Ko e Gahua kua Lata mo e Fakatokolalo
1 Kua fakamafana he Kupu he Atua a tautolu ke “mahani totonu, aua neke taui atu e kelea ke he kelea . . . ka kia fakamonuina atu.” (1 Pete. 3:8, 9) Kua hagaao tonu e tomatomaaga ia ke he gahua fakamatala. Moli, ko e fekafekauaga Kerisiano kua eke mo kamatamata he ha tautolu a fakatokolalo.
2 Ko e fakatokolalo e mahani kua lagomatai a tautolu ke fakauka ke he tau tutuaga nakai mitaki. Ka fakamatala, kua feleveia a tautolu mo e tau tagata kehe ka e nakai uiina, he iloa to nakai tali totonu mai e falu. Ke fakatumau e fakamatala pete he taute pihia mai kua lata mo e fakatokolalo. He taha matakavi uka lahi pauaki, tokoua e paionia fifine ne o he taha gutuhala ke he taha gutuhala he tau aho oti ke he ua e tau ka e nakai moua taha ke tutala ki ai! Pete ia, ne fakauka a laua, ti ko e mogonei kua ua e fakapotopotoaga he matakavi ia.
3 Felauaki mo e Hemu: To lagomatai he fakatokolalo a tautolu ke fifitaki a Iesu ka nakai mahani totonu mai e falu. (1 Pete. 2:21-23) He taha kaina ne feleveia e matakainaga fifine mo e tau kupu ekefakakelea, fakamua mai he hoana ti ko e tane, ne poaki ki a ia ke fano kehe mai he kaina. Ne mamali e matakainaga fifine ti pehe nukua amanaki a ia ke tutala mo laua he taha magaaho foki. Kua nava lahi e hoa mau ke he mena nei ati fanogonogo a laua ke he taha Fakamoli ne fina atu mo e talia e uiina ke o atu ke he feleveiaaga he Fale he Kautu. Ko e matakainaga fifine ne vagahau fakakelea fakamua a laua ki ai ne feleveia atu ki a laua mo e fakalaulahi atu e fakamatala ki a laua. Maeke foki ia tautolu ke fakamolu hifo e loto mao ha lautolu he fakakite atu e ‘mahani molu mo e fakalilifu hokulo.’—1 Pete. 3:15; Fakatai 25:15.
4 Fakamamao he Fia Lahi: Ko e iloilo ha tautolu he Tohi Tapu kua nakai foaki ki a tautolu e fakaveaga ke onoono hifo ke he tau tagata po ke fakaaoga e tau kupu fakateaga ki a lautolu. (Ioane 7:49) Pete ia, kua fakatonu he Kupu he Atua a tautolu ke “aua neke eke fakakelea ke he taha.” (Tito 3:2) Ka holoilalo e tau loto ha tautolu, tuga ha Iesu, kua moua he falu e okiokihaga. (Mata. 11:28, 29) Ko e talahauaga holoilalo kua lafi ke he fulufuluola he fekau ha tautolu.
5 E, kua lagomatai he fakatokolalo a tautolu ke fakauka ke he matakavi uka. Maeke ke fakamolu e mao he tau loto ha lautolu, ti futiaki e falu ke he fekau he Kautu. Mua atu, kua fakafiafia a Iehova, ne “foaki mai e fakaalofa noa kia lautolu kua holoilalo.”—1 Pete. 5:5.