Tohi he Tohi Tapu Numera 64—3 Ioane
Tagata Tohia: Aposetolo ko Ioane
Matakavi Tohia: Efeso, po ke tata ki ai
Katoatoa he Tohia: k. 98 V.N.
KUA tohia e tohi nei ki a Kaio, ko e Kerisiano tua fakamooli ne ofania mooli e Ioane. Ko e mena mahani mau e higoa Kaio he magahala ia he fakapotopotoaga fakamua atu. Ne lagafā e tū e higoa he tau Tohiaga Tapu Heleni Kerisiano, ne hagaao ke he liga tolu po ke fā e tagata taane kehekehe. (Gahua 19:29; 20:4; Roma 16:23; 1 Kori. 1:14) Ne nakai fai vala tala ne moua ne maeke ke fakakite ko Kaio fe ne tohi a Ioane ki ai mai ia lautolu ia. Ko e iloa ni e tautolu ko Kaio ko e tagata he fakapotopotoaga Kerisiano, ko e kapitiga fakahele ha Ioane, ti kua fakamataulu e tohi ki a ia ni, ko e kakano haia ati kitia tumau e kupu “koe” ke he tokotaha ni.
2 Ha kua tatai e puhala ne hafagi mo e fakaoti aki ke he tohi Ua Ioane ti kua fakakite he tagata tohia a ia “ko e patu,” kua nakai fai fakauaua ko e aposetolo ko Ioane ne tohia foki e tohi nei. (2 Ioa. 1) Ha kua fetataiaki e tau kakano mo e puhala vagahau, tuga he tau tohi ua fakamua, kua fakakite ai ne liga tohia i Efeso po ke tata ki ai, he kavi 98 V.N. Ha kua kū, ne lavea e tau tagata tohia fakamua atu ke fatiaki mai i ai, ka kua tū fakalataha ai mo e tohi Ua Ioane he tau ketaloko fakamua atu he tau Tohiaga Tapu omoomoi.
3 I loto he tohi ne fakakite e Ioane e loto fakaaue ki a Kaio he fakakite e fakamokoi ki a lautolu e tau matakainaga faifano, ti talahau e ia falu lekua he taha tagata ne fia mua ko Tioterefe. Ko Temetiu ne totoku kua liga ko ia ne ta atu e tohi nei ki a Kaio, ti liga fakafano atu e Ioane a ia ti kua lata ke moua e fakamokoi atu ha Kaio he fenoga haana, ke haohao mitaki e tohi. He tala ki a Kaio, ne nakai fai mena foki ne iloa e tautolu ki a Tioterefe mo Temetiu ka kuenaia he tau kupu nei ne totou e tautolu ki ai. Pete ia, kua foaki he tohi e kitiaaga nukua tata e fakamatakainaga he lalolagi katoa he tau Kerisiano fakamua atu. Ke he falu mena foki, kua putoia he tau mena nei e aga ke leveki fakamokoi atu ki a lautolu e tau leveki faifano “ha ko e higoa,” pete kua nakai feiloaaki fakatagata a lautolu nei.—Kupu 7.
KAKANO NE AOGA AI
5 Ne fakakite he aposetolo ko Ioane a ia ko e leveki faifano fakafifitaki mitaki he makutu a ia ke puipui e fakapotopotoaga mai he tau fakaohooho kelea. Ne nava ai ke he agaaga fakaalofa mo e fakamokoi ne hufia ke he fakapotopotoaga, ti ko e kotofaaga mooli ha lautolu ke fakatumau e tuaga fiafia nei, ke maeke he tau matakainaga he matakavi mo e “tau tagata kehe” (lautolu ne nakaila iloa he tau Kerisiano ne leveki atu ai) ne o mai ia lautolu ke fekafekau fakalataha ko e “tau lagomatai ke he kupu moli.” (Kupu 5, 8) Pete ia, ne mata fakatokoluga a Tioterefe, ko e mena kua vihiatia e Iehova, ti kua nakai fakalilifu a ia ke he takitakiaga fakateokarasi, ti vagahau kelea foki hagaao ke he aposetolo ko Ioane. (Fakatai 6:16, 17) Kua fakamataofi e ia e aga fakamokoi faka-Kerisiano he fakapotopotoaga. Ko e mena ia ni ati vagahau fakamalolō a Ioane ke he kelea muitui nei ka e fiafia ke he fakaalofa faka-Kerisiano mooli i loto he fakapotopotoaga. Kua lata ia tautolu ke fakamakutu pihia foki he vahā nei ke fakatumau e mahani fakatokolalo, ō fano he kupu mooli, mo e taute e mahani Atua mo e fakamokoi, ti kua felauaki mo e matapatu fakaakoaga ne talahau e Ioane: “Ko e tagata kua mahani mitaki, mai he Atua ni a ia; ka ko e tagata mahani kelea, nakai kitia e ia e Atua.”—3 Ioa. 11.