Takitaki he Tau Leveki—Ko e Leveki he Fakapotopotoaga
1 Ke fekafekau ko e leveki he fakapotopotoaga ko e matagahua mamafa. (Gahua 20:28; 1 Timo. 3:1) Ko e fakamua anei he tau vala he tau vala tala ka fakatokatoka mai e tau gahua kehekehe he tau motua Kerisiano ke maeke ia tautolu oti ke fakaaue ke he gahua aoga kua taute e lautolu ma tautolu.
2 Kua kotofa he Sosaiete e leveki he fakapotopotoaga ke fekafekau mo e nakai fafati magaaho. Ha kua takitaki he leveki he fakapotopotoaga e tau mena, kua lagomatai he mena nei e tau motua ke mataala ke he tau matagahua kotofa ha lautolu. (Our Ministry, lau 42) Ko e heigoa kua fakakite mai he mena nei?
3 Kua moua he leveki he fakapotopotoaga e tohi he fakapotopotoaga mo e age fakamafiti ke he tohikupu ke taute. He tauteute ma e tau feleveiaaga he tau motua, kua moua he leveki he fakapotopotoaga e tau lagomataiaga kua lata ke tututala mo e tohi e manatu fono. Kua eke foki a ia mo takitaki fono he tau feleveiaaga he tau motua. Ka taute e tau fifiliaga, kua kitia e ia ki ai kua muitua ki ai. Kua leveki e ia e tauteuteaga he Feleveiaaga Fekafekau mo e fakatokatoka he tau lauga he toloaga. Kua talia oti e ia e tau fakailoaaga ne taute ke he fakapotopotoaga, fakamoli e totogiaga he tau fakamoleaga tupe kua lata ki ai, mo e kikite ke he tiviaga tolu mahina he fahi tupe he fakapotopotoaga.
4 Ko e takitaki fono, kua takitaki he leveki he fakapotopotoaga e gahua he Komiti Fekafekau he Fakapotopotoaga. Ka ole e tagata fakaako Tohi Tapu mo tagata fakailoa nakai la papatiso po ke manako e tagata fakailoa nakai la papatiso ke papatiso, kua fakatokatoka he leveki he fakapotopotoaga ma e tau motua ke feleveia mo ia. Kua takitaki foki he leveki he fakapotopotoaga e tauteuteaga ma e ahi mai he leveki takaiaga ke maeke he fakapotopotoaga ke aoga katoa mai he tau gahua he fahi tapu pauaki ia.
5 Kua loga mo e kehekehe e tau gahua he leveki he fakapotopotoaga. He fakafita fakatokolalo a ia ke he hana tau matagahua “kua eke tuai mo mena fakamakutu,” kia lata ia tautolu oti ke taute e vala ha tautolu he fakalataha mo e tau motua. (Roma 12:8) Ka “omaoma” a tautolu mo e “fifitaki” ki a lautolu kua takitaki a tautolu, maeke ia lautolu ke taute e tau gahua ha lautolu mo e tuaga kua lahi atu e olioli moli.—Hepe. 13:17.