Kua Fakamooli e Tau Mena ne Talahau Tuai e Iehova

“KO AU ni ko e Atua nakai ha ha i ai taha; ko e Atua ni, ti nakai tatai e taha mo au. Kua talahau ai tali mai he kamataaga e tau mena fakamui; tali mai ne aho mua foki e tau mena nakaila eke.” (Isaia 46:9, 10) Kua talahau mai pihia e Iehova, ne maeke ke talahau tuai e tau mena anoiha mo e tonutika.

Kua nakai maeke e tagata ke talahau tuai e tonutika he vahā anoiha ko e mena talahaua mau. Ti ko e Tohi Tapu ko e tohi he tau perofetaaga kua lata ni ke fakaohooho e tau tagata oti ne kumi e kupu mooli ke filifilia ke he talahauaga ne pehē na ko e punaaga faka-Atua. Kia fakatutala ā a tautolu ke he falu perofetaaga he Tohi Tapu ne kua fitā he fakamooli.

Tau Kautu i Tuai

Ne talahau tuai he Atua ko Etoma, Moapi, mo Amoni to fakaotioti tukulagi. (Ieremia 48:42; 49:17, 18; 51:24-26; Opetaia 8, 18; Sefanaia 2:8, 9) Ko e galo tamoki he tau tagata po ke tau matakau he tau motu kehe nei kua fakamooli e tonutika he Kupu fakaperofeta he Atua.

Mooli, to liga fakafetoko mai taha kua maeke he ha tagata ni ke talahau tuai ko e motu, pete he malolō lahi, to hokotia ke malamalaega tukumalagi. Ka e fakaheu he fakafetoko ia e mena mooli nei na talahau fakamatafeiga he Tohi Tapu e tau mena ka tutupu. Ke fakatai ki ai, ne talahau fakamatafeiga mai e puhala tonu ka moumou ai a Papelonia. Ne talahau tuai he Tohi Tapu to tapaki he tau Metai e maaga, ti ko Kuresa ne takitaki e tau kautau ne o atu, mo e pakupaku ai e tau vailele ne puipui aki e maaga.—Isaia 13:17-19; 44:27–45:1.

Ne nakai talahau tuai he Tohi Tapu to malamalaega tukumalagi e tau motu oti po ke to galo tukulagi e tau tagata ne kautū ki ai. Ke he taha faahi, he talahau tuai to moumou he tau Papelonia a Ierusalema, ne pehē e Atua to liu e maaga ia ke fakafoou, pete ko e matafakatufono ha Papelonia ke nakai fakatoka ha tagata ne uta fakapaea. (Ieremia 24:4-7; 29:10; 30:18, 19) Kua fakamooli ai e mena nei, ti matutaki e tau hologa he tau Iutaia ke momoui ke hoko mai ke he vahā nei ko e tau tagata kehe.

Taha mena foki, ne talahau tuai e Iehova to fakaotioti a Aikupito ko e pule malolō he lalolagi ka e he “mole ia ti liu kakai ai a ia tuga he vahā fakamua.” Fai magaaho, ko e pule malolō nei i tuai nei to ‘eke mo kautu fakateaga.’ (Ieremia 46:25, 26; Esekielu 29:14, 15) Ne fakamooli foki e mena nei. Lafi ki ai, ne talahau tuai e Iehova to moumou a Heleni ko e pule malolō he lalolagi, ka e nakai pehē a ia to malamalaega tukumalagi e motu nei. Ko e heigoa ne ako e tautolu mai he moumouaga he tau kautu ne talahau tuai e Iehova ke fakamahaikava, mo e falu motu ne hao ha kua nakai la talahau e Iehova e fakamahaikava ha lautolu? Kua ha ha he Kupu he Atua e tau perofetaaga mooli ne tonutika.

Tau Fakamatafeiga Ofoofogia

Tuga ne totoku i luga, ne foaki e Iehova e tau tala fakamatafeiga loga hagaao ke he puhala ka veli ai a Papelonia. Pihia foki, he talahau tuai e veliaga ha Turo, ne pehē e tohi a Esekielu ko e tau maka, tau akau, mo e tau efuefu ha Turo to tolo ki “loto he tahi.” (Esekielu 26:4, 5, 12) Ne fakamooli e perofetaaga nei he 332 F.V.N. magaaho ne takitaki e Alesana ne Mua e kau haana ke fakaaoga e tau koloa malona he maaga lahi ne tapaki ke ati hake aki e hala ke he aelani ha Turo, ne moumou foki he mogoia.

Ko e perofetaaga ne fakamau he Tanielu 8:5-8, 21, 22 mo e 11:3, 4 ne tala fakamatafeiga foki hagaao ke he “patuiki a Iavana [Heleni]” ne malolō lahi. Ko e patuiki nei to utakehe mai he tuaga tokoluga he pule haana, ti vevehe fā e kautu ka e nakai age ke he tau holoaga haana. He molea e 200 tau he fakamau e perofetaaga nei, ne eke a Alesana ne Mua mo patuiki malolō lahi ia. Ne talamai he fakamauaga tala tuai ki a tautolu ne utakehe a ia he mate tuai ti ko e kautu haana kua fakahiku ke vevehe ke he tau iki tokofā haana—nakai ke he tau hologa haana.

Ne talahau he tau tagata tuhituhi kua liga fakamau hifo e perofetaaga nei he mole e tutupu e tau mena ia. Ka e, liu foki la onoono ke he fakamauaga ne totoku i luga he tohi a Tanielu. He onoono ki ai mai he tuaga fakaperofeta, kua moolioli e tau vala tala matafeiga. Ka e he onoono ki ai ko e perofetaaga fakatupua he fakamauaga tuai, kua nakai kia tuga ke fai mena maaliali ne toe he tau vala tala matafeiga? Kaeke ke lali e tagata fakavai ne moui he mole atu a Alesana ke fakafiafia e tau tagata totou aki e perofetaaga nakai mooli, ko e ha mogoia ne nakai tohi hifo e ia e manatu nei he mole agataha e mate a Alesana, ne lali e tau tama taane tokoua haana ke fakatū e tuaga patuiki ha laua ka kua kelipopo ni he magaaho fakamui? Ko e ha ne nakai totoku e ia to mole e tau hogofulu tau ato fakatū he tau iki tokofā e tuaga patuiki ha lautolu ke he tau faahi kehekehe he kautu ha Alesana? Taha mena foki, ko e ha ne nakai totoku e ia e tau higoa he tau patuiki ne mua mo e tau iki tokofā haana?

Ko e talahauaga ne pehē kua tohia e perofetaaga he Tohi Tapu he mole e tutupu e tau mena ia ko e tau tala tuahā noa ne kua leva tigahau e talahau ka kua nakai fai fakamooliaga mai ia lautolu ne fitā he fifili kua nakai maeke ke talahau tuai e vahā anoiha ato taute e lautolu e kumikumiaga ke he tau mena tutupu ia. Ha kua nakai mafai a lautolu ke talia ko e Tohi Tapu ko e Kupu he Atua, ne fakaohooho mogoia a lautolu ke fakamaama e tau mena oti mai he onoonoaga fakatagata. Mohā ia, ne omoomoi fakapulotu he Atua e tau vala tala fakaperofeta kua lata ke fakamooli aki ko ia e punaaga he tau perofetaaga he Tohi Tapu.a

Maeke he perofetaaga he Tohi Tapu ke atihake e tua haau ka fakaatā e koe taha magaaho ke manamanatu fakahokulo ke he tau perofetaaga pauaki mo e tau fakamooliaga ha lautolu. Ko e ha he taute e kumikumiaga ke he tau perofetaaga he Tohi Tapu? Ko e tau fakafonua he lau tohi 343 ke he 346 he tohi “All Scripture Is Inspired of God and Beneficial” ka lagomatai a koe ke he mena nei.b Ka muitua a koe ke he lagomataiaga nei, kia taute ā e matagahua nei mo e foliaga ke atihake aki e tua haau. Kia nakai totou fakaaveave e vala tala ke oti. Ka e lata ke manamanatu fakaaue ke he moolioli nei ko e tau mena oti ne talahau tuai e Iehova kua fakamooli mo e tonutika.

[Tau Matahui Tala]

[Puha/Fakatino he lau 24]

TAU MATAPATU FAKAAKOAGA MA E MOUI

Hanei e taha manatu ke manamanatu ki ai. Ko e Atua ne talahau tonutika tuai e tū hake mo e veli he tau pule malolō he lalolagi ko e Punaaga foki he tau matapatu fakaakoaga he Tohi Tapu ma e moui. Ko e falu anei he tau mena ia:

To helehele e koe e tau mena ne gana koe.—Kalatia 6:7.

Kua mua atu e monuina po ke fiafia, he foaki atu ke he talia mai.—Gahua 20:35.

Kua moua hokoia e fiafia ka fakamakona e tau mena fakaagaaga.—Mataio 5:3, NW.

Kaeke ke fakagahuahua e koe e tau matapatu fakaakoaga nei ke he moui haau, maeke ia koe ke mauokafua to tupu mooli ki a koe.

[Tau Fakatino he lau 22]

Ne talahau tuai he Kupu he Atua e fakaotiaga tukulagi ma e tau kautu nei . . .

ETOMA

PAPELONIA

. . . ka e nakai ko lautolu nei

HELENI

AIKUPITO

[Credit Lines]

Pictorial Archive (Near Eastern History) Est.

WHO photo by Edouard Boubat

[Tau Fakatino he lau 23]

Alesana ne Mua