Fakailoa e Kupu Moli Hagaao ki a Iesu

¹ Ko e tau Kerisiano fakauku, ne lagomatai he tau hoa mamoe kehe ha lautolu, ne ‘folafola e talahauaga ki a Iesu Keriso.’ (Fakakite. 12:17) Ko e kotofaaga aoga anei, ha kua maeke e fakamouiaga he puhala mai ni ia ia.​—Ioane 17:3; Gahua 4:12.

² ‘Ko e Puhala, ko e Kupu Moli, mo e ko e Moui’: ‘Ko au nai ko e puhala, ko e kupu moli, mo e ko e moui,’ he talahau e Iesu. “Nakai hau taha ke he Matua, ka noa mo au.” (Ioane 14:6) Mai ni ia Iesu, “ko e puhala,” ke o atu a tautolu ke he Atua he liogi mo e moua e fakafetuiaga talia mo Ia. (Ioane 15:16) Ko Iesu ‘ko e kupu moli’ he tau perofetaaga mo e tau ata nukua toka i loto he tau Tohiaga Tapu Heperu ne eke mo fakamoliaga ki a ia. (Ioane 1:17; Kolo. 2:16, 17) Moli, ko e matapatu amaamanakiaga he perofetaaga moli ke fakakikila hana matagahua pauaki ke he gahuahua he finagalo he Atua. (Fakakite. 19:10) Lafi ki ai, ko Iesu ‘ko e moui.’ Ke moua e monuina he moui tukulagi, kua lata oti ke fakagahua e tua he hana poa lukutoto.​—Ioane 3:16, 36; Hepe. 2:9.

³ Ulu mo e Pule he Patuiki: Kua lata e tau tagata ke mailoga foki e pule ke takitaki e tau fakatoka kehekehe ne foaki e Iehova ke he hana Tama. Ne fakatu a Iesu ko e Patuiki he Kautu he Atua​—‘kua omaoma e tau motu ki a ia.’ (Kene. 49:10) Lafi ki ai, ne kotofa e Iehova a ia ko e Ulu he fakapotopotoaga. (Efeso 1:22, 23) Kua lata a tautolu ke lagomatai e tau tagata fakaako Tohi Tapu ke loto fakaaue ke he puhala ne takitaki e Iesu e fakapotopotoaga mo e fakaaoga e “fekafekau fakamoli mo e loto matala” ke taute e “tau mena kai [fakaagaga] ke he tau magaaho.”​—Mata. 24:45-47.

⁴ Fakaalofa Hofihofi e Ekepoa ne Mua: He moua e tau kamatamata mo e tau matematekelea ko e tagata, ko Iesu ne “maeke ai . . . ke lagomatai mai kia lautolu kua kamatamata.” (Hepe. 2:17, 18) Ko e loto mafanatia ha ia ma e tau tagata nakai mitaki katoatoa ke ako kua logona e Iesu e tau lolelole mo e ole totonu ma lautolu! (Roma 8:34) He fakave ke he poa ha Iesu mo e puhala he hana fekafekauaga ko e Ekepoa ne Mua, kua maeke ia tautolu ke o atu ki a Iehova ‘he fakatata atu mo e fakamalolo’ ke moua e “lagomatai mai ai ke he aho kua lata ai.”​—Hepe. 4:15, 16.

⁵ Kia eke e tau laliaga ha tautolu ke fakamahani e falu ke he kupu moli hagaao ki a Iesu ke omoi a lautolu ke omaoma mo e fekafekau ki a ia fakalataha mo tautolu.​—Ioane 14:15, 21.

Lagomatai e Leveki Fakaakoaga Tohi he Fakapotopotoaga Hau

¹ Igatia a tautolu mo e moua e tau aoga loga mai he Fakaakoaga Tohi he Fakapotopotoaga. He mahina kua mole ne fakatutala a tautolu ke he puhala kua fakamoli he leveki Fakaakoaga Tohi he Fakapotopotoaga e matagahua hana. Ka ko e heigoa ke taute e tautolu ke lagomatai a ia mo e lagomatai a tautolu mo e falu?

² Fina Atu he Tau Fahi Tapu Takitaha: Ha kua fakaikiiki e tau matakau fakaako tohi, kua aoga e fakalataha atu hau. Eke mo foliaga hau ke fina atu he tau fahi tapu takitaha. Maeke foki ia koe ke lagomatai he hoko tuai atu, ha kua fakaata he mena nei e leveki ke kamata e feleveiaaga ke he puhala maopoopo.​—1 Kori. 14:40.

³ Tau Tali Atihake: Ko e taha puhala ke lagomatai e koe he tauteute fakamitaki mo e talahau e tau manatu atihake. Ko e tau talahauaga kua hagaaki ke he taha e manatu kua to lahi e mitaki, ti fakamalolo foki he mena nei e falu ke tali. Lali ke nakai talahau e tau mena oti he paratafa. Kaeke ke hokotia ke he loto hau e taha manatu, kia atihake e fakatutalaaga he fakakite e manatu hau he tali.​—1 Pete. 4:10.

⁴ Kaeke ke ha ha ia koe e kotofaaga ke totou e tau paratafa ke lata mo e matakau, kia fakamakutu he fakamoli e kotofaaga ia. Ko e totou mitaki kua lafi ke he kautuaga he fakaakoaga.​—1 Timo. 4:13.

⁵ Fakamatala ko e Matakau: Ko e tau feleveiaaga ma e gahua he fonua ne taute ke he loga e tau matakavi fakaako tohi, ti ko e lagomatai hau ke he tau fakatokatokaaga nei ka lagomatai e leveki ke takitaki e gahua evagelia. Onoono ke he tau fakatokatokaaga nei ko e tau magaaho ke fakatata lahi ke he tau matakainaga hau mo e ke fakamalolo a lautolu.

⁶ Tau Hokotakiaga he Gahua he Fonua: Ko e tuku fakamafiti hau a hokotakiaga he gahua ke he fonua he matahiku he tau mahina takitaha ko e taha puhala ke lagomatai e leveki. Kia age fakahako e hokotakiaga hau ki a ia po ke hagai hana. Ko e leveki Fakaakoaga Tohi he Fakapotopotoaga ka age e tau hokotakiaga ke he tohikupu.

⁷ Ko e kaufakalataha hau mo e leveki Fakaakoaga Tohi he Fakapotopotoaga kua fakaaue ai. Mua atu ai, maeke ia koe ke iloa to ha ha ai a Iehova ‘ke he agaga kua fakakite e koe.’​—Filipi 4:23.