Lata ia Tautolu ke Fakalilifu e Pule ha Iehova

Ko e heigoa e aga ka manatu e koe hagaao ke he tau higoa i tuai ko Koru, Tatano, mo Apiramo? Totoko! Ke he heigoa? Ke he pule mahani Atua. Ko e tau tala matafeiga ke he puhala matematekelea ha lautolu ne fakamau ai ia Numera veveheaga 16, mo e laulahi he tala ke he lekua kua ha ha he vala tala “Omaoma Fakamoli ke he Pule Mahani Atua” he Kolo Toko ia Aokuso 1, 2002. To aoga ki a koe ke totou e vala nei ti kitekite ke he fakatataaga fakaohooho manatu ne hagaao ki ai he vitio Respect Jehovah’s Authority. To kitia e koe e fekehekeheaki he tau fanau tane tua fakamoli ha Koru mo e matua tane totoko ha lautolu, ne fano he puhala ke fepa mo e Pule Katoatoa he lalolagi mo e lagi katoatoa. (Nume. 26:9-11) Ko e taute tala he tala moli nei kua lata ke omoomoi a tautolu oti ke feaki katoatoa fakalahi ha tautolu a mahani fakamoli ki a Iehova.

He kitekite a koe ke he vitio, kumi e tau fakamoliaga ne kaumahala a Koru mo e tau matakainaga totoko hana ke he kamatamata he mahani fakamoli ke he ono la e tuaga: (1) Nakai fakalilifu fefe e lautolu e pule mahani Atua? (2) Fakaata fefe e lautolu e fakatokoluga, foli tuaga, mo e mahekeheke ke lauia a lautolu? (3) Onoono fakatonutonu fefe a lautolu ke he tau kuku ha lautolu ne kotofa e Iehova? (4) Ko e heigoa e aga gugu ne kua feaki e lautolu? (5) Ko e ha ne nakai makona a lautolu ke he tau kotofaaga ha lautolu he fekafekauaga? (6) Fakaata fefe e lautolu e tau kapitiga mo e magafaoa ke mua hake ke he mahani fakamoli ke he Atua?

Manamanatu ke he tau fakaakoaga kua ako e tautolu mai he taute tala nei he Tohi Tapu ti fakagahua ke he onoonoaga fakatagata ha tautolu ke he pule mahani Atua he vaha nei: (1) Tali fefe a tautolu ke he tau fifiliaga he tau motua i loto he fakapotopotoaga, mo e ko e ha? (2) Maeke fefe ia tautolu ke fehagai mo e ha manatu kua nakai lata he tau fatuakiloto ha tautolu? (3) Tali atu fefe a tautolu ke he tau nakai mitaki katoatoa ha lautolu ne kua fifili ke takitaki? (4) Ko e heigoa ha tautolu ka taute ka kamata e agaga gugu ke puna hake he tau loto ha tautolu? (5) Lata a tautolu ke fefe e logonaaga hagaao ke he tau kotofaaga kua tuku mai ki a tautolu? (6) Ko hai kua nakai lata ia tautolu ke tuku fakamua ke he mahani fakamoli ha tautolu ke he Atua, mo e magaaho fe anei ka eke e mena nei mo kamatamata uka ki a tautolu?

Ka oti e vala nei he fakatutala he fakapotopotoaga, ko e ha nakai liu foki ke kitekite e vitio? Kia taute ai ke peehi fakalahi ua ke he loto hau e tau kakano kua lata ia tautolu ke fakalilifu tumau e pule ha Iehova!​—Sala. 18:25; 37:28.