Kua Tata Mai e Aho a Iehova

¹ Kua manako lahi e tau Kerisiano ke hoko mai e aho a Iehova, ke maeke ia ia ke moumou e fakatokaaga nei mo e takitaki atu ke he lalolagi fou he tututonu. (2 Pete. 3:12, 13) He nakai iloa tonu e tautolu ka hoko mai e aho ia, kua lata ni ke fakatumau e mataala ha tautolu mo e lagomatai e falu ke taute pihia foki. (Eseki. 33:7-9; Mata. 24:42-44) Ko e manamanatu fakahokulo ke he Kupu fakaperofeta he Atua ka fakamalolo e fifiliaga ha tautolu “kua tata mai e aho lahi a Iehova.”​—Sefa. 1:14.

² Hukui he Tau Pule Malolo he Lalolagi: Ne tohia he Fakakiteaga 17:9-11, kua talahau he aposetolo ko Ioane e ‘tau patuiki tokofitu,’ ne hukui e tokofitu he pule malolo fakamui he lalolagi. Kua hagaao foki a Ioane ke he ‘patuiki ke valuaki,’ ne hukui mogonei he Tau Motu Kaufakalataha. Amanaki foki kia a tautolu ke kitia e falu pule malolo he lalolagi? Nakai, kua fakakite he perofetaaga ko e patuiki ke valuaki “kua fina atu foki a ia ke he malaia,” ka mole atu ai to nakai liu fai patuiki foki he lalolagi. Lagomatai kia he perofetaaga nei a koe ke kitia e magaaho tonu ne momoui ai a tautolu?

³ Kua lagomatai he Tanielu 2:31-45 a tautolu ke maama e hauaga he aho a Iehova. He perofetaaga ia, ko e tupua makimaki ne kitia e Nepukanesa he miti ne hukui he tau malolo fakamui he lalolagi. Kua fita he kitia e tau malolo takitaha nei. Matakavi fe he fakamauaga tuai kua momoui a tautolu mogonei i ai? He magahala ne fakamailoga he tau tauluhui he tupua. Kua fakamaama fakamahino he perofetaaga e mena ka tupu foki. To moumou katoatoa e pule he tagata, he fakaata e puhala ma e “kautu nakai fakaoti tukulagi.” Kitia nakai e koe e mena ne fakakite he mena nei kua tata mai e aho a Iehova?

⁴ Falu Fakamoliaga: Kua kitia mata e tautolu e falu fakamoliaga kua tata mai e aho a Iehova. Kua kitia e tautolu e fakamoliaga ne talahau tuai he aposetolo ko Paulo hagaao ke he tau aga he tau tagata he “tau aho fakamui.” (2 Timo. 3:1-5) Ti kua fakalataha a tautolu he fakamatala ke he lalolagi ne kua lata ke taute ato hoko e fakaotiaga. (Mata. 24:14) Kia fakatumau e fekafekauaga ha tautolu ke fakakite e fakamafiti he fakapuloa fakaagelu: “Kia matakutaku a mutolu ke he Atua, mo e ta age kia ia e fakahekeaga, ha kua hoko mai e magaaho he hana fakafiliaga.”​—Fakakite. 14:6, 7.

Vala 9​—Taute e Tau Fakaakoaga Tohi Tapu Holo ki Mua

Tauteute e Tau Tagata Fakaako ke Fakamatala Nakai Mautali

¹ He magaaho ne mailoga e Aneterea mo Filipo ko Iesu e Mesia ne mavehe, ne nakai okioki a lautolu he talahau ke he falu e tala fiafia nei. (Ioane 1:40-45) Pihia foki he vaha nei, he kamata e tau tagata fakaako Tohi Tapu ke fakagahua e tua ke he mena ne ako e lautolu, ne omoomoi a lautolu ke tutala hagaao ki ai. (2 Kori. 4:13) Fakamalolo fefe e tautolu a lautolu ke fakamatala nakai mautali mo e tauteute lauia mitaki a lautolu?

² Liga to huhu a koe ke he tagata fakaako kua tutala nakai a ia ke he falu hagaao ke he mena ne ako e ia mai he Tohi Tapu. Liga ko e tau kapitiga mo e tau tagata he magafaoa ne uiina e ia ke fakalataha ke he fakaakoaga hana. Huhu ki a ia ko e fai nakai he tau kapitiga gahua, tau kapitiga aoga, po ke falu tagata mahani ne fakakite e fiafia. He puhala taha nei kua kamata a ia ke fakamatala. Lagomatai a ia ke loto fakaaue e lata ke fakagahua e loto manamanatu mo e fakalilifu mo e totonu ka tutala mo e falu hagaao ki a Iehova ko e Atua mo e hana finagalo.​—Kolo. 4:6; 2 Timo. 2:24, 25.

³ Fakalataha ke he Tau Taofiaga ha Lautolu: Kua aoga lahi ke fakamahani e tau tagata fakaako Tohi Tapu ke fakaaoga e Kupu he Atua ka talahau e tau taofiaga ha lautolu. He tau vala ne fifili he magaaho ne fakaako, huhu ke he tagata fakaako: “To fakaaoga fefe e koe e Tohi Tapu ke fakamaama aki e kupu moli nei ke he magafaoa hau?” po ke “Ko e heigoa e kupu Tohi Tapu ka fakaaoga e koe ke fakamoli aki e mena nei ke he kapitiga?” Mailoga e puhala ne tali e ia, mo e fakakite ki a ia e puhala ke fakave hana fakaakoaga ke he tau Tohiaga Tapu. (2 Timo. 2:15) He taute pihia, to tauteute e koe e tagata fakaako ke fakamatala nakai mautali ti, ka lata ai a ia, ke he gahua fakamatala ne fakatokatoka mo e fakapotopotoaga.

⁴ Kua pulotu ke tauteute e tau tagata fakaako Tohi Tapu ke felauaki mo e totokoaga. (Mata. 10:36; Luka 8:13; 2 Timo. 3:12) He magaaho ka huhu e falu po ke talahau hagaao ke he Tau Fakamoli a Iehova, kua liga hafagi he mena nei e puhala ma e tau tagata fakaako ke talahau atu. Ko e porosua Tau Fakamoli a Iehova​—Ne Kaufakalataha ke Taute e Finagalo he Atua ke he Lalolagi Katoa, kua maeke ke taute a lautolu ke ‘mautali ke tali atu.’ (1 Pete. 3:15) Kua foaki e vala tala hako ke maeke ia lautolu ne fou ke lagomatai e tau kapitiga mitaki mo e tau tagata he magafaoa ke maama e tau taofiaga mo e tau gahua ne fakave ke he Tohi Tapu.