Kua manatu nakai a koe ke totou e Tohi Tapu ka e nakaila totou ia ha ko e tau logonaaga tuga ha lautolu i luga? Ma e tokologa, tuga ko e matagahua makimaki ke totou e Tohi Tapu. Ka e kua ka iloa e koe na maeke e Tohi Tapu ke lagomatai a koe ke moua e moui ne mua atu e fiafia mo e makona? Ka e kua ka iloa e koe kua fai puhala foki ke totou aki ke moua e atihake? To makai nakai a koe mogoia ke onoono ko e heigoa i loto he Tohi Tapu?

Kitekite la ke he falu talahauaga ha lautolu ne mailoga kua aoga lahi e Tohi Tapu he magaaho ne kamata a lautolu ke totou ai.

Ko Ezekiel ne 20 tumā e tau, ne pehē: “He magaaho fakamua, ne tatai au mo e tagata ne fakaholo e motokā ka e nakai fai matakavi he manamanatuaga. Ka ko e totou he Tohi Tapu kua lagomatai au ke fai kakano e moui. Ha ha i loto e tau fakatonuaga aoga kua maeke au ke fakaaoga he tau aho takitaha.”

Ko Frieda ne 20 tumā foki e tau, ne fakamaama: “Fa aga taufetoko au. Ka ko e totou haaku ke he Tohi Tapu, ne fakaako au ke tautaofi e mahani haaku. Lagomatai he mena nei au ke mukamuka ke fakafetui mo e falu, ti kua loga e kapitiga haaku mogonei.”

Ko e fifine ko Eunice ne 50 tumā e tau he moui, ne pehē hagaao ke he Tohi Tapu, “Kua lagomatai au ke eke mo tagata mitaki, mo e hiki e tau mahani kelea haaku.”

Tuga ni kua iloa he tau tagata totou ia mo e tokologa atu foki, kua maeke e totou he Tohi Tapu ke lagomatai a koe ke moua e moui ne mua e fiafia. (Isaia 48:17, 18) Lafi ki ai, to lagomatai a koe ke (1) taute e tau fifiliaga mitaki, (2) moua e tau kapitiga mooli, (3) fahia ke he tau tupetupe, mo e (4) mua atu, iloa e kupu mooli hagaao ke he Atua. Ko e tau fakatonuaga he Tohi Tapu kua puna mai he Atua, ti nakai hepe a koe ka muitua ai. Nakai maeke e Atua ke foaki e tau fakatonuaga kelea.

Ko e mena ne mua, ke kamata. Ko e heigoa e tau puhala aoga ka kamata ai ke fakamukamuka mo e fiafia lahi?

Ko e heigoa e puhala ka lagomatai a koe ke fiafia ke totou e Tohi Tapu haau mo e lahi e mena aoga ka moua mai i ai? Manamanatu la ke he lima e puhala kua gahua mitaki ma e tokologa.

Fakatoka e takatakaiaga hako. Lali ke kumi e matakavi ogoogonoa. Fakatote hifo e tau mena fakatauhele ke maeke a koe ke hagaaki ke he tau mena haau ka totou. To lagomatai ki a koe ke aoga mai he totouaga haau ka maama mo e hauhau e takatakaiaga.

Kia hako e tuaga he loto. Ha kua puna mai e Tohi Tapu he ha tautolu a Matua he lagi, to aoga lahi ki a koe ka moua e koe e mahani he tama tote kua mautali ke fakaako mai he matua fakaalofa haana. Ka fai manatu kelea a koe, tau manatu toka tuai hagaao ke he Tohi Tapu, lali ke tuku kehe e tau manatu ia ke maeke e Atua ke fakaako a koe.—Salamo 25:4.

Liogi mua to totou. Ko e tau manatu he Atua i loto he Tohi Tapu, ti nakai ofo ha kua lata a tautolu ke moua e lagomataiaga haana ke maama ai. Mavehe mai e Atua ke foaki e “Agaga Tapu kia lautolu ka ole atu ai kia ia.” (Luka 11:13) Maeke e agaaga tapu ke lagomatai a koe ke maama e puhala manamanatu he Atua. To fai magaaho ti mahafagi e loto haau ke maama e “tau mena hokulo ia he Atua.”—1 Korinito 2:10.

Totou ke maama. Ua totou ni he tala ke oti. Manamanatu fakahokulo ke he tau mena haau kua totou. Hūhū hifo ki a koe ni e tau hūhū tuga anei: ‘Ko e heigoa e tau mahani ne kitia e au ke he tagata ia ne totou au ki ai? Fakagahua fēfē e au e mena nei he moui haaku?’

Fakatoka e tau foliaga pauaki. Ke aoga mai he totouaga haau he Tohi Tapu, amanaki ke fakaako mai taha mena ke lagomatai fakalahi aki e moui haau. Liga maeke a koe ke fakatoka e tau foliaga tuga anei: ‘Manako au ke iloa lahi hagaao ke he Atua.’ ‘Manako au ke eke mo tagata mitaki, mo taane po ke hoana mitaki.’ Ti fifili mogoia e tau vala he Tohi Tapu ka lagomatai a koe ke hokotia ke he tau foliaga ia.a

Ko e tau puhala lima nei ka lagomatai a koe ke kamata. Ka e maeke fēfē ia koe ke fiafia atu foki ke he totouaga haau? To fakakite he vala tala ka mui mai e falu puhala.

Ahumate kia po ke atihake? To fēfē e totouaga he Tohi Tapu ki a koe? Fakavē ni ke he puhala ne totou e koe. Kitekite la ke he tau mena ka taute e koe ke fakalahi e fiafia haau ki ai.

Fifili e fakaliliuaga he vagahau kua hako mo e foou. Ka totou e koe e tohi ne loga e tau kupu uka po ke tuai ne nakai iloa e koe, to liga nakai fiafia a koe he totou ai. Ko e mena ia kia kumi e Tohi Tapu ne mukamuka ke maama e vagahau ne tohi aki mo e hokotia ke he loto haau. Ka e he magaaho taha, kua lata ke hako mo e mitaki e fakaliliuaga.a

Fakaaoga e tau matini hila foou. He vahā nei kua lolomi e Tohi Tapu mo e moua foki ke he puhala digital. Maeke falu Tohi Tapu ke totou he initanete po ke moua mai ke totou ni he tagata he tau komopiuta, tau tepelete, po ke tau selafoni. Falu Tohi Tapu ne ha ha ai foki e tau puhala kua maeke a koe ke fakakia mafiti e tau kupu he taha Tohi Tapu foki he vala tala ia po ke fakatatai e tau fakaliliuaga loga. Ka manako a koe ke fanogonogo ki ai ka e nakai totou, kua fai tapakiaga foki e Tohi Tapu. Tokologa ne fiafia ke fanogonogo ki ai ka heke he tau peleōafi, unu mena, po ke taute falu gahua ne maeke ke fanogonogo ki ai. Fakaaoga e puhala kua felauaki mitaki mo koe.

Fakaaoga e tau koloa fakaako Tohi Tapu. Maeke he tau koloa fakaako Tohi Tapu ke lagomatai a koe ke aoga lahi mai he totouaga haau. Ha ha i ai e tau mepe ke he tau matakavi he Tohi Tapu ka lagomatai a koe ke moua e tau matakavi he totouaga haau mo e iloa katoa e tau mena tutupu. Ko e tau vala tala tuga i loto he mekasini nei po ke he “Bible Teachings” he faahi kupega hila jw.org, ka lagomatai a koe ke kumikumi e kakano he tau vala tala he Tohi Tapu.

Hikihiki e puhala haau. Ka tuga ko e matagahua makimaki e totou e Tohi Tapu katoa, he ha he kamata ke totou e vala ne omoomoi pauaki ki a koe? Ka manako a koe ke iloa e tau tagata mahuiga he Tohi Tapu, liga lali a koe ke totou e tau tala ne fakavē ke he tau tagata. Ko e fakataitaiaga he puhala ia i loto he puha “Kumikumi ke he Tohi Tapu ke Iloa e Tau Tagata i Loto.” Po ke manako a koe ke totou ke he tau matakupu he Tohi Tapu po ke fakapapahiaga he tau mena ne tutupu. Lali ke fakaaoga e taha he tau puhala nei.

Ko e Tohi Tapu ne nakai ko e tohi noa ni. Ha ha i loto e tau fakatonuaga mai he ha tautolu a Tufuga. (2 Timoteo 3:16) Maeke e fekau i loto ke omoomoi lahi a tautolu. Pehē e Tohi Tapu: “Ko e kupu he Atua kua moui ia, mo e gahua malolo.” (Heperu 4:12) Kua toka ai e malolō ke fakaholo ki mua e tau momoui ha tautolu ke he ua e puhala—foaki e tau takitakiaga ma e tau momoui ha tautolu he tau aho takitaha mogonei mo e lagomatai a tautolu ke iloa e Atua mo e tau maveheaga haana.—1 Timoteo 4:8; Iakopo 4:8.

Fakaholo ki mua e tau momoui ha tautolu mogonei. Maeke e Tohi Tapu ke lagomatai ke he tau mena fakatagata ha tautolu. Foaki mai e tau fakatonuaga aoga hagaao ke he tau tuaga nei.

• Tau fakafetuiaga mo e falu.—Efeso 4:31, 32; 5:22, 25, 28, 33.

• Malolō tino mo e manamanatuaga.—Salamo 37:8; Tau Fakatai 17:22.

• Tau mahani.—1 Korinito 6:9, 10.

• Tau mena fakatupe.—Tau Fakatai 10:4; 28:19; Efeso 4:28.a

Ko e hoa mau fuata i Asia ne fakaaue lahi ke he aoga he fakatonuaga he Tohi Tapu. Tuga ni e tau hoa ne mau foou, ne taufetului a laua ke maama mitaki e tau mahani ha laua mo e atāina ke tutala. Ka e kamata a laua ke fakagahua e tau mena ne totou e laua he Tohi Tapu. Ko e heigoa e fua? Pehē e taane ko Vincent: “Ko e tau mena ne totou e au i loto he Tohi Tapu ne lagomatai au ke fehagai mo e tau paleko he fakamauaga ha maua ke he puhala fakaalofa. He momoui fakatatau ke he Tohi Tapu kua moua e maua e moui fiafia ko e hoa.” Ko e hoana haana ko Annalou ne talia foki: “He totou e tau fakafifitakiaga he Tohi Tapu kua lagomatai a maua. Mogonei kua fiafia au mo e makona ke he fakamauaga ha maua mo e tau foliaga ha maua he moui.”

Iloa fakahaga e Atua. Lafi ke he tau talahauaga ha Vincent hagaao ke he fakamauaga, ne pehē foki a ia: “He totou e Tohi Tapu, kua tata lahi au ki a Iehova nakaila pihia fakamua.” Hagaaki e onoonoaga ha Vincent ke he matakupu aoga—maeke e Tohi Tapu ke lagomatai a koe ke iloa e Atua. He taute pihia, kua aoga ki a koe e tau fakatonuaga haana mo e iloa kua maeke a koe ke kapitiga mo e Atua. To kitia foki e koe na fakakite fakamatafeiga e ia hagaao ke he vahā mitaki anoiha, ko e magaaho ka moua e koe e “moui tukulagi”—ka tumau tukulagi. (1 Timoteo 6:19) Taha mena a ia kua nakai maeke ke moua he ha tohi foki.

Ka totou e koe e Tohi Tapu ti fakatumau ki ai, to maeke foki a koe ke moua e tau mena mitaki ia—ko e fakaholo ki mua e tuaga he moui haau mogonei mo e iloa fakahaga e Atua. He totou e koe e Tohi Tapu, to liga loga e hūhū ka manamanatu a koe ki ai. Ka pihia, manatu e fakafifitakiaga mitaki he iki Aitiope he 2,000 tau kua mole. Ne loga e hūhū haana hagaao ke he Tohi Tapu. He hūhū ki a ia kua maama nakai e tau mena haana ne totou, ne tali e ia: “To maeke fefe e au, ka nakai fakakite mai e taha kia au?”b Ti makai a ia ke talia e lagomataiaga mai he faiaoga lotomatala ke he Tohi Tapu, ko Filipo, ko e taha tutaki fakamua ha Iesu. (Gahua 8:30, 31, 34) He agaaga taha ia, ka manako a koe ke iloa atu hagaao ke he Tohi Tapu kua uiina e mautolu a koe ke tuku e tohi ole ke he initanete he www.pr2711.com po ke tohi ke he kaina ne tata ki a koe, ne tohia he mekasini nei. Maeke foki a koe ke matutaki ke he Tau Fakamoli a Iehova ne tata ki a koe po ke fina atu ke he Fale he Kautu he matakavi haau. Tamai ā e Tohi Tapu he aho nei ti fakaatā ai ke takitaki a koe ke moua e moui mitaki.