Tau Fakailoaaga

◼ Tohi foaki ma Iulai mo Aokuso: Ha porosua kua lata ne 32 e lau kua maeke ke fakaaoga. Sepetema: Ko e Mena Galo he Fiafia he Magafaoa. Ma e taha foaki foki, maeke ia koe ke foaki e porosua Kia Mataala! Oketopa: Ko e tau mekasini Ko e Kolo Toko mo e Awake! Ka fakakite e fiafia, foaki e porosua Manako, taute e laliaga pauaki ke kamata e tau fakaakoaga Tohi Tapu.

◼ Kamata ia Sepetema, to taute he tau leveki takaiaga e lauga ke he toloaga ne fakamataulu “Ko e Ha Kia Takitaki he Tohi Tapu?”

◼ Kua mitaki ke ta atu e tau tohi ole ke paionia mau ke he la ofisa kavi ke 30 e aho ato hoko e aho ne ole ke kamata ai. Kua lata e tohikupu he fakapotopotoaga ke liu kikite e tau laupepa ole ke iloa moli kua fakapuke katoa ai. Ka nakai manatu he tau tagata ne tohi ole e aho ne papatiso a lautolu, kua lata ia lautolu ke fuafua e aho ti fakamau ai. Kua lata he tohikupu ke fakamau e aho ia he laupepa Congregation’s Publisher Record (S-21).

◼ Kua lata e tohikupu he tau fakapotopotoaga ke moua e Pioneer Appointment Letter (S-202) ma e tau paionia mau takitaha he fakapotopotoaga. Kaeke nakai moua, fakamolemole tohi ke he la ofisa.

◼ Ka ta atu a koe ke he fale gagao ti manako ke moua he tau motua ke ahi atu he matakavi, he tau maaga lalahi, mo e tau motua ne gahua he Matakau Ahiahi Tagata Gagao e higoa hau, ko e heigoa hau ka taute? Ka tala age ko koe taha he Tau Fakamoli a Iehova, lata foki ia koe ke fakamaama nukua manako a koe ke ahi atu e taha fekafekau he Tau Fakamoli a Iehova ki a koe. I Niu Silani, ko e Health Information Privacy Code 1994, fakagahua i lalo hifo he malolo he Privacy Act, kua puipui a koe, ka ko e taliaaga hau ka fakaata e tau motua ke iloa ko koe haia he fale gagao mo e foaki e fakamalolo fakaagaga. Loga e laupepa fakapuke ka toka e tagata he fale gagao kua ha ha ai e fakaataaga ke ole ma e akoako ke ahi atu he tiki e puha “would you like a chaplain to visit you?” Ko e tiki ka fakailoa ke he fale gagao kua talia a koe ke ahi atu e motua he fakapotopotoaga po ke taha mai he Matakau Ahiahi Tagata Gagao.

Lagomatai e Fanau Hau ke Holo ki Mua he Fekafekauaga

¹ Kua ha ha he tau matua Kerisiano e matagahua lahi ke fakamahani e tau fanau ha lautolu ke he fekafekauaga kamata mai he vaha ikiiki. Loga e puhala kua maeke ke taute e mena nei. Falu fanau kua maeke ke talahau manatu e tau kupu Tohi Tapu kua felauaki ato iloa a lautolu ke totou. Maeke e mena nei ke hokulo e lauiaaga mitaki ke he tau tagata fanogonogo. He lalahi hake a lautolu ne ikiiki, to lahi atu e mena ka maeke ia lautolu ke taute he fekafekauaga. Maeke fefe e tau matua ke lagomatai e tau fanau ke fai vala he fakamatala? To liga lahi e lagomatai he tau manatu ka mui mai.

² Ka oti e fakafeleveia, liga pehe a koe:

◼ “Fai kupu tohi kakano e haku tama tane, [hana higoa], kua manako a ia ke logona e koe.” Liga pehe e tama hau: “Ko e kupu tohi nei ia Salamo ne fakaako ki a au e higoa he Atua. [Totou he tama po ke talahau manatu e Salamo 83:18.] Kua tutala e tau mekasini nei ke he tau mena ka taute e Iehova ko e Atua ma tautolu. Maeke nakai au ke toka e tau lagaki e ma hau?” Maeke ia koe ke fakaoti e fakatutalaaga he fakamaama e puhala ne lagomatai e gahua he lalolagi katoa.

³ Po ke liga taute e koe e fakafeleveia nei:

◼ “Fakaalofa atu. Ko e fakamahani au he haku tama fifine, [hana higoa], ke fakakite e loto manamanatu ma e falu he maaga. Manako a ia ke talahau e fekau ku mai he Tohi Tapu ki a koe.” Maeke he tama ke pehe: “Taha e puhala ne manako au ke lagomatai e tau tagata ko e tutala ke he amaamanakiaga he Tohi Tapu ma e vaha anoiha. [Totou he tama po ke talahau manatu e Fakakiteaga 21:4.] Kua fakamaama mai he tau mekasini nei e mena ka taute he Kautu he Atua ma tautolu. Manatu au to liga fiafia a koe ke totou ai.”

⁴ Ko e fakatumau ke fakaaoga e fakafeleveiaaga mukamuka ka fakaata e tau fanau ke moua e loto malolo kua maeke ia lautolu ke talahau e fekau he Kautu. Ka matapatu e fakamahani ke he vagahau fakamitaki mo e leo lahi to tauteute a lautolu ke tutala he ha tutuaga. Ko e tauteute tuai fakamitaki mo e nava moli ka lagomatai a lautolu ne ikiiki ke talahau e tua ha lautolu.

⁵ Mo e tau fakamaloloaga pihia, tokologa ia lautolu ne ikiiki kua hokotia ke eke mo tau tagata fakailoa nakaila papatiso. Ko e olioli ha ia ke kitia e tau fanau ha tautolu hane tupu ki mua he fekafekauaga faka-Kerisiano!​—Sala. 148:12, 13.