Tohi he Tohi Tapu Numera 62​—1 Ioane

Tagata Tohia: Aposetolo ko Ioane

Matakavi Tohia: Efeso, po ke tata ki ai

Katoatoa he Tohia: k. 98 V.N.

KO IOANE, ko e aposetolo fakahelehele ha Iesu Keriso, ne fiafia lahi ke he tututonu. Ne lagomatai he mena nei a ia ke iloa mitaki e manatu ha Iesu. Ti nakai ofo mogoia a tautolu ha kua kitia katoatoa e matakupu he fakaalofa he puhala tohi haana. Ka e nakai ko e tagata manamanatu hokoia a ia, ne hagaao a Iesu ki a ia ko e taha he ‘tau Tagata he Pakulagi [Poaneki].’ (Mare. 3:17) Ti ko e lalagoaga ke he kupu mooli mo e tututonu ati tohia e ia e tau tohi tolu haana, ha kua tupu ai e tiaki taofiaga ne talahau tuai he aposetolo ko Paulo. Kua latatonu mooli e tau tohi tolu ha Ioane, ha kua lagomatai ai ke fakamalolō e tau Kerisiano fakamua atu he totoko a lautolu ke he tau hagahaga kelea haana “kua mahani kelea.”—2 Tesa. 2:3, 4; 1 Ioa. 2:13, 14; 5:18, 19.

² He kitia mai he tau manatu ia, ko e tau tohi nei kua tohia he magahala fakamui he leva e oti e tau Evagelia ha Mataio mo Mareko—fakamui atu foki he tau tohi misionare ha Peteru mo Paulo. Ne hiki e tau magaaho. Kua nakai fai hagaaoaga ke he faka-Iutaia, ko e fakahagahaga kelea lahi ke he tau fakapotopotoaga ne fakatū laia; ti nakai fai kupu ne fatiaki fakahako mai he tau Tohiaga Tapu Heperu. He taha faahi, ne tutala a Ioane ke he “tau aho ainei ke fakahiku” mo e ke he fakakite mai he “tau anetikeriso tokologa.” (1 Ioa. 2:18) Ne hagaao a ia ke he tau tagata totou haana ke he tau kupu tuga e “haku fanau ikiiki na e” mo e hagaao ki a ia ni “ko e patu.” (1 Ioa. 2:1, 12, 13, 18, 28; 3:7, 18; 4:4; 5:21; 2 Ioa. 1; 3 Ioa. 1) Kua fakakite he tau mena oti nei ne liga tohia e tau tohi tolu nei haana he taha magaaho fakamui. Pihia foki e 1 Ioane 1:3, 4 kua hihiga ke fakakite ko e Evagelia ha Ioane ne tohia liga he magaaho taha ia. Kua laulahi ke talitonu ki ai ko e tau tohi tolu ha Ioane ne fakakatoatoa ai he kavi 98 V.N., nakai leva ti mate e aposetolo, ti tohia ai he matakavi ko Efeso.

³ Ne fakakite ko e tohi Fakamua Ioane kua tohia mooli he aposetolo ko Ioane ha kua tatai e matahiku mo e Evagelia ke fāaki, ne nakai taumaleku ko Ioane ne tohia. Ma e fakatai, ne hafagi e ia e tohi he fakamaama ko ia ko e tagata ne kitia mata e “Loko he moui; . . . [ko] e moui tukulagi, ko e moui ia ha he Matua, ka kua fakakite mai kia mautolu,” ko e tau talahauaga ofoofogia ne tatai mo e tau kupu hafagi he Evagelia ha Ioane. Ko e tonutika kua fakamooli ki ai he Muratorian Fragment mo e tau tagata tohia fakamua atu tuga a Irenaeus, Polycarp, mo Papias, ko lautolu oti he senetenari ke uaaki V.N.a Hagaao ki a Eusebius (k. 260-k. 340 V.N.), ne nakai fakauaua ke he tonutika he tohi Fakamua Ioane.b Pete ia, kia mailoga ko e falu fakaliliuaga tuai ne kua lafi ke he veveheaga 5 e tau kupu nei he matahiku he kupu 7 mo e kamataaga he kupu 8: “He lagi, ko e Matua, ko e Loko, mo e ko e Agaga Tapu; kua taha a lautolu tokotolu nei. Ti kua tolu ne talahau mai ke he lalolagi katoa.” (King James Version) Ka kua nakai moua e vala nei he ha menusikuripi faka-Heleni fakamua atu ti kua kitia maaliali kua lalafi ai ke omoi e taofiaga he Tolu Taha. Laulahi he tau fakaliliuaga foou, he Katolika mo e Porotesano, kua nakai pihia e vala lahi he kupu ia.—1 Ioa. 1:1, 2.c

⁴ Ne tohi e Ioane ke puipui haana “tau matakainaga,” ko e haana “fanau,” mai he tau fakaakoaga hehē he “tau anetikeriso tokologa” ne kua ō kehe mai ia lautolu ti kua lali ke toho kehe a lautolu mai he kupu mooli. (2:7, 18) Ko e tau anetikeriso tiaki taofiaga nei ne liga fakaohooho he fakaakoaga pulotu faka-Heleni, putoia e fakaakoaga Nosotiki fakamua atu, ne totoku e lautolu ia ne tutaki ki ai kua moua e lautolu e iloilo mana pauaki mai he Atua.d He totoko mauokafua ke he tiaki taofiaga, ne tutala lahi a Ioane ke he tolu e matakupu: agahala, fakaalofa, mo e anetikeriso. Ko e talahauaga haana ke he agahala, mo e lalago e poa ha Iesu ma e tau agahala, kua fakakite ko e tau anetikeriso nei kua talahau fia tututonu ai kua nakai fai agahala a lautolu ti kua nakai lata mo e poa lukutoto ha Iesu. Ko e “iloa” po ke, iloilo fakatokoluga nei ne taute a lautolu ke lotokai mo e nakai fai fakaalofa, ko e tuaga ne fakatapakupaku e Ioane he peehi tumau e ia e fakaalofa faka-Kerisiano mooli. Lafi ki ai, kua totoko mooli a Ioane ke he manatu fakavai he fakamaama e ia ko Iesu ko e Keriso, nukua moui fakamua a ia ato eke mo tagata ko e Tama he Atua ke foaki e fakamouiaga ma e tau tagata kua tua. (1:7-10; 2:1, 2; 4:16-21; 2:22; 1:1, 2; 4:2, 3, 14, 15) Ne fakahigoa fakamahino e Ioane e tau faiaoga fakavai nei ko e “tau anetikeriso,” ti age e ia e tau puhala kehekehe ke maeke ke kitia aki e tau fanau he Atua mo e tau fanau he Tiapolo.—2:18, 22; 4:3.

⁵ Ha kua nakai fai fakapotopotoaga ne fakamataulu pauaki ki ai, ne maaliali ai kua taute e tohi ma e fakatokatokaaga Kerisiano katoa. He nakai fai kupu fakaalofa atu mo e kupu hafagi he fakahikuaga kua fakakite foki e mena nei. Ne kua fakamaama he falu ko e tohi nei ko e tala ka e nakai ko e tohi. Ko e fakaaogaaga he kupu “mutolu” he tohi katoa kua fakakite kua hagaao e tau kupu he tagata tohia ke he matakau ka e nakai ke he tagata tokotaha.

KAKANO NE AOGA AI

¹¹ Tuga ni he tau tau fakahiku he senetenari fakamua he Vahā Nei, ti pihia foki he vahā ha tautolu kua ha ha e “tau anetikeriso tokologa” ne kua lata ke hataki e tau Kerisiano mooli. Kua latatonu e tau Kerisiano mooli nei ke totō mau ke he ‘poaki kua fanogonogo ki ai a lautolu tali mai he kamataaga, kia feofanaki a lautolu,’ ti tumau fakalataha ke he Atua mo e fakaakoaga mooli, he fakamalolo ke fakakite, po ke talahau atu e tututonu. (2:18; 3:11; 2:27-29) Mua atu e aoga foki ko e hatakiaga ke he “manako lahi he tino, mo e manako lahi he tau mata, katoa mo e tau mena he mouiaga nai ke hula ki ai,” ko e tau koloa mo e tau mahani kelea he lalolagi ne kua lauia e tokologa ia lautolu ne totoku ko e tau Kerisiano. To fakavihia he tau Kerisiano mooli e lalolagi mo e haana tau manako lahi, he iloa “ko e tagata kua eke e finagalo he Atua to tumau a ia tukulagi.” He magahala nei he manako lahi he lalolagi, tau vahega fakalotu, mo e vihiatia, kua aoga mooli ke fakaako e finagalo he Atua ne puhala ai he tau Tohiaga Tapu omoomoi mo e taute e finagalo ia!—2:15-17.

¹² Kua taute ke aoga ki a tautolu ati fakamaama fakamahino he tohi Fakamua Ioane e kehekehe he maama ne puna mai he Matua mo e pouligia ne fakahehe e kupu mooli ne mai ia ia ne mahani kelea, mo e he kehekehe he tau fakaakoaga foaki moui he Atua mo e tau pikopiko fakavaia he anetikeriso, ke he vahāloto he fakaalofa ne kaputia e fakapotopotoaga katoatoa ha lautolu ne tumau fakalataha ke he Matua pihia foki mo e Tama mo e vihiatia ke kelipopo tagata tuga ha Kaino ne kua ha ha i loto ia lautolu ne ‘o atu ia tautolu, kia fakakite ai, nakai ko e tau tagata ha tautolu a lautolu oti kana.’ (2:19; 1:5-7; 2:8-11, 22-25; 3:23, 24, 11, 12) He moua e loto fakaaue nei, kua lata a tautolu ke manako lahi ke “kautu ai ke he lalolagi.” Ti liga taute fēfē e tautolu e mena nei? He moua e tua malolō mo e “fakaalofa ke he Atua,” ne kua kakano ke omaoma ke he tau poakiaga haana.—5:3, 4.

¹³ “Ko e fakaalofa ke he Atua”—ko e agaaga fakaohooho mitaki ha ia anei ne fakakite he tohi katoa! He veveheaga 2 ne iloa e tautolu e fekehekeheaki lahi he fakaalofa he lalolagi mo e fakaalofa he Matua. Fakahiku ne kua fakamaama mai ki a tautolu ko e “Atua ko e fakaalofa.” (4:8, 16) Ti ko e fakaalofa aoga ha ia! Ne moua mai e talahauaga homo lahi he fakafano mai he Matua e ‘Tama ko e Fakamoui he lalolagi.’ (4:14) Kua lata e mena nei ke fakalagalaga ke he tau loto ha tautolu e loto fakaaue, fakaalofa nakai matakutaku, ke fakatauō mo e tau kupu he aposetolo: “Kua fakaalofa a tautolu, ha ko e mena ne fakamua mai hana fakaalofa kia tautolu.” (4:19) Kua lata e fakaalofa ha tautolu ke tatai mo e fakaalofa ia he Matua mo e Tama—ko e fakaalofa aoga mo e foaki noa. Tuga ni he foaki e Iesu e moui haana ma tautolu, ti “lata foki kia tautolu ke tuku atu e tau moui ha tautolu ke hukui aki e tau matakainaga,” e, ke hafagi e gutuhala he fakaalofa hofihofi ha tautolu ke maeke ke fakaalofa ke he tau matakainaga ha tautolu, nakai ni ke he tau kupu, ka e ke he “mahani mo e fakamoli.” (3:16-18) Ne fakakite fakamaaliali mai he tohi a Ioane, ko e fakaalofa nei ne fakapiki mo e iloilo mooli he Atua, ka pipi a lautolu kua ō mo e Atua ke he pipiaga tumau ne nakai vevehe e fakalataha ke he Matua mo e Tama. (2:5, 6) Ne talahau ke he tau hakega he Kautu i loto he pipiaga monuina nei he fakaalofa ne pehē a Ioane: “Ha ia ia kua fakamoli a tautolu, ha he Tama hana ko Iesu Keriso. Ko e Atua moli hanā, mo e moui tukulagi.”—5:20.

[Tau Matahui Tala]