Vala 7​—Taute e Tau Fakaakoaga Tohi Tapu Holo ki Mua

Liogi he Fakaakoaga

1. (a) Ko e ha kua mitaki e fakaakoaga Tohi Tapu ke hafagi mo e fakaoti aki e liogi? (e) Maeke fefe ia tautolu ke kamata ke liogi he fakaakoaga Tohi Tapu?

¹ Ma e tau tagata fakaako Tohi Tapu ke holo ki mua fakaagaga, kua aoga ke moua e monuina ha Iehova. (1 Kori. 3:6) Ko e mena ia, kua mitaki e fakaakoaga ke hafagi mo e fakaoti aki e liogi. Liga taute pihia e tautolu he fakaakoaga fakamua mo e tau tagata ne hihiga fakalotu. Ma e falu, lata ia tautolu ke fifili e magaaho ka kamata ke liogi. Liga fakaaoga e koe e Salamo 25:4, 5 mo e 1 Ioane 5:14 ke lagomatai e tagata fakaako ke kitia e kakano kua lata ke liogi mo e fakaaoga e Ioane 15:16 ke fakamaama e aoga he liogi ki a Iehova puhala ia Iesu Keriso.

2. Kaeke fakatauo e matakainaga tane kua papatiso po ke matakainaga tane nakaila papatiso mo e matakainaga fifine ke he fakaakoaga Tohi Tapu, ko hai ka liogi?

² Ko hai ka liogi he fakaakoaga Tohi Tapu? Kaeke fakatauo e matakainaga tane kua papatiso mo e matakainaga fifine ke he fakaakoaga, ko e matakainaga tane ka liogi, ka e liga taute he matakainaga fifine e fakaakoaga ka e uufi e ulu. (1 Kori. 11:5, 10) Ka e, kaeke ko e matakainaga tane ko e tagata fakailoa he Kautu ka e nakaila papatiso ne fakatauo mo e matakainaga fifine ke he fakaakoaga, lata he matakainaga fifine ke liogi. He tuaga pihia, lata he matakainaga fifine ke uufi e ulu ka liogi pihia foki ka taute e fakaakoaga.

3. Ko e heigoa e tau mena kua lata ke putoia ke he liogi he fakaakoaga Tohi Tapu?

³ Tau Mena Ka Putoia he Liogi: Ko e tau liogi he fakaakoaga Tohi Tapu kua nakai lata ke loloa, ka e lata ke talahau fakatonu. Ke lafi ke he ole ma e fakamonuina he Atua ki luga he fakaakoaga mo e fakaaue ke he tau kupu moli ne ako, kua felauaki foki ke fakaheke ki a Iehova ko e Punaaga he tau fakaakoaga. (Isaia 54:13) Maeke foki ia tautolu ke putoia e tau talahauaga ne fakaata e fiafia moli ha tautolu ke he tagata fakaako mo e ha tautolu a loto fakaaue ke he fakatokatokaaga kua fakaaoga e Iehova. (1 Tesa. 1:2, 3; 2:7, 8) Ko e ole ha tautolu ke he fakamonuinaaga ha Iehova ma e tau laliaga he tagata fakaako ke taute e tau mena hane ako e ia ka lagomatai a ia ke kitia e aoga he eke mo “tagata omaoma ke he kupu.”​—Iako. 1:22.

4. Ko e heigoa e tau aoga he hafagi mo e fakaoti aki e liogi e fakaakoaga Tohi Tapu?

⁴ Loga e aoga he liogi. Kua tamai e fakamonuina he Atua. (Luka 11:13) Kua peehi e hokulo he fakaako e Kupu he Atua. He fanogonogo e tagata fakaako ke he tau liogi ha tautolu, kua hane ako e ia e puhala ke liogi. (Luka 6:40) Laulahi ai, ko e tau liogi ne hake mai he loto ne pukeina ke he fakaalofa ma e Atua mo e fakaaue ke he hana tau aga mua ue atu ka lagomatai e tagata fakaako ke feaki e fakafetuiaga fakatagata mo Iehova.

Talahauaga Hagaao ke he Tau Mekasini

The Watchtower Apr. 15

“Kua loga tumau kia e tau vala tala he vaha nei? [Fakaata ma e tali.] Ka e, nakai fai ne mua atu e aoga ka fakatatai mo e vala tala ne fakamaama he kupu nei. [Totou Ioane 17:3.] Kua fakamaama he mekasini nei e kakano he kupu ‘moui tukulagi’ mo e puhala ke maeke ia tautolu ke moua e iloilo ne takitaki ki ai.”

Awake! Apr. 22

“Pete he liga mua hake e talahaua ha Iesu Keriso ke he ha tagata ne kua moui, tokologa e tagata ne manamanatu ko hai moli a ia. Iloa nakai e koe na manamanatu foki e tau aposetolo ha Iesu ke he mena nei? [Fakaata ma e tali. Ti totou e Mareko 4:41.] Kua kumikumi he mekasini nei e talahauaga he Tohi Tapu ko hai moli a Iesu.”

Ko e Kolo Toko Me 1

“Ka mate taha ne ofania e tautolu, ne manako pauaki ke liu kitia e tagata ia. Talia nakai e koe? [Fakaata ma e tali.] Tokologa ne moua e mafanatia mai he maveheaga he Tohi Tapu ke he liu tu mai. [Totou Ioane 5:28, 29.] Kua fakatutala he mekasini nei e magaaho ka fakahoko e liu tu mai mo e ko hai moli ka aoga mai i ai.”

Awake! May 8

“Ko e laulahi he tau matua ne fifili e tau mena ke kitekite e tau fanau ha lautolu. Kua uka kia ke moua e tau ata kifaga mitaki ma e magafaoa hau? [Fakaata ma e tali. Ti totou Efeso 4:17.] Kua fakatutala he mekasini nei e puhala kua maeke e tau mamatua ke lagomatai e tau fanau ha lautolu ke fifili e tau fakafiafiaaga atihake.”