Fakakite he Mailoga e Matapatu Fakaakoaga he Motua

KO E feoaki mo lautolu kua mahani kelea kua kelea ai e tau mahani mitaki. Kua helehele e koe e mena ne gana e koe. (1 Korinito 15:33; Kalatia 6:7) Pete he fakatino po ke fakaagaga, kua eke e tau talahauaga tonu takitaha mo fakataiaga he fakaveaga moli​—ko e matapatu fakaakoaga​—mo e igatia ke foaki e fakaveaga ma e tau matafakatufono. Ko e tau matafakatufono, he mogoia, liga nakai tumau, mo e kua eke ni ke tutonu. Ko e tau matapatu fakaakoaga, ke he taha fahi, kua laulahi, mo e tumau tukulagi a lautolu. Ti, kua fakamafana he Kupu he Atua a tautolu ke manamanatu ke he tau matapatu fakaakoaga ke he mena kua lata.

Ko e matapatu fakaakoaga ne fakakakano mai he Webster’s Third New International Dictionary ko e “moli he tau mena oti po ke fakaveaga: ko e matafakatufono katoatoa mo e fakaveaga, taofiaga, po ke manatuaga ne fakave ki ai falu mena po ke ne moua mai ai e falu a mena.” Ke fakatai ki ai, liga tala age taha tagata ke he tama e matafakatufono, “Aua neke aamo e koe e umu.” Ka e ko e talahauaga tonu ke he tagata lahi, lata ni ke pehe “Na vela e umu.” Kia mailoga ko e vala fakamui ko e fakaveaga he talahauaga tonu. Ha kua hataki ai e mena ka taute he taha tagata​—ke kai tunu, tao kai, po ke tamate e umu​—kua eke ai mo matapatu fakaakoaga.

Ko e tau matapatu fakaakoaga moli ne mua, ko e tau mena fakaagaga; kua hataki ai ha tautolu a tapuaki ke he Atua mo e ha tautolu a fiafia. Ka ko e falu, kua fehola mai he gahua kua lata ke manamanatu ke he tau matapatu fakaakoaga. Kua loto ni a lautolu ke he hufia mitaki he matafakatufono tote ka fehagai ai mo e fifiliaga. Ko e mena nakai pulotu anei mo e kua nakai tatai mo e tau fakafifitakiaga ne fakatoka he tau tagata fakamoli i tuai he vaha Tohi Tapu.​—Roma 15:4.

Tau Tagata he Matapatu Fakaakoaga Mahani Atua

He tau tagata nakai mitaki katoatoa, kua ui a Apelu ko e tagata fakamuaaki he matapatu fakaakoaga mahani Atua. Tuga kua lahi tuai e manamanatu hana ke he maveheaga hagaao ke he “tega” mo e mailoga, ke fakamagalo mai he hala kua putoia ai e poa he toto. (Kenese 3:15, NW) Ati poa e ia ke he Atua e “tau punua uluaki he hana fuifui mamoe.” Ko e tau kupu “mo e tau mena gako i ai” ne fakakite kua tuku age e Apelu hana tau mena mitaki ue atu ki a Iehova. Ka e, to molea la e ua afe he tau tau he mole e mate a Apelu to tohi fakamatafeiga he Atua e tau poakiaga hagaao ke he tau poa. Kehe mai he tagata matakutaku Atua he matapatu fakaakoaga ko Apelu, ko e hana matakainaga ko Kaino kua fekehekeheaki ke foaki e poa ke he Atua. Ka ko e hana mahani kua nakai lata ke nava ki ai, kua fai mena hagaao ke he hana poa ne fakakite e loto nakai ha i ai e matapatu fakaakoaga.​—Kenese 4:3-5.

Ko Noa foki e tagata he matapatu fakaakoaga mahani Atua. Kua fakakite he tau fakamauaga he Tohi Tapu na poaki fakatonu he Atua a ia ke ta e vaka, ka e kua nakai totou e tautolu ha poakiaga ki a ia ke fakamatala ke he falu. Pete ia, kua ui a Noa “ko e ogo he tututonu.” (2 Peteru 2:5) Pete ni kua tuga e fekau he Atua a Noa ke fakamatala, kua omoi moli foki a ia ke taute ai ha ko e hana loto ke he matapatu fakaakoaga mo e hana a fakaalofa ke he tau katofia. Ha kua momoui a tautolu he tau vaha tuga ha Noa, kia fifitaki e tautolu hana mahani mitaki mo e fakafifitakiaga.

Nakai tuga e tau akoako he hana vaha, ne fakaako e Iesu e tau tagata ke manamanatu ke he tau matapatu fakaakoaga. Ko e mena ke fifitaki ki ai hana a Lauga he Mouga. Ko e tau puhala oti kua haga atu ke he matapatu fakaakoaga. (Mataio, tau veveheaga 5-7) Ne fakaako e Iesu ke he puhala nei kakano, ke tuga a Apelu mo Noa ne fakamua ia ia, ne iloa moli e ia e Atua. Pihia foki he vaha tote, ne fakamatalahi e ia e fakaveaga moli: “Nakai ko e tau mena kai hokoia . . . ka ko e tau mena oti ne fakato mai he fofoga he Atua ke moui ai e tagata.” (Teutaronome 8:3; Luka 2:41-47) E, ko e kei ke eke mo tagata he matapatu fakaakoaga mahani Atua ko e iloa moli a Iehova, tau mena loto mo e nakai loto a ia ki ai, mo e hana tau fioiaaga. Ka eke e tau fakaveaga nei hagaao ke he Atua ke hataki e tau momoui ha tautolu, kua tuga ai ke eke mo tau matapatu fakaakoaga gahuahua.​—Ieremia 22:16; Heperu 4:12.

Tau Matapatu Fakaakoaga mo e Loto

Kua maeke ke omaoma fakatuatua ke he matafakatufono, liga he matakutaku neke fakahala he nakai omaoma. Ka e, ke fakatatai atu ke he matapatu fakaakoaga, ka uta kehe e mahani ia, ha ko e mena ka takitaki he tau matapatu fakaakoaga kua lata pauaki ni ke omaoma mai he loto. Kia onoono atu ki a Iosefa, tuga a Apelu mo Noa, ne moui ato fakatu e maveheaga he Matafakatufono faka-Mose. He magaaho ne lali e hoana ha Potifara ke fakataki a ia, ne tali age a Iosefa: “To maeke fefe ia au ke eke e mena kelea lahi ia mo e hala au ke he Atua?” E, kua iloa tuai e Iosefa e matapatu fakaakoaga ko e “tino taha” e tane mo e hoana.​—Kenese 2:24; 39:9.

He vaha nei kua gati e lalolagi he tau matapatu fakaakoaga tututonu. Kua kai lotokai ai ke he vale mo e mahani kelea he fakatane mo e fakafifine. Ko e hagahaga kelea anei neke kamatamata e Kerisiano ke katikati, liga fakagalo, ke he tau mena kai nakai huhua mitaki​—ko e tau kifaga, tau vitio, po ke tau tohi. Kua mitaki ha mogoia, ka holia e tautolu e kelea ke tuga a Iosefa ha ko e matapatu fakaakoaga, he liu manatu to fakahao e Iehova a lautolu hokoia ne mahani fakamoli he ‘matematekelea lahi’ hane hau. (Mataio 24:21) E, kua mua ni ke he puhala fakatagata ni ha tautolu, nakai fakatata, ne fakakite ko e tau tagata fefe moli a tautolu i loto.​—Salamo 11:4; Tau Fakatai 15:3.

Ti, kaeke ke takitaki he tau matapatu fakaakoaga he Tohi Tapu a tautolu, to nakai kumi e tautolu e tau mena ne manatu ke kelea he tau matafakatufono he Atua; po ke lali a tautolu ke kitia ko e molea fefe e mamao ha tautolu ke taute taha mena ka e nakai moumou e tautolu e taha matafakatufono. Ko e tau manamanatuaga ia kua moumou a koe ni; to fakahukia ai a tautolu he fakaotiaga.

Kia Kumikumi ki Tua he Matafakatufono

Moli ni, kua feaki he matafakatufono e matagahua aoga he moui he Kerisiano. Kua tuga e tau leoleo ne lagomatai ke puipui a tautolu, mo e he tau fakaveaga ha lautolu ko e loga he tau matapatu fakaakoaga aoga. Ko e kaumahala ke iloa e tau matapatu fakaakoaga nei ka liga fakagalo ha tautolu a fiafia lahi ke he tau matafakatufono pihia ni. Ne fakatata he motu a Isaraela i tuai e mena nei.

Ne age he Atua e Tau Poakiaga Hogofulu ki a Isaraela, ko e fakamuaaki kua fakatapu ke tapuaki ke he ha atua ka ko Iehova ni. Na tufuga e Iehova e tau mena oti ko e fakaveaga moli a ia i tua he matafakatufono nei. (Esoto 20:3-5) Ka e moui nakai e motu ke he matapatu fakaakoaga nei? Ne tali ni e Iehova: “ ‘Ko e matua tane ha mautolu a koe’ [he talahau he tau Isaraela] ke he patu akau mo e [tagi a lautolu] ‘Matua Fifine’ ke he maka. Ka e kia au [Iehova] kua haga kehe ha lautolu a tau tua mo e fuluhi ha lautolu tau mata mai ia au.” (Ieremia 2:27, The New English Bible) Ko e uluuka mo e kelea nakai fai matapatu fakaakoaga ha a ia! Mo e kua fakahukia ai e loto a Iehova!​—Salamo 78:40, 41; Isaia 63:9, 10.

Kua fai matafakatufono foki e tau Kerisiano ne age he Atua. Ke fakatai ki ai, kua eke a lautolu ke kalo mai he tapuaki tupua, mahani kelea he fakatane mo e fifine, mo e fakaaoga kelea he toto. (Gahua 15:28, 29) Ka manamanatu a koe ki ai, kua mataala a tautolu ke he tau matapatu fakaakoaga hokulo, tuga anei: kua lata a Iehova mo e fakamoliaga katoatoa ha tautolu; kia fakamoli a tautolu ke he hoa ha tautolu; mo e ko Iehova ko e ha tautolu a Foaki-Moui. (Kenese 2:24; Esoto 20:5; Salamo 36:9) Kaeke ke fioia mo e loto fakaaue fakahokulo a tautolu ke he tau matapatu fakaakoaga i tua he tau fakatonuaga nei, kua kitia e tautolu ko e tau mena ke mitaki ai ni a tautolu. (Isaia 48:17) Kia tautolu kua ‘nakai mamafa e tau poaki’ he Atua.​—1 Ioane 5:3.

Kua fakaheu he tau Isaraela he taha vaha e tau poaki he Atua, he vaha a Iesu ko e ha lautolu a “tau ekekafo he matafakatufono,” ko e tau tohikupu, kua fakato atu ke he taha fahi foki. Kua taute e lautolu e mouga he tau matafakatufono ikiiki mo e tau mahani toka tuai ne fakaalaia aki e tapuakiaga mea mo e tanumia ai e tau matapatu fakaakoaga mahani Atua. (Mataio 23:2, NEB) Kua mahala e tau tagata ke he kaumahala, fakaatukehe, po ke fakatupua. (Mataio 15:3-9) Mo e loga he tau matafakatufono ikiiki ne taute he tagata kua kelea muitui. He magaaho ke fakamalolo e tagata lima mate, ne huhu age a Iesu ke he tau Farasaio ne ha ha i ai: “Kua lata nakai mo e sapati e mahani mitaki?” Kua talahau fakalahi he fakanonoiki ha lautolu nakai, ati ‘hukia e finagalo a Iesu ha kua mao ha lautolu a tau loto.’ (Mareko 3:1-6) Liga to lagomatai he tau Farasaio e manu fao ne hola po ke pakia (ko e mouaaga he tupe) he Sapati ka e nakai mafai ke he tagata tane po ke fifine​—ka e taute ni ka hoko ai e moui mo e mate. Ti nakai taumaleku ai, kua lavelave mahaki a lautolu ke he tau matafakatufono ikiiki he tagata mo e tau fakataitaiaga noa ti tuga e tau lo ne fakamafiti fano ke vali, ka e kaumahala a lautolu ke kitia e fakatino katoa​—ko e tau matapatu fakaakoaga faka-Atua.​—Mataio 23:23, 24.

Pihia foki e tau tama, ka fakamoli ha lautolu a tau loto, kua fakaheke atu ai ki a Iehova ha ko e loto fakaaue ha lautolu ma e tau matapatu fakatufono he Tohi Tapu. Ne huhu e faiaoga ha Rebecca ne hogofulumatolu e tau ke he vahega ko hai ka pele tupe. Ne laulahi ne talahau to nakai pihia a lautolu. Ka e, he magaaho ne totoku hagaao ke he tau mena kehekehe, ne talahau fakauaua oti ke pele tupe ke he taha puhala ni, ka e nakai pihia a Rebecca. Ne huhu e faiaoga ki a Rebecca ko e maeke nakai ia ia ke fakatau e tiketi rafolo ma e fakaaogaaga mitaki. Ne tala age a Rebecca nakai mo e fakakite e tau fakamaamaaga mai he Tohi Tapu ko e taha puhala a ia he pele tupe, ka taute ai. Ati tala age e faiaoga hana ke he vahega katoa: ‘Kua mailoga e au, ko Rebecca ni he na e ne ha ha ai e mena ne ui e au ko e “tau matapatu fakaakoaga” ke he kakano moli he kupu.’ E, kua maeke ia Rebecca ke tali fakamukamuka age: “Kua nakai fakaata he lotu haku,” ka e kua manamanatu fakahokulo a ia mai he naia ni; kua maeke ai a ia ke tali ko e ha ne hepe ai e pele tupe mo e ko e ha ne nakai talia a ia ke fai vala i ai.

Kua fakakite he tau fakafifitakiaga tuga ha Apelu, Noa, Iosefa, mo Iesu ki a tautolu e puhala ke lagomatai a tautolu he fakaaoga ha tautolu a “loto manamanatu” mo e “mena kua lata ke eke” ke tapuaki ke he Atua. (Tau Fakatai 2:11; Roma 12:1) Kua mitaki he tau momotua Kerisiano ke fifitaki a Iesu he ‘leveki e lautolu e fuifui mamoe he Atua ha ia lautolu.’ (1 Peteru 5:2) Tuga kua fakakite fakamitaki mai, ko e tau tagata ne loto ke he tau matapatu fakaakoaga mahani Atua ko lautolu ia ne tupu olaola i lalo he pule katoatoa a Iehova.​—Isaia 65:14.

To Fakafeleveia Nakai e Koe e Tagata Ahiahi?

He pihia foki he lalolagi matematekelea nei, kua maeke ia koe ke moua e fiafia lahi mai he iloilo moli he Tohi Tapu he Atua, hana Kautu, mo e hana finagalo homo ue atu ma e tau tagata oti. Kaeke kua manako a koe ke fakafeleveia mo e falu foki a fakamaamaaga po ke manako ke fai tagata ke ahi atu ke taute e fakaakoaga Tohi Tapu nakai fai totogi mo koe, fakamolemole tohi atu ke he Watch Tower, P.O. Box 142, Manurewa, New Zealand, po ke ke he kaina kua lata he lau tohi 2.