Loto Fakaaue ke he Fakaalofa Noa he Atua
1 Fakamua to eke mo Kerisiano, ne totoko vale e aposetolo ko Paulo ke he folafolaaga he faka-Kerisiano. Pete ia, ha kua mahani goagoa a ia, ne fakakite atu ki a ia e fakaalofa noa. Ne fakatata e Iehova e fakaalofa noa, ti age ki a Paulo e kotofaaga ke fakamatala. Ne tokiofa e ia e kotofaaga ia. (Gahua 26:9-18; 1 Timo. 1:12-14) Ko e loto fakaaue ma e fakaalofa noa ha Iehova ne omoi a Paulo ke foaki e ia a ia ke fakamoli hana feua.—2 Kori. 12:15.
2 Hagaao ke he fakaalofa noa he Atua, kua foaki mai foki ki a tautolu e feua. (2 Kori. 4:1) Tuga a Paulo, maeke ia tautolu ke fakatata e loto fakaaue ha tautolu ma e fakaalofa noa ne fakakite ki a tautolu he eketaha ke lagomatai e falu ke tupu ki mua fakaagaga. Ko e taha puhala ke taute e tautolu e mena nei ko e kamata mo e taute e tau fakaakoaga Tohi Tapu.
3 Kamata e Tau Fakaakoaga Tohi Tapu: Ko e puhala ke kamata e tau fakaakoaga Tohi Tapu ko e fakatu e tau fakaholoaga mekasini. He ahiahi tumau a tautolu ki a lautolu he fakaholoaga ha tautolu, kua iloa fakahaga e tautolu ha lautolu a tau kapaletu. Fakahiku ai, ko e vala tala he taha he tau mekasini kua eke mo kamataaga he taute e fakaakoaga Tohi Tapu he porosua Manako. He tau ahi atu fakamui, liga maeke ai ke matutaki e tau fakatutalaaga ke he porosua Manako ka foaki e tau mekasini ke he tagata he kaina.
4 Lata e Laliaga he Liogi: Ko e liogi ne matutaki mo e laliaga eketaha ka fakatolomaki e gahua fakamatala ha tautolu. Ko e matakainaga fifine paionia ne taha e fakaakoaga Tohi Tapu ne liogi ke fakamonuina e Iehova a ia ke loga atu. Ne fakalautatai a ia mo e tau liogi hana. Ne manamanatu fakahokulo a ia ke he fekafekauaga hana mo e mailoga kua nakai la foaki e ia e tau fakaakoaga Tohi Tapu he magaaho ka taute e tau liu ahi atu. Ne kamata a ia ke taute pihia ti nakai leva ti ua foki e fakaakoaga hana.
5 Ko e monuina ha ia ha tautolu ke fai vala he fakailoa “e tala mitaki he fakaalofa noa he Atua”! (Gahua 20:24) Kia omoi he loto fakaaue ma e fakaalofa noa he Atua a tautolu ke eketaha he lagomatai e falu ke aoga mai he fakaalofa noa ha Iehova.