Hane Lagomatai he Tau Agelu a Tautolu
1 “Kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.” Ko e fakamalolo ha ia e tau kupu nei ki a lautolu oti kua omaoma e poaki ha Iesu: ‘Kia o atu a mo e taute tutaki’! (Mata. 28:18-20) Taha e puhala aoga lahi kua fakalataha a Iesu mo e tau Kerisiano moli ko e puhala he tau agelu hana. (Mata. 13:36-43) Ko e fiafia lahi ha ia ke fakapuloa e “vagahau mitaki tukulagi” fakalataha mo e tau mena momoui fakaagaga tua fakamoli nei!—Fakakite. 14:6, 7.
2 He Fekafekauaga ha Tautolu: Kua fakakite mai he Tohi Tapu kua fakafano mai e tau agelu “ke fekafekau ma lautolu ke moua ai e moui.” (Hepe. 1:14) He senetenari fakamua, kua putoia e tau agelu he takitaki e tau tutaki ha Iesu ki a lautolu kua lata. (Gahua 8:26) He vaha nei, kua fakatumau e tau fekafekau he Atua ke kitia e fakamoliaga he takitakiaga fakaagelu. He tau magaaho loga, ne pehe e tau tagata he tau kaina kua liogi tuai a lautolu ma e lagomatai he magaaho ka hau e Fakamoli ke he tau gutuhala ha lautolu. Ko e fiafia ha ia ha tautolu, fakalataha mo e tau agelu, ka talia e lautolu ia e fekau he Kautu!—Luka 15:10.
3 Fehagai mo e Totokoaga: Ko Tanielu, hana tau hoa fuata Heperu tokotolu, ko e aposetolo ko Peteru, mo e tokologa he falu kua moua he tau kamatamata lalahi ne logona e puipuiaga ha Iehova ke he puhala he “malolo lahi” he tau agelu. (Sala. 103:20; Tani. 3:28; 6:21, 22; Gahua 12:11) Pete he tau magaaho kua logona e tautolu e nakai fahia ha ko e moua he tau totokoaga, kua maeke ia tautolu ke moua e fakamalolo ha ko e mena ne tupu ke he fekafekau ha Elisaio he magaaho ne ako e ia “kua mua he tokologa ha ha ia tautolu, kia lautolu ha ha ia lautolu.” (2 Patu. 6:15-17) Pete foki ka peehi a tautolu ke vevehe kehe mai he tau matakainaga Kerisiano ha tautolu, kua lata ia tautolu ke nakai fakalolelole. Kua fakamalolo mai he Kupu he Atua ki a tautolu: “Kua fakatu e fale api he agelu a Iehova ke pa takai a lautolu kua matakutaku kia ia, ke laveaki foki e ia a lautolu.”—Sala. 34:7.
4 Nakai leva to o atu e tau kau fakaagelu ke utakehe e tau totokoaga oti ke he tuaga fakapatuiki he Keriso. (Fakakite. 19:11, 14, 15) He tatali a tautolu ke he aho ia, kia fakatumau a tautolu ke fakaheke fakamalolo a Iehova, he mauokafua katoatoa ke he lalago malolo he tau kau he lagi i lalo he poaki he Keriso.—1 Pete. 3:22.