Maeke ia Tautolu ke Taute e Mena ne Ole e Iehova
1. Ko e heigoa e tau logonaaga kua taufetului a tautolu ki ai ke he tau magaaho, mo e ko e ha?
1 He talia e tau fakatufono mo e tau matapatu fakaakoaga ha Iehova ko e puhala mitaki lahi he moui he vaha nei, mo e kua lagomatai a tautolu ke fakatoka e fakaveaga mitaki ma e vaha tukulagi anoiha. (Sala. 19:7-11; 1 Timo. 6:19) Pete ia, kua peehi he lalolagi ha Satani a tautolu ke tupetupe lahi. Ko e tau tino nakai mitaki katoatoa ha tautolu kua lafi ke he paleko. He lali ke fakamoli e tau matagahua faka-Tohiaga Tapu ha tautolu, liga logona e tautolu e nakai fahia he falu magaaho. (Sala. 40:12; 55:1-8) Ti liga manamanatu foki a tautolu nukua maeke nakai ia tautolu ke taute e tau mena oti ne ole mai e Iehova ki a tautolu. He tau magaaho pihia, ko e heigoa kua maeke ke lagomatai a tautolu ke fakatumau e lagotatai fakaagaga?
2. Puhala fe kua fai manamanatuaga a Iehova ke he tau mena ne amanaki mai ia tautolu?
2 Nakai Mamafa ha Iehova a Tau Poakiaga: Nakai tuku mai e Iehova e tau ole ne uka ki a tautolu. Nakai mamafa hana tau poakiaga ka e mitaki ma tautolu ni. (Teu. 10:12, 13; 1 Ioa. 5:3) Ne mailoga e ia ha tautolu a tau lolelole fakatagata, ha ko e “kelekele ni a tautolu.” (Sala. 103:13, 14) Ne talia fakaalofa noa e Iehova e tau laliaga fakamalolo ha tautolu ke fekafekau ki a ia, pete kaeke fakakaupa e tau mena nei ha ko e ha tautolu a tau tutuaga. (Levi. 5:7, 11; Mare. 14:8) Kua uiina e ia a tautolu ke tuku age ki a ia ha tautolu a tau kavega, mo e fakamafana e ia ki a tautolu to taute e ia a tautolu ke fahia ke tumau e tua fakamoli.—Sala. 55:22; 1 Kori. 10:13.
3. Fakamalolo fefe e Iehova a tautolu ke fakauka?
3 Lata ke Fakauka: Ko e tau tala Tohi Tapu ke he tau tagata ne tumau e fakamoli tuga a Elia, Ieremia, mo Paulo nukua fakakite e lata ke fakauka. (Hepe. 10:36) Ne fakatumau e Iehova a lautolu he tau magaaho matematekelea mo e fakalolelole. (1 Patu. 19:14-18; Iere. 20:7-11; 2 Kori. 1:8-11) Ti omoomoi foki a tautolu ha ko e mahani fakamoli he tau matakainaga ha tautolu he tau vaha fou nei. (1 Pete. 5:9) Ko e manamanatu fakahokulo ke he tau fakafifitakiaga pihia ka maeke ke lagomatai a tautolu ke nakai fakalolelole e tau solu ha tautolu.
4. Ko e ha kua aoga ke onoono tumau ke he tau maveheaga he Atua?
4 Ko e amaamanaki ke he tau maveheaga he Atua ko e ‘taula ma e solu.’ (Hepe. 6:19) Ne omoomoi a Aperahamo mo Sara ke talia e ole ha Iehova ke toka ha laua a kaina mo e ‘nonofo ko e tau tagata kehe he motu ne mavehe age.’ Ne fakamalolo a Mose ke tu nakai matakutaku ma e tapuakiaga moli. Ne fakamalolo a Iesu ke fakauka ke he akau fakakikiveka. (Hepe. 11:8-10, 13, 24-26; 12:2, 3) Ko e toka tumau e maveheaga he Atua ke he lalolagi tututonu fou ke kikila ke he tau loto ha tautolu ka liga lagomatai a tautolu ke mauokafua pihia.—2 Pete. 3:11-13.
5. Ko e ha kua maeke ke fakamalolo he manamanatu ke he tau gahua mahani fakamoli ha tautolu he tau magaaho kua mole?
5 He liu manamanatu ke he tau gahua mahani fakamoli, foaki noa, mo e mauokafua ha tautolu he tau magaaho kua mole ka maeke foki ke fakamalolo a tautolu ke he ha tautolu a fekafekauaga. (Hepe. 10:32-34) Kua fakamanatu mai ki a tautolu e olioli ne logona e tautolu he magaaho ne tuku age ki a Iehova e tau mena hana ne ole ki a tautolu—ha tautolu a fekafekauaga solu katoatoa.—Mata. 22:37.