Tau Mena Tutupu Mai he 2012 Yearbook

Lau 59, paratafa 1-4

“Fakamolemole Liogi ma Lautolu ke Ahiahi ki a Au!”

Hogofulu e tau kua mole ne fifili a Patrick ke hiki mai i Angola ke he tau Faahi Kaufakalataha. Ka e matutaki tumau a ia mo e haana matua fifine ko Felicidade he telefoni. Ka e nakaila leva, ne maeke a laua ke fekitiaaki he puhala matutakiaga vitiō he Internet. He tutala mo ia, ne mailoga e ia fai tagata he poko mo e matua fifine ti hūhū ko hai. Ko Felicidade ko e taha he Tau Fakamoli a Iehova, ne pehē: “Ko e matakainaga fifine he fakapotopotoaga haaku ne hau ke ahiahi au.”

Ne tali e Patrick: “Ko e ha e Tau Fakamoli a Iehova ne nakai ahiahi ki a au? Hogofulu tuai e tau haaku hinei, ti aila fai ia ne hau ki a au. Fakamolemole liogi ma lautolu ke ahiahi ki a au!”

He ofo fakatote, ne tali a Felicidade mo e matakainaga fifine ne haia i ai: “E, to liogi a maua ma haau.”

Tolu ni e aho he mole, taha he Tau Fakamoli a Iehova ne fina atu ke he gutuhala ha Patrick. Ofo lahi a Patrick ti hūhū a ia ke he matua fifine haana kua fakatoka ke ia taha tagata he tau Faahi Kaufakalataha ke ahiahi age ki a ia. Nakaila taute e ia. Ne fakahiku e ia ko e ahiahi ko e tali mai he Atua ti talia e fakaako Tohi Tapu. Ne kamata agataha a ia ke fina atu ke he tau feleveiaaga oti. He taha magaaho foki ne kitia e ia e matua fifine haana puhala he matutakiaga vitiō, ne fakakite matalahi e ia ke he matua fifine e veveheaga he tohi Fakaako he Tohi Tapu ne fakaako e ia. Tala age foki a ia ke he matua fifine kua fakatau e ia e peleue mo e fihui taute taha ke tui ke he tau feleveiaaga.

RWANDA

Lau 183, paratafa 2

“Ahiahi” he Leveki Takaiaga e Fale Puipui

Taha he tau matakainaga taane ne fakamaama e mena ne tupu he fale puipui i Kigali he 1986: “Tokologa e matakainaga taane i ai. Ne taute e mautolu e feleveiaaga ke kitia e puhala ke lagomatai e tau matakainaga taane i fafo. Ne fifili a mautolu ke tohi e tohi ki a lautolu ke fakamalolō a lautolu. Tala age a mautolu ki a lautolu ka oti e fakamatala ha mautolu ke he fonua he fale puipui, to liliu a mautolu ki kaina. Ne fakamatala a mautolu he taha mohega ke he taha mohega mo e taute e tau fakaako Tohi Tapu. Fakamui, he logona e mautolu kua ahiahi mai e leveki takaiaga ke he tau fakapotopotoaga i fafo, ne manako foki a mautolu ke he ahiahi, ti liogi a mautolu ki a Iehova. Nakai leva he mole e mena ia, ko e Matakainaga ko Rwakabubu, ko e leveki takaiaga ne tuku he fale puipui ke lagaua aki. Ke he manatu ha mautolu, ke maeke a ia ke ahiahi ki a mautolu.”

Lau 186, paratafa 4

Taha e matakainaga fifine ko e faiaoga mo e takape ne tolu e tama, kua nakai talia ke tuku mena fakaalofa ke he kautau. He mena nei, ko e ulu faiaoga ne hokotaki ai ke he tau pule fakakautau, ti tuku a ia he fale puipui ke lagaua aki, kua fitā he tuku a ia he fale puipui he atu tau 1980. He feoho mai e tau matakau ke he taone ne nofo a ia he fale puipui, fai tagata ne hū pulenoa ke he fale puipui ti fehola oti e tau pagotā. Ka e nakai hola fakalataha mo e falu pagotā, ne nofo ni e matakainaga fifine he fale puipui. He o kehe e tau matakautau ne feoho atu, ne liu tapaki mo e hiki atu foki a ia ke he fale puipui he lotouho i Kigali. Ne liogi a ia i ai ke maeke ke iloa e aho he Fakamanatuaga, ha kua nakai manako a ia ke tonoa ai. Ofo lahi a ia he fakatoka mai a ia he mogo fakamui he aho tonu ia he Fakamanatuaga! Ha ko e tuuho haana, ne galo e fale mo e gahua faiaoga haana, ka kua eke a ia mo paionia fakamakutu.

Lau 198, paratafa 1, ke he lau 199, paratafa 1

Fakahao he Liogi he Tama Fifine Tote

He aho ne mole e pā e vakalele ti mamate e tau pelesiteni ha Rwanda mo Burundi, tokoono e kautau he fakatufono ne o atu ke he fale he Matakainaga ko Rwakabubu. Kua totototo e tau mata ha lautolu, ne elo e fafagu ha lautolu he kava, mo e tau mahani ha lautolu kua fakakite kua fakaaoga tulaki a lautolu. Ne poaki a lautolu ke age e tau kanavaakau tau. Tala age e Matakainaga ko Rwakabubu ki a lautolu ko ia mo e magafaoa haana ko e Tau Fakamoli a Iehova ti nakai fai kanavaakau tau a lautolu.

Ne iloa he tau kautau ko e Tau Fakamoli a Iehova kua tuuho, ne nakai talia ke lalago e fakatufono mo e nakai tuku e tau mena fakaalofa ke he kautau. Ne fakaita he mena nei e tau kautau. Nakai ko e tau Tutsi a Gaspard mo Melanie Rwakabubu, ka ko e tau Hutu e kautau Interahamwe ne nakai ni tamate e tau Tutsi ka e pihia foki e tau Hutu vahāloto, mua atu ka tuahā ki ai kua fakakite e lautolu e fakaalofa ke he tau Tutsi po ke tau kautau vale.

Ne tafolo aki he tau kautau e tau kākau a Gaspard mo Melanie, ti uta a laua fakalataha mo e tau tama tokolima ha laua ke he poko mohe. Ne hihi e lautolu e tau kafu he mohega mo e kamata ke uufi aki e magafaoa. Fai pomo e falu he tau lima ha lautolu ti kua maaliali e foliaga ha lautolu. Ne hūhū a Gaspard, “Liogi la mautolu fakamolemole?”

Taha e kautau ne fakaheu fakakelea e ole ha lautolu. Ti, he mole e fakatutalaaga, ko e tau kautau ne tehatehaua he talia ke liogi a lautolu. “Mitaki,” he ui e lautolu, “maeke a mutolu ke liogi ke ua e minuti.”

Ti liogi fakaeneene a lautolu ka ko Deborah Rwakabubu, ne ono e tau he moui ne liogi fakaleolahi: “Iehova, manako a lautolu ke tamate a mautolu, ka e maeke fēfē a mautolu ke taute e tau liu aahi atu ke he tau tagata ne fakamatala au mo Papa ki ai, ne toka e au lima e mekasini? Fakatali a lautolu ke liliu atu a maua, ti kua lata a lautolu ke iloa e tala mooli. Mavehe e au ki a koe ka momoui a mautolu, to eke au mo tagata fakailoa, papatiso, ti eke mo paionia! Iehova, fakahao a mautolu!”

He logona e mena nei, ne ofo e tau kautau. Fakahiku, taha ia lautolu ne pehē: “Ha ko e liogi he tama fifine tote nei, to nakai tamate e mautolu a mutolu. Ka o mai e falu ki hinei, tala age a mutolu ki a lautolu kua fitā a mautolu he o mai.”a

[Matahui Tala]