Veveheaga 51

Kelipopo he Fakamanatuaga he Aho Fanau

MOLE e foaki e tau fakaakoaga ke he hana tau aposetolo, ne fakafano e Iesu a lautolu ke he fonua takitokoua. Liga fakatauo ni e tau matakainaga ko Peteru mo Aneterea, pihia foki ni a Iakopo mo Ioane, Filipo mo Patolomaio, Toma mo Mataio, Iakopo mo Tataio, mo Simona mo Iuta Isakariota. Ko e ono e tau hoa he tau evagelia ne fakapuloa e tala mitaki he Kautu mo e fakamalolo fakamana ke he tau mena oti ne o a lautolu ki ai.

Ko e magaaho taha ia, ne nofo agaia a Ioane ko e Papatiso he fale puipui. Ha ha i ai a ia kua liga teitei ke ua e tau he magaaho nei. Liga manatu e koe kua fita he fakailoa e Ioane ke he tau tagata e hepe lahi ha Herota Anetipa ke uta a Herotia, ko e hoana he hana matakainaga ko Filipo, ma hana. Ha kua talahau e Herota Anetipa ke mumuitua ke he Fakatufono faka-Mose, ko e mena haia ne fakatapakupaku e Ioane e fakalatahaaga faivao nei. Ko e mena haia ne liti e Herota a Ioane ke he fale puipui, liga ha ko e tau fakaohoohoaga a Herotia.

Ne mailoga e Herota Anetipa ko Ioane ko e tagata tane mahani tututonu ti fanogonogo mo e fiafia ki a ia. Ti ko e mena ia, ne nakai iloa e ia ko e heigoa ke taute aki a ia. Ka ko Herotia, ne vihiatia a Ioane mo e kumi puhala ke tamate aki a ia. Ko e fakahikuaga, kua hoko mai e magaaho ne fakatali a ia ki ai.

Nakai leva to hoko e Paseka he 32 V.N., ne tauteute e Herota e fakamanatuaga lahi ma e hana a aho fanau. Ne fakapotopoto ke he fakamanatuaga ko e tau iki mo e tau pule he tau kau oti ha Herota, pihia foki mo lautolu e tau patu lalahi i Kalilaia. Ko e fanoaga he afiafi, ko Salome, ko e tama fifine fakamui ha Herotia mo e tane fakamua hana ko Filipo, kua fakafano mai ki loto ke koli ma e tau fenoga. Ko e tau tane ne kitekite kua nonoiki he hana a koli.

Ne fiafia lahi a Herota ki a Salome. “Ati tala mai a e koe kia au e mena ne manako a koe ki ai, to atu e au kia koe,” he talahau e ia. Ne omonuo foki e ia: “Ko e taha mena ka ole mai ai e koe, to atu ai e au māu, ke hoko ke he veveheua he haku a kautu.”

Ato tali atu, ne fina atu a Salome ke fakatuuta mo e hana matua fifine. “Ko e heigoa e mena ke ole ai e au?” he huhu atu e ia.

Ko e magaaho hanei kua moua! “Ko e ulu a Ioane ko e papatiso,” he tali e Herotia mo e nakai fai fakauaua.

Ne mafiti e liu atu ha Salome ki a Herota mo e tuku age e ole: “Kua loto au ke ta mai e koe kia au a magaaho e ulu a Ioane ko e Papatiso ke he kumete.”

Ne tupu lahi e fakaatukehe ha Herota. Ka e taha e mena ha kua logona he tau tagata ne uiina hana omonuo, kua ma a ia ke nakai foaki age, pete ni ko e kakano he mena nei ke kelipopo e tagata nakai fai hala. Kua fakafano fakatepetepe e tagata ke kelipopo ke he fale puipui mo e hana tau poakiaga matakutakuina. Nakai leva ne liu mai a ia mo e ulu ha Ioane he kumete, mo e age ki a Salome. Ko ia mogoia, ne uta mo e age ke he matua fifine hana. Ko e magaaho ne logona he tau tutaki ha Ioane e mena ne tupu, ne o a lautolu mo e uta hana tino mo e tanu ai, ti hokotaki e lautolu e tau mena ia ki a Iesu.

Ko e mogo fakamui, he magaaho ne logona e Herota ne fakamalolo e Iesu e tau tagata mo e vega kehe e tau temoni, ne matakutaku a ia, matakutaku he manatu ko Ioane a Iesu kua liu tu mai he mate. Ko e mena haia, ne manako lahi a ia ke kitia a Iesu, nakai ke logona hana fakamatalaaga, ka e ke fakamoli ko e pihia moli nakai tuga e hana a matakutaku. Mataio 10:​1-5; 11:1; 14:​1-12; Mareko 6:​14-29; Luka 9:​7-9.

▪ Ko e ha ne ha ha i ai a Ioane ke he fale puipui, mo e ko e ha ne nakai manako a Herota ke tamate a ia?

▪ Maeke fefe a Herotia he magaaho fakamui ke kelipopo a Ioane?

▪ He mole e mate ha Ioane, ko e ha ne manako a Herota ke kitia a Iesu?