakaliliu au he la ofisa, ne nakai feleveia au mo e taha magafaoa he matakavi ia ne vagahau tuga au. Mogonei ko e ofisa ha mautolu kua toka ke he lotouho he matakavi ne vagahau Tojolabal. Tutala au mo e tau tagata vagahau Tojolabal he tau aho oti. Ti fakaako e au e tau kupu foou mo e holo ki mua e gahua haaku.”
Ko e ofisa fakaliliu Tojolabal he magaaho fakamua mo e magaaho ne oti e gahua
Tau Matagahua ma e Tau he Fekafekauaga 2021
Ma e tau he fekafekauaga 2021, ka maeke ke fakahoko e tau fakatokatokaaga, ke gahua ke he 75 e Ofisa Fakaliliu Matutaki Mamao mo e tau fale aoga Tohi Tapu. Mo e matutaki ke he valu e matagahua lalahi he la ofisa, putoia e matagahua foou ke he matapatu ofisa he lalolagi i Ramapo, New York, pihia foki ke hiki e tau la ofisa ha Argentina mo Italy. Kua manako foki ke moua e molea 1,000 e tau Fale he Kautu kua foou. Molea e 6,000 he tau fale feleveiaaga mogonei ne nakai mitaki mo e kua lata ke fakafoou. Ka e ha ha ai foki 4,000 e tau Fale he Kautu ne kua lata ke liu fakafoou.
Ko e totogi fēfē e tau gahua talaga mo e liu fakafoou oti nei? Ko e matakainaga ko Lázaro González, ko e hukui mai he La Ofisa he Komiti i Central America, ne tali e hūhū nei he fakatutala a ia hagaao ke he Ofisa Fakaliliu Matutaki Mamao Tojolabal. “Kua nakai loga e tau koloa he la ofisa he matakavi ha mautolu. Ka nakai fai lalagoaga mai he tau matakainaga katoa, to nakai maeke ke talaga e tau ofisa fakaliliu ke lata mo e ha mautolu a tau matakainaga ne vagahau motu. Ko e tau tupe ne foaki he tau matakainaga he lalolagi katoa, kua maeke ke tamai fakatata e tau tagata fakaliliu ke he tau matakavi ne fakaaoga e tau vagahau ia. Ti fakaaue lahi a mautolu ke he tau matakainaga he lalolagi katoa ne foaki fakamokoi.” Mooli, kua maeke ke taute e tau matagahua talaga ke he lalolagi katoa ha ko e tau mena fakaalofa ha mutolu ne foaki ke he donate.jw.org.
a Ko e Local Design/Construction Departments ne fakatokatoka ke talaga e tau Fale he Kautu ke he la ofisa he matakavi. Ko e World Wide Design/Construction Department, ne toka he matapatu ofisa he lalolagi katoa, ne fakatokatoka mo e takitaki e tau matagahua talaga he lalolagi katoa.