Puhala ke Kamata e Tau Fakaakoaga ke he Tohi Fakaako he Tohi Tapu

Kua fiafia e tokologa ha tautolu ke takitaki e fakaakoaga Tohi Tapu ane mai maeke ia tautolu ke kamata e fakaakoaga. To lagomatai he tohi foou Ko e Heigoa ne Fakaako Moli he Tohi Tapu? a tautolu. Kua talaga e hafagiaga he lau 3-7 ke maeke he tagata he fale ke fakatutala ke he Tohi Tapu he fakaaoga e tohi. To moua foki e lautolu ne kaupā e iloilo ke he fekafekauaga e mukamuka he fakaaoga e tohi nei ke kamata e tau fakaakoaga.

◼ Liga fakatai e koe e puhala nei he fakaaoga e lau 3:

He mole e tutala ke he tau mena tutupu po ke lekua ne tupetupe ki ai e tau tagata he fonua, fakakite ke he tagata he fale e tau hūhū ne tohi matauli lahi he lau 3, mo e uiina a ia ke fai mena ka talahau. Ti fuluhi ke he lau 4-5.

◼ Po ke manako a koe ke kamata he fakamaama e lau 4-5:

Liga pehē a koe, “Ko e homo ha ia ka tupu moli e tau hikiaga nei ne fakatino mai?” Po ke liga hūhū e koe, “Ha e fe e tau maveheaga nei ka manako a koe ke kitia e fakamoliaga?” Fanogonogo fakaeneene ke he tali.

Kaeke fakakite he tagata he fale e fiafia pauaki ke he taha kupu tohi, fakakite age e mena ne fakaako he Tohi Tapu ke he matakupu ia he fakatutala ke he tau paratafa i loto he tohi ne hagaao ki ai. (Kikite e puha he lau nei he uho.) Fakatutala ke he vala tala tuga ka taute e koe he fakaakoaga Tohi Tapu. Maeke ke taute ai he gutuhala he fale fakamua ke lima ke he 10 e minuti.

◼ Taha puhala ke taaki mai e manatu he tagata he fakaaoga e lau 6:

Fakakite ke he tagata he fale e tau hūhū he kelekele he lau, mo e hūhū, “Kua fa manamanatu nakai a koe hagaao ke he tau hūhū nei?” Kaeke fakakite e ia e fiafia ke he taha hūhū, fuluhi ke he tau paratafa i loto he tohi ne tali e hūhū ia. (Kikite e puha he lau nei he uho.) He fakatutala tokoua a mua ke he vala tala, hane takitaki e koe e fakaakoaga Tohi Tapu.

◼ Liga fakaaoga e lau 7 ke takitaki ke he fakatātāaga he fakaakoaga Tohi Tapu:

Totou e tau matakupu tolu fakamua he lau, ti fuluhi ke he veveheaga 3 mo e fakatātā e fakaakoaga he fakaaoga e paratafa 1-3. Pulega ke liu ke fakatutala e tau tali ke he hūhū he paratafa 3.

◼ Puhala ke pulega ke liu atu:

Ka oti e fakaakoaga fakamua, pulega ke fakaholo atu e fakatutalaaga. Liga pehē ni a koe: “Ko e gahoa ni e minuti, ti iloa e taua e tau mena ne fakaako he Tohi Tapu ke he tau matakupu aoga. Taha magaaho, to fakatutala a taua ke he [toka e hūhū ke fakatutala ki ai]. Maeke nakai au ke hau he magaaho nei ni he tapu ka hau?”

Kua tata lahi atu a tautolu ke he magaaho kotofa ha Iehova, ne fakatumau a ia ke tauteute a tautolu ma e matagahua. (Mata. 28:19, 20; 2 Timo. 3:17) Kia fakaaoga fakamitaki ai e tautolu e kanavaakau foou homo nei ke kamata e tau fakaakoaga Tohi Tapu.

Puhala ke Foaki e Tohi Fakaako he Tohi Tapu

Kua lafi ke he uho nei e tau lagomatai kehekehe ke foaki e tohi Fakaako he Tohi Tapu. Ke lauia mitaki, talahau ke he tau kupu ni haau, hikihiki e puhala haau hagaao ke he tau tagata he fonua, mo e iloa e tau manatu ke tutala ki ai i loto he tohi. Maeke foki ke fakaaoga e falu fakafeleveiaaga ne kua lata ma e fonua haau.​—Kikite Ha Tautolu a Fekafekauaga he Kautu ia Ianuari 2005, lau 8.

Amaketo

◼ “Ka logona he tau tagata e kupu ‘Amaketo,’ tokologa ne manatu ko e moumouaga lahi mahaki. To ofo nakai a koe ke iloa ko Amaketo ko e taha mena kua lata ia tautolu ke amaamanaki lahi atu ki ai? [Fakaatā ma e tali. Ti totou Fakakiteaga 16:14, 16.] Kia mailoga e talahauaga nei ke he puhala he moui ka mole a Amaketo.” Fuluhi ke he lau 82-4, mo e totou e paratafa 21.

Tohi Tapu

◼ “Kua fa hagaao e tau tagata ke he Tohi Tapu ko e Kupu he Atua. Kua fa manamanatu nakai a koe kua maeke fēfē e tohi ne tohia he tau tagata ke ui moli ko e Kupu he Atua? [Fakaatā ma e tali. Ti totou 2 Peteru 1:21 mo e paratafa 5 he lau 19-20.] Kua foaki he tohi nei e tau tali he Tohi Tapu ke he tau hūhū nei.” Fakakite e tau hūhū he lau 6.

◼ “He vahā nei, kua lahi atu e tau vala tala ne moua he tau tagata ke he vahā kua mole. Ka e i fe he manatu e koe ka moua e tautolu e fakatonuaga mitaki ka lagomatai a tautolu ke takitaki e moui fiafia nukua kautū? [Fakaatā ma e tali. Ti totou 2 Timoteo 3:16, 17 mo e paratafa 12 he lau 23.] Kua fakamaama he tohi nei e puhala moui ne fakafiafia e Atua mo e aoga ai ni a tautolu.” Fakakite e fakafonua mo e fakatino he lau 122-3.

Mate/Liu Tu Mai

◼ “Tokologa e tagata ne tuahā ke he mena ne tupu moli he mate. Manatu nakai a koe kua maeke ia tautolu ke iloa? [Fakaatā ma e tali. Ti totou Fakamatalaaga 9:5 mo e paratafa 5-6 he lau 58-9.] Kua fakamaama foki he tohi nei e kakano he tau maveheaga he Tohi Tapu he liu tu mai ma lautolu ne mamate.” Fakakite e fakatino he lau 75.

◼ “Ka mate taha ne ofania e tautolu, kua pauaki ke manako ke liu kitia e tagata ia. Talia nakai e koe? [Fakaatā ma e tali.] Kua tokologa ne fakamafanatia he maveheaga he Tohi Tapu ke he liu tu mai. [Totou Ioane 5:28, 29 mo e paratafa 16-17 he lau 71-2.] Ne tali foki he veveheaga nai e tau hūhū nei.” Fakakite e tau hūhū he kamataaga he lau 66.

Moui Tukulagi

◼ “Laulahi e tau tagata ne manako ke he malolō tino mo e moui loa. Ka e ane mai kua maeke, to manako nakai a koe ke moui tukulagi? [Fakaatā ma e tali. Ti totou Fakakiteaga 21:3, 4 mo e paratafa 17 he lau 53-4.] Kua fakatutala e tohi nei ke he puhala ka moua e tautolu e moui tukulagi mo e puhala he moui ka fakamoli e maveheaga ia.”

Magafaoa

◼ “Kua manako oti a tautolu ke moua e moui fiafia he magafaoa. Talia nakai e koe? [Fakaatā ma e tali.] Ne tutala e Tohi Tapu ke he tau mena kua lata he tau tagata oti he magafaoa ke taute ke lafi ke he fiafia he magafaoa​—he fifitaki e Atua he fakakite e fakaalofa.” Totou Efeso 5:1, 2 mo e paratafa 4 he lau 135.

Tau Fale

◼ “He tau matakavi loga, kua uka lahi ke moua e kaina ne tau laukauka. Manatu nakai a koe to taha aho ka ha ha ai e tau fale mitaki ma e tau tagata oti? [Fakaatā ma e tali. Ti totou Isaia 65:21, 22 mo e paratafa 20 he lau 34.] Ne fakakite he tohi nei e puhala ka fakamoli e maveheaga ia mai he Atua.”

Iehova ko e Atua

◼ “Tokologa e tagata ne talitonu ke he Atua ka manako ke logona hifo e tata lahi ki a ia. Iloa nakai e koe na uiina he Tohi Tapu a tautolu ke fakatata atu ki a ia? [Fakaatā ma e tali. Ti totou Iakopo 4:8a mo e paratafa 20 he lau 16.] Kua taute pauaki e tohi nei ke lagomatai e tau tagata ke ako fakalahi hagaao ke he Atua he fakaaoga e Tohi Tapu ni ha lautolu.” Fakakite e tau hūhū he kamataaga he lau 8.

◼ “Tokologa e tagata ne liogi ma e higoa he Atua ke fakatapu. Kua fa manamanatu nakai a koe ko e heigoa e higoa ia? [Fakaatā ma e tali. Ti totou Salamo 83:18 mo e paratafa 2-3 he lau 195.] Ne fakamaama he tohi nei e tau mena ne fakaako moli he Tohi Tapu hagaao ki a Iehova ko e Atua mo e finagalo haana ma e tagata.”

Iesu Keriso

◼ “Kua logona he tau tagata he lalolagi katoa hagaao ki a Iesu Keriso. Pehē falu kua nakai mua atu a ia ke he ha tagata mahuiga. Ka e tapuaki he falu a ia ko e Atua Malolō Ue Atu. Kua aoga nakai he talahau e koe e tau mena ne talitonu a tautolu ki ai hagaao ki a Iesu Keriso?” Fakaatā ma e tali. Ti totou Ioane 17:3 mo e paratafa 3 he lau 37-8. Fakakite age e tau hūhū he kamataaga i lalo he mataulu he veveheaga.

Liogi

◼ “Kua manamanatu nakai a koe kua tali fēfē he Atua e tau liogi? [Fakaatā ma e tali. Ti totou 1 Ioane 5:14, 15 mo e paratafa 16-18 he lau 170-2.] Ne fakamaama foki he veveheaga nei e kakano ne kua lata ia tautolu ke liogi ke he Atua mo e mena kua lata ia tautolu ke taute ke logona e ia.”

Lotu

◼ “Tokologa e tagata ne kua kamata ke kitia na fakatupu he tau lotu he lalolagi e tau lekua he tau tagata ka e nakai fakamafola. Manatu nakai a koe kua takitaki he lotu e tau tagata ke he puhala hako? [Fakaatā ma e tali. Ti totou Mataio 7:13, 14 mo e paratafa 5 he lau 145-6.] Kua ono e puhala ne kumikumi e veveheaga nei ki ai ne mailoga e tapuakiaga ne talia he Atua.” Fakakite e tau manatu he lau 147.

Mamahi/Matematekelea

◼ “Ka tupu e mamahi, kua tokologa ne paleko e fakaalofa he Atua hagaao ke he tau tagata mo e mailoga e tau matematekelea ha lautolu. Fa manamanatu nakai a koe ke he mena ia? [Fakaatā ma e tali. Ti totou 1 Peteru 5:7 mo e paratafa 11 he lau 11-2.] Ne fakamaama he tohi nei e puhala ka utakehe he Atua e tau matematekelea oti he tagata.” Fakakite e tau hūhū he kamataaga he lau 106.

Felakutaki/Mafola

◼ “Kua manako mafola e tau tagata he lalolagi katoa. Manatu kia a koe ko e miti e amaamanakiaga he mafola? [Fakaatā ma e tali. Ti totou Salamo 46:8, 9.] Kua fakatutala e tohi nei ke he puhala ka fakamoli he Atua e finagalo haana mo e tamai e mafola ke he lalolagi katoa.” Fakakite e fakatino he lau 35, mo e fakatutala ke he paratafa 17-21 he lau 33-4.

[Puha he lau 5]

Tau Puhala ke Talahau e Fakaholoaga he Tau Mena Fakaalofa

“Ka manako a koe ke foaki taha mena fakaalofa he aho nei ke he gahua ha mautolu he lalolagi katoa, to talia fiafia e au.”

“Pete he foaki e tau tohi ha mautolu mo e nakai totogi, kua talia agaia e mautolu e taha mena fakaalofa tote ma e gahua ha mautolu he lalolagi katoa.”

“Liga manamanatu a koe maeke fēfē ia mautolu ke taute e gahua nei. Kua maeke ai ha ko e gahua ha mautolu he lalolagi katoa kua lalago he tau mena foaki fakaalofa. Ka manako a koe ke foaki e mena fakaalofa tote he aho nei, to talia fiafia e au.”

(1) Hūhū, (2) Tohiaga Tapu, mo e (3) Veveheaga

Ko e puhala mukamuka ke foaki Ko e Heigoa ne Fakaako Moli he Tohi Tapu? ko e (1) talahau e hūhū fakalagalaga, (2) totou e kupu tohi kua lata, mo e (3) fakamaama e veveheaga he tohi ne tutala ke he matakupu ia he totou e tau hūhū he kamataaga i lalo he mataulu he veveheaga. Ka fakakite he tagata he fale e fiafia, maeke ia koe ke fakatātā e fakaakoaga Tohi Tapu he fakaaoga e tau paratafa fakamua he veveheaga ia. Maeke ke fakaaoga e puhala nei ke kamata aki e fakaakoaga ka taute e aahi fakamua po ke he liu aahi atu.

◼ “Manatu nakai a koe kua maeke he tau tagata noa ke o mai ke iloa e Tufuga malolō ue atu ha tautolu, tuga ne talahau he Tohi Tapu?” Totou Gahua 17:26, 27, mo e fakaatā ma e tali. Ti fakamaama e veveheaga 1.

◼ “Mo e tau lekua ne fehagai mo tautolu he vahā nei, manatu nakai a koe kua maeke ke moua e mafanatia mo e amaamanakiaga ne fakakite mai?” Totou Roma 15:4, mo e fakaatā ma e tali. Ti fakamaama e veveheaga 2.

◼ “Kaeke ha ha ia koe e malolō ke taute pihia, to fakamoli nakai e koe e tau hikihikiaga nei?” Totou Fakakiteaga 21:4, mo e fakaatā ma e tali. Ti fakamaama e veveheaga 3.

◼ “Manatu nakai a koe to maeke he fanau ha tautolu ke olioli e tau tutuaga ne talahau he lologo mai i tuai nei?” Totou Salamo 37:10, 11, mo e fakaatā ma e tali. Ti fakamaama e veveheaga 3.

◼ “Manatu nakai a koe to hoko mai e aho ka fakamoli e tau kupu nei?” Totou Isaia 33:24, mo e fakaatā ma e tali. Ti fakamaama e veveheaga 3.

◼ “Kua manamanatu nakai a koe neke iloa he tau tagata mamate e tau mena ne taute he tau tagata momoui?” Fakaatā ma e tali. Ti totou Fakamatalaaga 9:5, mo e fakamaama e veveheaga 6.

◼ “Manatu nakai a koe to maeke ia tautolu he taha aho ke liu kitia e tau fakahele ha tautolu ne mamate, tuga ne talahau e Iesu he tau kupu nei?” Totou Ioane 5:28, 29, mo e fakaatā ma e tali. Ti fakamaama e veveheaga 7.

◼ “Puhala fe he manatu e koe ka maeke e finagalo he Atua ke taute he lalolagi tuga ke he lagi, he talahau he liogi talahaua nei?” Totou Mataio 6:9, 10, mo e fakaatā ma e tali. Ti fakamaama e veveheaga 8.

◼ “Manatu nakai a koe hane nonofo a tautolu he magahala ne fakakite he perofetaaga nei?” Totou 2 Timoteo 3:1-4, mo e fakaatā ma e tali. Ti fakamaama e veveheaga 9.

◼ “Tokologa e tagata ne manamanatu ke he kakano ne au atu e kelea he tau lekua he tau tagata. Kua manatu nakai a koe to maeke moli e mena nei?” Totou Fakakiteaga 12:9, mo e fakaatā ma e tali. Ti fakamaama e veveheaga 10.

◼ “Kua fa manako nakai a koe ke iloa e tali ke he hūhū pehenei?” Totou Iopu 21:7, mo e fakaatā ma e tali. Ti fakamaama e veveheaga 11.

◼ “Manatu nakai a koe to maeke he tomatomaaga nei he Tohi Tapu kane mai fakagahuahua ke lagomatai e tau tagata ke olioli e moui magafaoa fiafia?” Totou Efeso 5:33, mo e fakaatā ma e tali. Ti fakamaama e veveheaga 14.

Kua lata ke hokotaki e fakaakoaga Tohi Tapu ka takitaki ke lagaua he mole e fakatātā e fakaholoaga he fakaakoaga, mo e kaeke kua fai kakano ne kitia to matutaki e fakaakoaga.