Fakamatala Lauia Mitaki he Tau Matakavi Toloaga Tagata

1. He fifitaki ke he tau Kerisiano he senetenari fakamua, kua fakamatala fefe e tau Kerisiano he vaha nei he tau matakavi toloaga tagata, mo e ko e heigoa e tau fua?

¹ Tuga e tau tutaki fakamua ha Iesu, kua kumi e tau Kerisiano he vaha nei ke folafola e tala mitaki ke he tau tagata he tau matakavi kehekehe nukua ha ha a lautolu i ai. (Gahua 16:13; 17:17; 20:20, 21) Ko e fua he tau laliaga ha lautolu ke fakamatala he tau matakavi toloaga tagata, kua moua e lautolu e tau tagata kua fiafia ne liga ke nakai moua ka o atu he fekafekauaga he taha fale ke he taha fale.

2. Ko e ha kua lata e fakailoilo ka fakamatala ke he tau matakavi toloaga tagata, mo e maeke fefe ia tautolu ke lafi ke he maopoopo mitaki?

² Kua lata ke fakailoilo ka fakamatala he matakavi toloaga tagata. Mahani ai, mitaki lahi ka gahua fakatekiteki. Ma e fakatai, ka tokologa e tagata fakailoa he taha e matakavi po ke tatai e tau pisinisi ka ahi ki ai, to liga fakaokaoka a tautolu ke he falu tagata i ai. Kua utakehe he mena nei e lilifu he gahua ha tautolu ti liga fakakaupa e lauia mitaki ha tautolu. Ko e heigoa ka taute ke puipui e mena nai neke tupu? Falu fakapotopotoaga ne loga e tau matakavi toloaga tagata ke fakamatala ki ai kua moua kua lahi e lagomatai ka tuku takitaha e tau matakavi nei he fonua. (1 Kori. 14:40) Ke lafi ki ai, maeke ia tautolu ke lafi ke he maopoopo mitaki he gahua ni he fonua kua kotofa ke he fakapotopotoaga ato kehe ai ka fai fakatokaaga pauaki kua taute mai he Komiti Fekafekau he Fakapotopotoaga ke lagomatai taha fakapotopotoaga.​—Kikite e Ha Tautolu a Fekafekauaga he Kautu ia Novema 1998, lau 5, para. 18-19.

3. Ko e heigoa e fakafeleveia kua moua he falu ke lauia mitaki he fakamatala he tau matakavi toloaga tagata?

³ Fakafeleveia ke he Tau Tagata: Magaaho ne tutala a Iesu mo e fifine he tapa vai, ne kamata aki e ia e talahauaga ku ti fakalahi fakahaga e fakatutalaaga he kamata ke kitia e fiafia he fifine. (Ioane 4:7-26) Ko e fakafeleveia nei kua lauia mitaki foki he tau tutuaga pauaki he vaha nei. Kua iloa he falu tagata fakailoa ke moua e manamanatuaga mitaki ke fakamatala he matakavi toloaga tagata, kua lagomatai ka fai minuti ke fakafeleveia e tau tagata mo e fakakite e fiafia fakatagata ki a lautolu ato talahau e fekau ke he Kautu. Kua talahau e lautolu e mataulu tala ne mahuiga ke he matakavi, ti fa takitaki atu ke he fakatutalaaga. He talahau he falu ha lautolu a tau tupetupe, ne fanogonogo fakatekiteki e tau tagata fakailoa. Nakai leva, kua hane foaki e lautolu e fakamafanaaga mai he Kupu he Atua.​—Roma 15:4.

4. Feaki fefe e tautolu e fiafia ne moua e tautolu?

⁴ Feaki e Fiafia: He tau magaaho oti ka holo mitaki e fakatutalaaga ha tautolu, lata ia tautolu ke taute e tau fakatokaaga ke feaki e fiafia. Taute fefe e tautolu e mena nai? He fano fakahaga e fakatutalaaga ke oti, liga eke mai e koe e pepa tohitohi hau mo e pehe: “Kua fiafia lahi au he tutala a taua. Fai puhala foki nakai ke maeke ia taua ke matutaki he taha magaaho foki?” Po ke pehe: “Manako au ke totou e koe e vala tala ne manatu au to fiafia a koe ki ai. Maeke nakai au ke ta atu ke he kaina po ke ofisa hau?” Ka e pehe e falu tagata fakailoa: “Ti ko e heigoa e numera telefoni hau?” Kua fa mitaki e tali ne moua mai he mena nei.

5. Ko e heigoa e foliaga kua lata ke moua e tautolu ka fakamatala he matakavi toloaga tagata?

⁵ Tokologa e tagata ne moua fakamua he tau toloaga tagata ne talia e tau fakaakoaga Tohi Tapu. Ko e tau fakaakoaga pihia ka taute he kaina he tagata, he matakavi ne gahua a ia, he matakavi toloaga hagahaga mitaki, po ke he telefoni. Kia eke mo foliaga ha tautolu ke kamata e tau fakaakoaga Tohi Tapu he fakamatala lauia mitaki a tautolu he tau matakavi toloaga tagata.

Talahauaga Hagaao ke he Tau Mekasini

The Watchtower June 15

“Laulahi ia tautolu ko e vala lahi he moui ko e gahua. Onoono falu ki ai ko e fakamonuina; onoono falu ki ai ko e fakatauhele. Ko e heigoa hau a manatu? [Fakaata ma e tali. Ti totou e Fakamatalaaga 2:24.] Fakakite he mekasini nei e puhala ka lagomatai he Tohi Tapu a tautolu ke lagotatai e onoonoaga ke he gahua. Fakatutala foki ke he puhala ke fakafehagai mo e tau tupetupe fakagahua.”

Awake! June 22

“Manatu nakai a koe to liga mitaki e matakavi ha tautolu ane mai omaoma e tau tagata oti ke he tau kupu nei? [Totou Efeso 4:28. Ti fakaata ma e tali.] Kua fakatutala e mekasini nei ke he taui lahi ne totogi e tautolu takitaha ha ko e kaiha he fale koloa. Fakakite mai foki e puhala ka nakai leva ti eke e kaiha he fale koloa, mo e tau lekua oti kana, mo mena he vaha kua mole.”

Ko e Kolo Toko Iulai 1

“Kua fai tagata a tautolu oti ne iloa kua hihiga ke kautu ka e logona agaia e lautolu kua fai mena ne galo he tau momoui ha lautolu. Ko e heigoa he manatu e koe ha lautolu ne fa e kumi? [Fakaata ma e tali. Ti totou Mataio 5:3.] Kua fakatutala he mekasini nei e kei aoga lahi ke moua e mafola he loto​—fakamakona e tau manako fakaagaga ha tautolu.”

Awake! July 8

“He vaha nei ne lahi mahaki e fetoko ke moua taha gahua, ko e nakai fai gahua ko e lekua lahi mahaki. Kua tohi mai he mekasini nei lima e kei ke kumi aki e gahua. [Talahau e tau vala mataulu ne puni lahi he vala tala “Five Keys to Finding a Job.”] Kua foaki mai foki e tau manatu aoga ke he puhala ke leveki aki e gahua.” Totou Tau Fakatai 22:29, ne fatiaki he lau 10.