Veveheaga 61

Kua Fakamalolo e Tama ne Hu Temoni

HA KUA o agaia a Iesu, Peteru, Iakopo, mo Ioane fakalata ke he kaukau Mouga ko Heremoni, ko e falu he tau tutaki kua fai mena vihi. Ko e magaaho ne liu mai a ia, ne mailoga mafiti e Iesu e fai mena kua nakai tonu. Ne ha ha i ai e moto tagata ne agaagai he hana a tau tutaki, mo e taufetoko e tau tohikupu mo lautolu. Ko e magaaho ne kitia a Iesu, ne ofomate e tau tagata mo e tafepoi ke fakafeleveia a ia. “Po ke heigoa e mena ne hūhu ai a mutolu kia lautolu?” he huhu e ia.

Ne hau e taha ki mua he moto tagata, ne fakatokotui e tagata tane i mua ha Iesu mo e fakamaama: “Ko e akoako na e, kua ta mai tuai e au haku a tama tane kia koe, ha i ai e agaga kuhukuhu. Ko e tau mena oti ne moua ai a ia, kua palu hifo a ia; ti ifo e gutu, mo e konoi hana tau nifo, kua mao kikiha foki hana a tino; ti kua tala age tuai e au ke he tau tutaki hau kia vega ai e lautolu a ia, ka e nakai maeke kia lautolu.”

Kua fakaaoga he tau tohikupu e kaumahala he tau tutaki ke fakamalolo e tama tane he liga va ke he ha lautolu a lali. Ko e magaaho tonu ia, ne hoko mai a Iesu. “Ko e hau nakai tua na e,” he talahau e ia, “to fakalataha a tautolu mo mutolu ato a fe? to fakauka foki au kia mutolu ato a fe?”

Liga vagahau e tau kupu ha Iesu ki a lautolu oti ne fakalataha ai, ka e nakai fakauaua ko e vagahau fakahako ki a lautolu e tau tohikupu, ne fa e fakalagalaga hana a tau tutaki. Ne vagahau a Iesu hagaao ke he tama tane. “Ati ta mai a a ia kia au.” Ka ko e magaaho ne hau e tama tane ki a Iesu, ko e temoni ne hu ia ia ne poka a ia ke he kelekele mo e fakafitikia fakakelea a ia. Ne miko fano e tama tane he kelekele mo e ifo hana a gutu.

“Ko e vaha fe ne hoko ai e mena na kia ia?” he huhu e Iesu.

“Tali mai he tote,” he tali he matua tane. “Kua liti mau [he temoni] foki a ia ke he afi, katoa mo e vai kia kelipopo ai a ia.” Ne olelalo e matua tane: “Kaeke ke maeke ia koe ha mena, kia fakaalofa mai a a koe kia mautolu, mo e lagomatai mai a koe kia mautolu.”

Liga ko e fiha ia e tau tau, he kumi lagomatai e matua tane. Mo e ko e magaaho nei, ha kua kaumahala e tau tutaki ha Iesu, kua lahi mahaki hana a fakaatukehe. Ne momoko a Iesu ke he ole fakafi he tagata, ti fakamalolo e Iesu mo e pehe: “Kaeke kua maeke ke tua a koe, kua maeke e tau mena oti kana ke he tagata kua tua.”

“Kua tua ni au,” he tagi fakatepe he matua tane, ka e olelalo a ia: “Kia lagomatai mai a a koe ke he haku a nakai tua.”

Ne mailoga e moto tagata kua tafepoi mai ki a lautolu, ti hataki e Iesu e temoni: “Ko koe na, e agaga kuhukuhu mo e teliga tuli, kua tala atu ni e au kia koe, ati hau a ki fafo ia ia; aua foki neke liu hu a koe ki loto ia ia.” Ko e magaaho ne fano kehe e temoni, ne liu e tama tane tagi fakalahi mo e fakafitikia fakalahi. Ne nakai lutu e tama tane he takoto he kelekele, ati pehe e tau tagata tokologa: “Kua matepopo tuai a ia.” Ka e toto e Iesu e lima he tama tane, ti matike hake a ia.

Ko e magaaho fakamua ne fakafano e tau tutaki ke fakamatala, ne vega e lautolu e tau temoni. Ti ko e magaaho nei, he huhu a lautolu ki fale, ne huhu a lautolu ki a Iesu hoko lautolu ni: “Ko e heigoa e mena nakai maeke ai ia mautolu ke vega a ia?”

Ne mailoga e nakai tua ha lautolu, ti tali a Iesu: “Ko e liogi mo e fakakanopogi hokoia ke maeke ai he fano kehe e tau mena pehena.” Ko e moli kua lata ni ke fai tauteaga ke vega kehe e temoni malolo pihia ke he mena nai ne tupu. Ko e tua malolo fakalataha mo e liogi ke ole ke he malolo he Atua ke lagomatai.

Ne lafi atu foki e Iesu: “Ha ko e moli, ke tala atu e au kia mutolu, kaeke ke lata ha mutolu a tua mo e fua sinapi, ka tala age a mutolu ke he mouga nai, Fano a a koe ke he mena ko; ti fano ai; nakai fai mena foki ke nakai maeke ia mutolu.” Ko e lahi ha a ia he malolo he tua!

Ko e tau pa mo e tau mena vihi ne taofi e tupu he gahua a Iehova to liga tuga e nakai maeke ke toli hake po ke lagaki ke tuga e mouga moli. Ka e taha e mena, ne fakakite e Iesu, kaeke ke feaki e tautolu e tua ke he tau loto ha tautolu, fakamalu mo e fakamalolo a ia ke tupu, to tolomaki atu ke motua mo e maeke ia tautolu ke kautu mai he tau pa mo e tau mena vihi ne tuga e tau mouga. Mareko 9:​14-29; Mataio 17:​19, 20; Luka 9:​37-43.

▪ Ko e heigoa e tau mena ne feleveia mo Iesu he liu mai a ia he Mouga ko Heremoni?

▪ Ko e heigoa e fakamaloloaga ne foaki e Iesu ke he matua tane he tama tane ne hu he temoni?

▪ Ko e ha ne nakai maeke he tau tutaki ke vega kehe e temoni?

▪ Fakakite fefe e Iesu e malolo he tua?