Veveheaga 11

Tauteute e Ioane e Puhala

HOGOFULUMAFITU ia e tau tau he mole tali mai he tama 12 tau a Iesu ne huhu mena ke he tau akoako he faituga. Ko e vaha tau tupu he tau 29 V.N., mo e tau tagata oti, kua tuga, ko e tala hagaao ke he kasini ha Iesu ko Ioane, hane fakamatala ke he motu ne takai he Vailele ko Ioritana.

Ko Ioane moli ko e tagata malolo, pihia ua ke he hana tauteuteaga mo e vagahau. Ko e hana tau mena tui ko e ie fulufulu kamela mo e pipi e ia e pipi kili manu ke he hana tokupu. Ko e hana mena kai ko e tau he akerisi mo e meli vao. Ko e hana fekau? “Kia tokihala a a mutolu; ha ko e mena kua tata mai tuai e kautu he lagi.”

Ko e fekau nei kua fiafia lahi hana tau tagata fanogonogo. Tokologa ne mailoga kua lata ia lautolu ke tokihala, ko e kakano ke hiki e tau manamanatuaga mo e tiaki ha lautolu a puhala moui fakamua ne nakai mitaki. Ti mai he tau matakavi oti ne takai i Ioritana, ti pihia foki a Ierusalema, ne o mai tokologa e tau tagata ki a Ioane mo e papatiso e ia a lautolu, fakatanumia he vai i Ioritana. Ko e ha?

Ne papatiso e Ioane e tau tagata ko e mena fakamailoga, po ke fakailoaaga he ha lautolu a fakatokihala mai he tau loto ma e tau hala ke he maveheaga he Fakatufono he Atua. Ti ko e mena ia, ke he falu Farasaio mo e tau Satukaio ne o mai ki Ioritana, ne fakahala e Ioane a lautolu. “Ko e fuifui he tau gata gagau na e,” he talahau e ia. “Kia fua mai a mutolu e tau fua ke lata mo e tokihala; aua foki neke manatu hifo a mutolu, kua pehe, Ko Aperahamo e matua ha mautolu; ha ko e mena tala atu e au kia mutolu, kua maeke ni ke he Atua ke fakatupu mai he tau maka nai e fanau ma Aperahamo. Ka kua toka tuai e toki ke he tau fu akau; ko e tau akau oti foki nakai fua mai ainei e tau fua mitaki to hio ia mo e tolo ni ke he afi.”

Ha kua tokologa ne fanogonogo ki a Ioane, ne fakafano he tau Iutaia e tau ekepoa mo e tau tagata Levi ki a ia. Ne huhu a lautolu ia: “Ko hai kia a koe?”

“Nakai ko e Keriso au,” he talahau e Ioane.

“Ti ko e heigoa?” he huhu e lautolu. “Ko Elia kia a koe?”

“Nakai ko au,” he tali e ia.

“Ko e Perofeta kia a koe?”

“Nakai.”

Ti fakamakamaka atu a lautolu: “Ko hai kia a koe? kia uta e mautolu e tonu kia lautolu ne fakafano mai a mautolu; ko e heigoa kia hāu a talahau kia koe ni?”

Ne fakamaama e Ioane: “Ko au ko e leo he taha ne ui ke he tutakale, Fakahako a e puhala a Iehova, tuga ne talahau mai ai he perofeta ko Isaia.”

“Ti ko e heigoa e mena ne papatiso ai e koe,” kua manako a lautolu ke iloa, “ka nakai ko e Keriso a koe, ti nakai ko Elia, ti nakai Ko e Perofeta?”

“Kua papatiso e au ke he vai,” he tali e ia. “Ha ne tu mai e taha ke he vaha loto ha mutolu, nakai iloa e mutolu a ia, ko ia haia ne mui mai kia au.”

Kua tauteute e Ioane e puhala ke ha ha he tau tagata e tau loto mitaki ke talia e Mesia, ka eke ia mo Patuiki. Ki a Ia nei, ne pehe a Ioane: “Ko ia ka mui mai kia au, ne homo atu a ia ia au, nakai aoga au ke uta fano hana tau afialoalohui.” Ko e moli, ne pehe foki a Ioane: “Ko ia ka mui mai kia au, kua mua a ia kia au, ha ko e mena ne mua tuai a ia kia au.”

Ti ko e fekau ha Ioane, “kua tata mai tuai e kautu he lagi,” ko e fakailoaaga ke he tau tagata ko e feua he Patuiki ne fifili e Iehova ko Iesu Keriso, ko e kamata hane fai. Ioane 1:​6-8, 15-28; Mataio 3:​1-12; Luka 3:​1-18; Gahua 19:4.

▪ Ko e tagata fefe a Ioane?

▪ Ko e ha ne papatiso e Ioane e tau tagata?

▪ Ko e ha ne pehe ai a Ioane kua tata mai tuai e Kautu?