Kua Fakatoka e Lautolu e Fakafifitakiaga he Tua Fakamooli
1 Ne kamata he tau 1937 e taha puhala gahua mau foou—ko e gahua paionia pauaki. Ko e tau taane mo e tau fifine ne makai mo e iloa lahi ke he fekafekauaga faka-Kerisiano, ne talia fiafia e tau kotofaaga ke gahua he ha matakavi ne kotofa he fakatokatokaaga. Mogonei, ne loga e tau tau he mole, kua matutaki e tau paionia pauaki ke fakatoka e fakafifitakiaga mitaki he tua fakamooli ke fifitaki ki ai.—Hepe. 6:12.
2 Ne Takitaki e Lautolu: He kamataaga, ne takitaki he tau paionia pauaki e gahua fakamatala he fakaaoga e lapakofe fakatagi utafano he tau gutuhala he tau tagata. Ne fakaaoga foki e lautolu e tau lapakofe ne tapaki mo matapatu aki e tau fakatutalaaga Tohi Tapu he tau liu aahi atu. Ne taute e mena nei he tau taone lalahi ne fitā e tau fakapotopotoaga he fakatūtū. Fakamui, ne kua fakafano atu e tau paionia pauaki ke he tau matakavi ne lahi e manako lagomatai ma e tau tagata fakamatala he Kautu. Ne liu aahi atu a lautolu ke he tau tagata oti ne fiafia mo e taute e tau fakaakoaga Tohi Tapu. Ko e fua he fakamakamaka ha lautolu, totou teau e tau fakapotopotoaga foou ne fakatūtū. Ko e gahua tumau ha lautolu ke he gahua evagelia kua lafi ke he tupu ki mua he fakatokatokaaga ne kitia e tautolu he vahā nei. (Isaia 60:22) Kua fakatumau e tau paionia pauaki ke taute e gahua aoga lahi he fakamatala e tala mitaki “ke he tau tagata oti ke he lalolagi.”—Kolo. 1:23.
3 Mitaki ke Fifitaki ki Ai: Falu paionia pauaki kua leva e gahua mau ke he fekafekauaga. He tau tau kua mole, ko e tau tagata taane mo e tau fifine tua fakamooli nei ne kua hakahaka e tua ha lautolu he tau tutuaga kehekehe. (1 Pete. 1:6, 7) Kua makai a lautolu ke toka ha lautolu a tau tutuaga hagahaga mitaki fakatino ke maeke ke fekafekau he tau matakavi ne manako lagomatai pauaki. Falu ia lautolu mogonei kua momotua mo e fehagai mo e nakai tino malolō, po kua fehagai mo e tau tutuaga uka. (2 Kori. 4:16, 17) Ka e, he ‘vaha fuakau kua fua mai agaia a lautolu.’ (Sala. 92:14) Ne falanaki a lautolu ki a Iehova mo e moua haana monuina.—Sala. 34:8; Fakatai 10:22.
4 Kua lata mooli e tau paionia pauaki ke moua e navaaga mafanatia ha tautolu. Kaeke fai paionia pauaki ne kotofa ke he fakapotopotoaga ha mutolu, kia fakaaoga fakamitaki e taha magaaho mo lautolu mo e aoga mai he tau lotomatala ha lautolu. Fakakite e loto fakaaue ke he fekafekauaga ha lautolu ko e tau tagata fakailoa tua fakamooli he Kautu. Moua e fakamalolōaga mai he mauokafua ha lautolu. Ko lautolu oti ne fifitaki e tua ha lautolu to olioli pihia foki e taliaaga mo e monuina ha Iehova kakano “kua fiafia a ia, kia lautolu kua eke e tau mena moli.”—Fakatai 12:22.