Fakaaoga Fakailoilo e Magaaho Haau

Puhala 1: Kia Fakatokatoka

Tuku fakamua. ‘Mailoga e tau mena kua mua e aoga,’ he fakatonu mai he Tohi Tapu. (Filipi 1:10) Tohi hifo he laupepa e tau mena kua aoga po ke lata ke taute fakamafiti he tokaloto e mena kua mua e aoga​​—tuga e fakatau he tau mena kai kua liga nakai lata ke taute fakamafiti. Mo e mena kua liga lata ke taute fakamafiti​​—tuga e kitekite he polokalama mahuiga haau he TV kua liga nakai aoga.a

Manamanatu ki mua. “Kaeke kua penu e lapatoa, ka nakai fakamata ai foki he tagata, ti fakalahi e ia hana malalo ki ai,” talahau he Fakamatalaaga 10:10: “Ka ko e iloilo ko e mena aoga ia ke fakatonu aki.” Ko e fakaakoaga? Fakamatila haau a pelu tuga ke fakatai he fakatoka tuai ke maeke a koe ke fakaaoga fakamitaki e magaaho haau. Fakatoka kehe po ke tiaki e tau gahua nakai aoga ne fofō e magaaho mo e malolō. Ka mailoga e koe kua fai magaaho a koe ha kua oti e tau gahua haau he taute, he ha he holo atu ke taute e gahua haau ne fakatoka ke taute he mogo i mua? He manamanatu ki mua, to lahi e mena haau ne taute tuga e tagata gahua iloilo ne fakamatila e ia e pelu.

Fakamukamuka e moui haau. Fakaako ke talahau ‘nakai’ ke he tau mena ne nakai aoga po ke fofō e magaaho lahi. Ko e loga e tau matagahua mo e mena ke taute to lafi ke he tupetupe nakai aoga ti maeke ke fofō e fiafia.

Puhala 2: Kalo Kehe he Tau Mena ne Fofō e Magaaho

Fakatuai mo e fakauaua. “Ko ia kua manamanatu ke he matagi nakai gana saito e ia; ko ia foki kua kitekite ke he tau aolagi nakai ni helehele saito e ia.” (Fakamatalaaga 11:4) Ko e fakaakoaga? Ko e fakatuai ko e kaiha he magaaho mo e lahi he gahua ne taute. Ko e tagata gahua fonua ne fakatali ke mitaki e matagi to nakai gana po ke helehele e ia ha lakau kai. Pihia foki, ka fakaatā e tautolu e tau hikihikifano he moui to maeke a tautolu ke fakauaua. Po ke liga logona hifo e tautolu ke fakatali ato moua e tau vala tala aoga to taute e fifiliaga. Ke iloa tonu, ko e tau fifiliaga aoga kua latatonu ke kumikumi mo e fakamakutu. “Ko e tagata lotomatala, kua manamanatu a ia ke he hana tau puhala,” talahau he Tau Fakatai 14:15. Ka ko e tala mooli kua loga e fifiliaga ne putoia e tau hikihikifano.​​—Fakamatalaaga 11:6.

Molea e mitaki lahi. “Ko e iloilo mai luga [po ke mai he Atua], kua . . . totonu,” talahau he Iakopo 3:17. Mooli, ko e mena nava lahi ke he tau aga mitaki lahi! Ka e falu mogo kua liga fakatoka e tautolu e tau aga kua tokoluganea ti fakahiku ai hogohogo manava mo e kaumahala foki. Tuga e tagata ne fakaako e taha vagahau, kua mautali to hepe a ia, mo e mailoga to ako mai a ia he tau mena nei. Ko e tagata ne molea e mitaki lahi to fakaheu e manatu neke talahau e ia e taha mena hepe​​—ko e aga ka taofi e holo ki mua haana. Ko e mitaki ha ia ka mahani fakalatalata! “Ha ha i ai e iloilo kia lautolu kua fakatokolalo [fakalatalata],” talahau he Tau Fakatai 11:2. Lafi ki ai, ko e tagata mahani fakalatalata mo e fakatokolalo kua nakai uliulitonu ti fa maeke ke kata ia ia ni.

Puhala 3: Kia Lagotatai mo e Kitia Mooli

Fakalagotatai e gahua mo e fakafiafiaaga. “Kua mua he mitaki taha e puke aloalolima mo e nofo fakatekiteki, ke he na puke aloalolima ua mo e mamahi he gahua, mo e kai e matagi.” (Fakamatalaaga 4:6) Ko e tau tagata ne molea e gahua kua nakai fiafia ai ke he fua loga he “puke aloalolima ua mo e mamahi he gahua.” Nakai fai magaaho po ke fai fahia a lautolu ne toe. Ka ko e tagata teva kua fifili a ia ke he “puke aloalolima ua” he okioki mo e moumou e tau magaaho uho lahi. Fakamafana he Tohi Tapu e onoonoaga lagotatai: Gahua malolō mo e fiafia ke he tau e palepale ne moua mai ai. Ko e tau mena mitaki he fiafia ia “kua foaki mai he Atua.”​​—Fakamatalaaga 5:19.

Ua tote e mohe. “To takoto au, ti mohe foki au mo e mafola,” ui he tagata ne tohia e Tohi Tapu. (Salamo 4:8) Lata e tau tagata lalahi ke momohe kavi ke he valu e tula he pō ke moua e malolō he tino, manamanatuaga, mo e loto manamanatu. Hagaao ke he vala fakahiku, ko e magaaho aoga lahi e mohe ha kua lagomatai ke manamanatu fakamitaki mo e tuku fakalataha e tau manatu, mo e feaki e puhala fakaako. Ka nakai mohe mitaki to mataofi e fakaakoaga ti fua mai e tau pakia, taute e tau mena hepe, mo e hogohogo manava.

Fakatoka e tau foliaga mooli. “Kua mua e mitaki he mena kua moua, ke he mena kua manako ki ai e loto.” (Fakamatalaaga 6:9) Ko e heigoa e manatu? Ko e tagata iloilo kua nakai toka e tau manako he loto ke pule ke he moui haana, mua atu ke he tau manako kua nakai mooli po ke nakai maeke ke fakamooli. Ti nakai heheina a ia he tau fakainaina po ke puhala tupe moua mafiti. Ka e fakaako a ia ke fiafia ke he mena kua maeke a ia ke moua​​—ko e “mena kua moua [po ke, kitia].”

Puhala 4: Kia Takitaki he Tau Puhala Mitaki

Manamanatu ke he tau puhala mitaki haau. Ko e tau puhala haau kua omoomoi a koe ke mailoga e tau mena mitaki, aoga, mo e latatonu. Kaeke ko e mata tao e moui haau, ko e tau mena ne uho ki a koe ka tuhi po ke hagaaki ke he mata tao ia. Ti ko e tau tuaga mitaki to lagomatai a koe ke fakatoka e tau mena ne mua atu e aoga he moui mo e fakaaoga e tau magaaho he tau tulā takitaha mo e taha aho mo e taha aho. Moua e koe i fe e tau tuaga pihia? Tokologa e tagata ne ono ke he Tohi Tapu mo ebmailoga kua mua ue atu ai he pulotu.​​—Tau Fakatai 2:6, 7.

Eke e fakaalofa mo tuaga uho haau. Ko e “fakaalofa ko e pipi haia ke fakamaopoopo ai,” he talahau he Kolose 3:14. Nakai maeke a tautolu ke fiafia mooli mo e mauokafua e tau logonaaga ka nakai fai fakaalofa, mua atu ki loto he magafaoa. Ko e tau tagata ne fakaheu e mena ia he liga tuku fakamua e kumi he tau monuina po ke gahua, kua tatanaki ai ke nakai fiafia. Ti ko e kakano mitaki mooli he Tohi Tapu ne eke e fakaalofa mo tuaga uho lahi ne kua totoku lagaloga i ai.​​—1 Korinito 13:1-3; 1 Ioane 4:8.

Fakatoka e magaaho ke manamanatu ke he tau manako fakaagaaga haau. Ko e tagata ne higoa ko Geoff ne totonu e hoana, tokoua e tama fiafia, mitaki e tau kapitiga mo e gahua mitaki ke he faahi malolō tino. Ka e fa mahani e gahua haana ke fehagai mo e matematekelea mo e mate. “Na tufuga kia e moui ke pihia?” he hūhū e ia. Ti totou e ia e falu tohi ne fakavē ke he Tohi Tapu ne lomi he Tau Fakamoli a Iehova ti moua e tau tali atihake.

Fakamaama e Geoff e mena ne fakaako e ia ke he hoana mo e tau fanau haana ti fiafia foki a lautolu. Kamata mogoia e fenoga fakaagaaga he magafaoa ne fakaholo ki mua e tau momoui ha lautolu mo e lagomatai ke fakaaoga fakamitaki e tau magaaho ha lautolu. Ko e fakaako ha lautolu ke he Tohi Tapu kua foaki age foki e amaamanakiaga homo ue atu he moui tukulagi ke he lalolagi ne atāina he tau lekua mo e matematekelea.​​—Fakakiteaga 21:3, 4.

Ko e mena ne tupu ki a Geoff ne fakamanatu mai e tau kupu ha Iesu Keriso he mogo ne pehē a ia: “Uhoaki a lautolu ne loto holoilalo [manamanatu ke he tau manako fakaagaaga ha lautolu].” (Mataio 5:3) Makai nakai a ko eke fakatoka e magaaho tote ke manamanatu ke he manako fakaagaaga haau? Ke iloa tonu, nakai fai puhala foki ke foaki ki a koe e iloilo ke fakaaoga fakamitaki e tau aho takitaha mo e he moui katoa haau.