Veveheaga 38

Lolelole Kia e Tua ha Ioane?

KO IOANE ko e Papatiso, i loto he fale puipui, liga taha ia e tau ke he magaaho nei, ne moua e hokotaki he liu fakatu mai e tama tane he takape i Naina. Ka e manako a Ioane ke iloa fakahako mai ni ia Iesu hagaao ke he kakano he mena nei, ti ko e mena haia ne fakafano e ia tokoua hana tau tutaki ke huhu: “Ko koe kia e Haele Mai, po ke leo atu a mautolu ke he taha?”

Mata kehe lahi e huhu, ha ko e mena kitia e Ioane e agaga he Atua ne hifo mai ki a Iesu mo e logona e leo he Atua ne talia fiafia he magaaho ne papatiso a Iesu teitei tuai ke katoa e ua tau fakamua. Ko e huhu ha Ioane liga fakahiku he falu ko e hana a tua kua lolelole. Ka e nakai pihia e mena nei. Ne nakai vagahau fakatokoluga e Iesu a Ioane, tuga he vagahau ke he magaaho nei, kane mai kua kamata a Ioane ke fakauaua. Ko e ha, mogoia, ne huhu e Ioane e huhu nei?

Na liga ko e manako a Ioane ke fakamoli mai e Iesu ko Ia ko e Mesia. To fakamalolo fakalahi he mena nei a Ioane ne matematekelea he fale puipui. Ka ko e moli, ha ha i ai fai kakano atu e huhu ha Ioane. Ko e manako moli hana ke iloa ko e fai tagata foki kia ka hau, ko e tagata ka mui mai, ke fakakatoatoa e fakamoliaga he tau mena oti ne perofeta ke taute he Mesia.

Ke lata ia mo e tau perofetaaga he Tohi Tapu ne mahani a Ioane, ko Ia ne Fakauku he Atua ka eke mo patuiki, mo e tagata fakahao. Ka e taha e mena, ko e toka agaia a Ioane ko e pagota, ke he loga e tau mahina he mole e papatisoaga ha Iesu. Ti ko e huhu moli a Ioane ki a Iesu: ‘Ko koe moli kia ke fakatu e Kautu he Atua ke he malolo lahi he tino, po ke ha ha i ai taha foki, ko ia ka mui mai, ka fakatali a tautolu ke fakamoli e tau perofetaaga fulufuluola oti hagaao ke he lilifu he Mesia?’

Ne nakai tala age ke he tau tutaki ha Ioane, ‘E, moli ko au a ia ne pehe ke hau!’ Ko Iesu he magaaho tonu ia ne lahi e fakatataaga ne taute ke fakamalolo e tau tagata tokologa, ne fakamaulu a lautolu mai he tau gagao mo e tau kafokia kehekehe. Ne tala age a ia ke he tau tutaki: “Ati o atu a mua, mo e fakailoa kia Ioane e tau mena ne kitekite a mua ki ai, mo e fanogonogo ki ai; kua ala e tau matapouli, kua o e tau kulikuli, kua fakamea e tau lepela, kua māgi e tau teligatuli, kua fakamamatike a lautolu ne mamate, kua fakamatala e vagahau mitaki ke he tau tagata nonofogati.”

Ko e taha talahauaga, ko e huhu ha Ioane ne fai amaamanakiaga ke lahi atu foki e gahua ha Iesu ne taute mai he tau gahua ne kua fita he taute mo e liga fakatoka mai foki e ia a Ioane. Ka e taha e mena ko Iesu, ne tala age ki a Ioane ke ua amaamanaki atu ke fai mena foki mai he tau mana ne fa e taute e Iesu.

Ko e magaaho ne o kehe e tau tutaki ha Ioane, ne fuluhi a Iesu ke he moto tagata mo e tala age ki a lautolu ko Ioane e “fekau” ha Iehova ne talahau tuai mai ia Malaki 3:1 mo e ko e perofeta foki ko Elia ne talahau tuai mai ia Malaki 4:​5, 6. Ti fakaheke e ia a Ioane ko e perofeta ne tatai ni mo e tau perofeta ne momoui fakamua ia ia, he fakamaama: “Ko e moli, ke tala atu e au kia mutolu, nakai tu mai taha ia lautolu ne fanau mai he tau fifine ke mua kia Ioane ko e Papatiso; ka ko ia ne tote ue atu ke he kautu he lagi, kua mua a ia kia ia. Ne kamata mai foki he vaha kia Ioane ko e Papatiso, kua hoko ke he vaha nai, kua hou e kautu he lagi.”

Kua fakakite e Iesu he mena nei nakai ko Ioane taha he Kautu he lagi, ha ko ia ne tote ue atu i ai ne mua atu ki a Ioane. Ne tauteute e Ioane e puhala ma Iesu ka e mate fakamua a ia to fakamau e Keriso e maveheaga mo e hana tau tutaki, ke eke a lautolu mo tau pule fakalataha mo ia ke he hana Kautu. Ko e mena haia ne pehe a Iesu to nakai ma e Kautu he lagi a Ioane. Ka ko Ioane taha he Kautu he Atua he lalolagi. Luka 7:18-30; Mataio 11:2-15.

▪ Ko e ha ne huhu e Ioane ko Iesu kia e Haele Mai po ke leo ke he taha foki?

▪ Ko e heigoa e tau perofetaaga ne talahau e Iesu ne fakamoli e Ioane?

▪ Ko e ha a Ioane ko e Papatiso ne nakai fakalataha mo Iesu ke he lagi?