Kua Fakatai Nakai e Koe e Fakamatala he Afiafi?
1 Moua e tautolu oti e fiafia he fua loga mai e tau gahua ha tautolu. Ke he taha fahi, ka nakai kitia e tautolu e tau fua mitaki, to liga eke e gahua mo mena ahumate mo e nakai fai fua. Ko e gahua malolo fai kakano kua palepale fakatagata, mo e ko e monuina. (Fakatatai Fakamatalaaga 3:10-13.) Maeke ia tautolu ke fakagahua e matapatu fakaakoaga nei ke he gahua fakamatala ha tautolu. Iloa e tautolu mai he o ha tautolu ke he taha gutuhala mo e taha gutuhala mo e maeke ke tutala ke he tau tagata hagaao ke he Tohi Tapu, kua liliu a tautolu ki kaina mo e hauhau fakaagaga. Ne logona e tautolu kua fai mena moli a tautolu kua taute.
2 Ke he loga he tau matakavi kua uka lahi ke moua e tau tagata i kaina he falu magaaho he aho. Fakakite mai he tau hokotaki ne loga e tau matakavi kua molea e 50 e pasene he tau tagata ne nakai nonofo i kaina he ahiahi a tautolu he mogo pogipogi he aho. Loga e fakapotopotoaga ne fehagai mo e lekua nei he fakatoka e tau fakaholoaga ma e fakamatala he afiafi, ti kua moua e lautolu e tau fua mitaki. Hokotaki mai he tau tagata fakailoa he ahiahi atu a lautolu he magaaho afiafi he aho, kua tokologa e tau tagata i kaina, mo e laulahi, kua fakahautoka mo e hihiga lahi ke fanogonogo ke he fekau he Kautu. Kua fakatai nakai e koe e fakamatala he afiafi he fonua hau?—Fakatatai Mareko 1:32-34.
3 Fakatokatoka he Tau Motua e Fakamatala he Afiafi: He falu matakavi kua lahi e lagomatai atu ke he feleveiaaga ma e gahua he fonua he pale la po ke afiafi. Lata ke manamanatu foki ke he tau tagata fakailoa fuata ne hili e aoga he magaaho pale la mo e tau tagata lalahi ne hili e tau gahua ha lautolu he magaaho afiafi. Ko e falu tagata fakailoa ne nakai maeke ke o atu ke he gahua he fonua he tau matahiku fahi tapu ne kua moua e fakamatala he afiafi he vaha tapu ko e puhala aoga ma lautolu ke fakalataha tumau ke he gahua fakamatala.
4 Kua kehekehe e tau gahua ne maeke ia koe ke fakalataha ki ai ka fakamatala he afiafi. Maeke ia koe ke fakamatala he taha fale ke he taha fale ke he tau mekasini po ke fakaaoga e tau tohi foaki he mahina. Kua mitaki e afiafi ke ahiahi atu ke he tau tagata ne nakai haia i kaina he magaaho ne ahiahi atu e tau tagata fakailoa he mogo pogipogi po ke he tau matahiku fahi tapu. Liga fai matakavi mitaki foki ma e fakamatala he puhala tu, he fakaata a koe ke feleveia mo e tau tagata ne o mai ke he tau kaina he hili gahua. Tokologa ne moua e afiafi ko e magaaho mitaki lahi ke taute e tau liu ahi atu ki a lautolu ne kua fakakite e fiafia.
5 Kia Mataala mo e Fakailoilo: Ko e falu matakavi kua liga hagahaga kelea ke o he afiafi mahegihegi po ke he po. Kua pulotu ai ke o takitokoua po ke matakau he tau puhalatu ne maama mitaki pihia foki ke ahiahi ni he tau kaina po ke tau fale lalahi ka iloa tonuhia kua haohao mitaki. Ka nokonoko a koe he gutuhala, tu he mena ke kitia, mo e talahau fakamahino ko hai a koe. Kia manamanatu. Ka kitia e koe kua nakai felauaki mitaki e magaaho ne ahiahi atu ai, tuga ka hane kai e magafaoa, ole ke liu ahi atu he taha magaaho foki. Fa mitaki lahi ke fakakaupa e fakamatala hau ke he tau tula fakaafiafi, ua ahiahi atu mule, he magaaho ka liga hane tauteute e tau tagata he kaina ke momohe he po.
6 Kua felauaki mitaki e tau afiafi loloa he vaha mafana ma e fakamatala he afiafi. He tuku atu e tautolu ke he Atua e “fekafekau ki a ia ke he aho mo e po,” to fakamonuina moli e Iehova ha tautolu a tau laliaga.—Fakakite. 7:15.