“Kia Au Atu Ai he Lalilali a Mutolu”
1 He magaaho ne tukulele e tautolu a tautolu ki a Iehova, ne mavehe a tautolu ke foaki e malolo katoatoa ha tautolu ki a ia. Latatonu ai, ne fakamafana he aposetolo ko Peteru e tau Kerisiano he senetenari fakamua ke au atu he lalilali a lautolu ke mailoga mitaki e tuaga ha lautolu ki a Iehova. (2 Pete. 1:10) Manako moli a tautolu ke au atu e lalilali ha tautolu ke fakafiafia a Iehova he fekafekau ki a ia he vaha nei. Ko e heigoa ne putoia he mena nei? He hokulo e fakafetuiaga ha tautolu mo Iehova mo e manamanatu lahi ke he tau mena oti ne taute e ia ma tautolu, kua omoi e tau loto ha tautolu ke taute tumau e mena kua fahia a tautolu he hana fekafekauaga. Manako a tautolu ke fakatolomaki e aoga mo e ka maeke, fakalaulahi e magaaho he fekafekauaga ha tautolu.—Sala. 34:8; 2 Timo. 2:15.
2 Ko e matakainaga fuata tane ne manako ke fakalahi e gahua he fekafekauaga ne moua ko e fakaako tumau ke he Kupu he Atua ka fakahokulo hana loto fakaaue ma Iehova mo e fakatupu ia ia e fakamakai lahi. Kua omoomoi he mena nei a ia ke tohi ke gahua paionia. Ko e matakainaga fifine ne uka lahi ke tutala ke he tau tagata kehe ne fakaaoga falu fakataitaiaga he tohi Reasoning ti nakai leva ti kamata ke fiafia e kautu lahi he hana fekafekauaga. Kua maeke ia ia ke fakaako Tohi Tapu mo e hoa mau ne talia e kupu moli.
3 Fiafia ke he Mena kua Taute e Koe: Ne moua he falu ia tautolu e tau tutuaga uka tuga e nakai malolo mitaki e tino, totokoaga he magafaoa, hoge, po ke favale mai he matakavi. Loga atu foki falu mena vihi kua mahani mau he tau aho fakahiku nei ka fakalavelave e fekafekauaga ha tautolu. (Luka 21:34, matahui tala NW; 2 Timo. 3:1) Kakano kia e mena nei kua kaumahala a tautolu mai he tukuleleaga ha tautolu ki a Iehova? Nakai kaeke ke fekafekau a tautolu ki a ia he lalilali atu a tautolu.
4 Nakai pulotu ke fakafili a tautolu ni he fakave ke he tau mena ne maeke he falu ke fakakatoatoa. Ka e, fakamafana he Tohi Tapu a tautolu ke “igatia mo e fakamoli hana ni a gahua.” He foaki katoatoa e tau momoui ha tautolu ke he mena kua maeke ia tautolu takitokotaha nukua fakafiafia a Iehova mo e foaki ki a tautolu e “mena ke hula ki ai.”—Kala. 6:4; Kolo. 3:23, 24.
5 Kia omaoma e tautolu e tau kupu ha Peteru ke ‘lalilali atu a tautolu ke moua he Atua a tautolu mo e monuina, kua nakai fai ila, mo e talahaua kelea.’ (2 Pete. 3:14) To foaki he agaga ia ki a tautolu e logonaaga haohao mitaki mo e to ta mai ki a tautolu e mafola he manamanatuaga nukua maeke ni ia Iehova ke foaki.—Sala. 4:8.