Veveheaga 37

Utakehe e Iesu e Momoko he Takape

NAKAI leva e mole he fakamalolo e fekafekau he takitaki kautau, ne finatu a Iesu ki Naina, ko e loto maaga ne molea e 32 e kilomita ke he fahi toga ki lalo i Kapanaumi. Ne fakalataha a ia mo e hana a tau tutaki mo e moto tagata. Liga ko e magaaho afiafi ne hohoko atu a lautolu ki fafo i Naina. Ko e mena nei ne feleveia a lautolu mo e fenoga mauku. Ko e tino mate he tama fuata ne tauloto ke uta ke tanu ki fafo he maaga.

Ne matematekelea lahi e tuaga he matua fifine, ha ko e takape a ia, ti ko e tama fuataha ni a ia hana. Ko e magaaho ne mate e hana tane, ne maeke ia ia ke mafanatia kakano ha ko e hana a tama tane. Ko e hana tau amaamanakiaga, tau manako, mo e tau foliaga ko e hagaao oti ni ke he hana tau aho i mua. Ka ko e magaaho nei kua nakai fai tagata ke mafanatia ki ai. Ne lahi mahaki hana a maanu he fakatauo e tau tagata he taone fakalataha mo ia ke he tanuaga.

Ko e magaaho ne kitia atu e Iesu e fifine, ne aamohia hana a loto ke he momoko lahi he fifine. Ko e hana a fakaalofa hofihofi, mo e malolo kua fakakite e mauokafua, ati pehe a ia ki a ia: “Ua tagi a koe.” Ko e hana a aga mo e tau tauteaga mena ati onoono e moto tagata. Ti ko e magaaho ne finatu a ia mo e piki ke he fata ne tauloto ai e tino, ne tutu a lautolu ne tauloto. Ne manamanatu oti a lautolu ko e heigoa la hana ka taute.

Ko e moli ko lautolu ne fakalataha mo Iesu kua kitia a ia he fakamalolo fakamana e tau tagata gagao. Ka ko e moli nakai la kitia e lautolu a ia he fakatu hake ha tagata mai he mate. Maeke nakai a ia ke taute taha mena pihia? Ne vagahau hagaao ke he tino, kua poaki a Iesu: “Ko e fuata na e, kua tala atu e au kia koe, Ati matike a.” Mo e matike hake e tagata! Ne kamata a ia ke vagahau, mo e tuku age e Iesu a ia ke he hana a matua fifine.

Ko e magaaho ne kitia he tau tagata kua moui moli e tama fuata, ne kamata a lautolu ke vagahau: “Kua tupu kia tautolu nai e perofeta kua mua.” Ka e pehe e falu: “Kua ahi mai foki he Atua hana motu.” Ne mafiti e fakapuloa ki Iutaia oti mo e tau fahi motu oti e tala ke he mena tupu ofoofogia nei.

Ko Ioane ko e Papatiso agaia he fale puipui, mo e manako a ia ke iloa foki e tau gahua ne maeke a Iesu ke taute. Ko e tau tutaki ha Ioane ne tala age ki a ia e tau mana oti nei. Ko e heigoa hana a tali? Luka 7:​11-18.

▪ Ko e heigoa e mena ne tupu he hoko a Iesu ki Naina?

▪ Lauia fefe a Iesu he mena ia ne kitia e ia, mo e ko e heigoa hana ne taute?

▪ Fefe e tali he tau tagata ke he tau mana ha Iesu?