Foaki ki a Iehova e Katoatoa ha Tautolu
1 Ne fakamahino e Fakatufono ha Iehova ki a Isaraela ko e tau manu ne foaki ki a ia he poa kua lata ke “mitaki.” Ko e tau manu gagao kua nakai talia. (Levi. 22:18-20; Mala. 1:6-9) Lafi ki ai, he magaaho ne taute e poa, ko e tau vala gako oti—ko e vala mahuiga lahi mahaki—kua lata ia mo Iehova. (Levi. 3:14-16) Ko e Matua mo e Iki Homo Ue Atu ha Isaraela, kua lata a Iehova mo e mitaki lahi mahaki.
2 Tuga ni he vaha i tuai, ne fiafia lahi e Atua ke he alito he tau foakiaga ha tautolu he vaha nei. Kua lata e fekafekauaga ha tautolu ke fakaata e fakalilifu tonu ma Iehova. Moli, kua nakai tatai e tau tutuaga he tau tagata oti. Ka e, ha ha ia tautolu e kakano mitaki ke kumikumi hifo ki a tautolu ni ke iloa moli kua foaki e tautolu ki a ia e katoatoa ha tautolu.—Efeso 5:10.
3 Fekafekauaga Loto Katoa: Ke maeke he fekafekauaga ha tautolu ke fakalilifu a Iehova mo e amotia e tau loto he tau tagata fanogonogo ha tautolu, ti kua nakai lata ke fakateaga. Ko e tau talahauaga ha tautolu hagaao ke he ha tautolu a Atua mo e tau finagalo homo ue atu hana kua lata ke puna mai he tau loto kua pukeina he loto fakaaue. (Sala. 145:7) Kua fakamaama he mena nei e aoga he fakatumau e fakaholoaga mitaki he totou mo e fakaako fakatagata he Tohi Tapu.—Fakatai 15:28.
4 Ko e foaki ki a Iehova e katoatoa ha tautolu kua putoia foki e fifitaki ke he hana fakaalofa ma e tau tagata. (Efeso 5:1, 2) Ko e fakaalofa ma e tau tagata ka fakalagalaga a tautolu ke lali ke hokotia e fekau foaki moui he kupu moli ke he tokologa. (Mare. 6:34) Kua omoi a tautolu ke fakakite e fiafia fakatagata ki a lautolu kua tutala a tautolu ki ai. Kua fakatumau aki a tautolu ke manamanatu ki a lautolu he mole e ahi atu fakamua mo e fakamafiti a tautolu ke liliu atu. Kua fakalagalaga a tautolu ke taute e tau mena oti kua maeke ia tautolu ke lagomatai a lautolu ke tupu fakaagaga.—Gahua 20:24; 26:28, 29.
5 “Poa he Fakahekeaga”: Ko e taha puhala ke foaki e tautolu e mitaki lahi ha tautolu ki a Iehova he fakamakai ha tautolu ke he fekafekauaga. Ka fakatokatoka fakamitaki a tautolu mo e hagaaki ke he gahua mogonei, kua maeke ia tautolu ke fakamoli e mitaki lahi he magaaho kua ha ha ia tautolu. (1 Timo. 4:10) Ko e fakatokatokaaga mitaki kua fakamalolo a tautolu ke tutala fakatonu mo e malolo, ati maeke ai ke liga fakamalikiti e talia fiafia. (Fakatai 16:21) He folafola e tautolu e tala mitaki ke he falu, ko e tau talahauaga mai he loto moli kua fakahigoa ko e “poa he fakahekeaga.”—Hepe. 13:15, NW.