Lagomatai e Falu ke Fakaheke a Iehova

¹ Kua fita e fakailoa e fekau aoga ke he tau tagata he lalolagi katoa: “Kia matakutaku a mutolu ke he Atua; mo e ta age kia ia e fakahekeaga, ha kua hoko mai e magaaho he hana fakafiliaga; kia hufeilo foki a mutolu kia ia ne eke e lagi, mo e lalolagi, mo e tahi, mo e tau vai puna.” (Fakakite. 14:6, 7) Ko e kotofaaga ha tautolu ke uta e fakailoaaga ia. Ko e heigoa kua lata he tau tagata ke iloa hagaao ki a Iehova ke maeke ke matakutaku mo e tapuaki ki a ia?

² Higoa Hana: Kua lata e tau tagata ke iloa e higoa he Atua moli tokotaha mai he tau atua fakavai loga ne tapuaki ki ai he vaha nei. (Teu. 4:35; 1 Kori. 8:5, 6) Moli, ne fakaaoga he tau tagata tohia Tohi Tapu e higoa lilifu ha Iehova ke molea e laga 7,000. He fakailoilo a tautolu ka fakaaoga he magaaho ka talahau e higoa he Atua, kia nakai fuafuakelea a tautolu he fakaaoga ai. Ko e finagalo he Atua ke he tau tagata ke o mai ke iloa hana higoa.​—Sala. 83:18.

³ Aga Hana: Ke fakaheke a Iehova, kua lata e tau tagata ke iloa ko e faga Atua fefe a ia. Kua lata ke fakamahani a tautolu ki ai fakalataha mo e hana fakaalofa ue atu, pulotu tokoluga ue atu, fakafili tonu katoatoa, mo e malolo mua ue atu, putoia ki ai e fakaalofa noa, fakaalofa totonu, mo e falu fua homo ue atu. (Esoto 34:6, 7) Kua lata foki ia lautolu ke ako ke moua e matakutaku mitaki he Atua, ke taofi fakatokoluga a ia he mailoga ko e tau momoui ha lautolu kua fakave ke he taliaaga ha Iehova.​—Sala. 89:7.

⁴ Fakatata ke he Atua: Ke hao mai he fakafiliaga he Atua hane hau, kua lata e tau tagata ke ui ki a Iehova he tua. (Roma 10:13, 14; 2 Tesa. 1:8) Kua lahi atu e mena kua putoia mai he moua hokoia e iloilo ke he higoa mo e tau fua he Atua. Kua lata ke lagomatai e tautolu e tau tagata ke feaki e fakafetuiaga fakatagata mo Iehova, he falanaki ki a ia mo e tau loto katoa ha lautolu. (Fakatai 3:5, 6) He fakagahua e lautolu e tau mena kua ako e lautolu, kia fuluhi atu ke he Atua he liogi nakai noa, mo e moua e lagomataiaga hana ke he tau momoui ha lautolu, to tupu e tua ha lautolu, he lagomatai a lautolu ke fakatata ki a Iehova.​—Sala. 34:8.

⁵ Kia fakamakai a tautolu ke fakailoa e higoa he Atua mo e lagomatai e falu ke tuku e falanakiaga katoatoa ha lautolu ia ia mo e ke matakutaku ki a ia. Maeke foki agaia ia tautolu ke lagomatai e tokologa ke o mai ke iloa a Iehova mo e fakaheke a ia ko e ‘Atua he fakamouiaga’ ha lautolu.​—Sala. 25:5.

Fakakite e Loto Fakaaue ma e Tau Koloa Fakateokarasi

¹ He taute e tau fakatokaaga ke fakafou e faituga, ne fakamalolo he Patuiki ko Iosia a lautolu ne kotofa ke taute e gahua, he talahau: “Ka e nakai fakafili a lautolu he tau tupe ne ta age ai ke he tau lima ha lautolu; ha kua eke e lautolu mo e fakamoli ni.” (2 Patu. 22:3-7) Ko e loto fakaaue he tau tagata ia ma e tau mena tapu ne kitia moli ai ke he puhala ne taute aki e tau koloa ne tuku age ki a lautolu. He vaha nei, he taute e tautolu e feua he ekepoa ke he vagahau mitaki he Atua, kua lata pihia a tautolu ke fakakite e fakamoli he leveki e tau koloa kua foaki mai ki a tautolu.

² He Fekafekauaga he Fonua: Ko e loto fakaaue ma e fekau aoga ne ha ha he tau tohi ha tautolu mo e mailoga e totogi ne putoia he taute ai kua fakatupu a tautolu ke tokiofa fakatokoluga ai. Kua nakai lata ia tautolu ke foaki fakahanoa e tau tohi ki a lautolu ne nakai fakakite ha fakaaue moli ma e fekau he Tohi Tapu. Ka tote e fiafia he tagata ke he tala mitaki, liga foaki e tautolu ki a ia e tuleke ka e nakai ko e taha tohi.

³ Foaki e tau tohi ke he puhala kua fakakite e uho ha lautolu. Ua toka he tau matakavi tolo ke maeke ke tafola fano. Ke nakai moumou mena, fakakia ko e fiha e tohi hau i kaina to liu ke ole fakaloga e tau tohi. Ka fakatumau a koe ke toe e tau mekasini he tau fufuta takitaha, kia fakatote hifo e ota tohi hau.

⁴ Tau Tohi ma e Fakaaoga Fakatagata: Kia ota ni e tau tohi kua fakaaoga moli e tautolu. Mua atu ke nakai moumou noa he ole e tau Tohi Tapu deluxe, tau Reference Bible, mo e falu tohi lalahi tuga e Concordance, Index, tau volume Insight, mo e tohi Proclaimers, nukua tauuka lahi.

⁵ Kua manatu nakai e koe ke tohi hifo e higoa mo e kaina hau he tau lagaki fakatagata he tau tohi hau? Kua lagomatai e mena nei ke fakatote hifo e manako ke hukui e tau tohi ia kua toka hehe. Ka galo hau a tohi lologo, Tohi Tapu, po ke tohi fakaako, liga to moua e koe he tau koloa galo ne toka he Fale he Kautu po ke matakavi he toloaga.​—Luka 15:8, 9.

⁶ O mai a tautolu ke tutuli ke fakaaoga fakamitaki e tau tohi ha tautolu. Ko e puhala anei ke fakakite e tautolu e fakamoli he leveki e tau koloa he Kautu ne tuku mai e Iehova ki a tautolu.​—Luka 16:10.