Veveheaga 64

Ko e Fakaakoaga he Fakamagalo Atu

LIGA ko Iesu agaia ni i fale i Kapanaumi mo e hana tau tutaki. Ne fakatutala a ia mo lautolu ke he tauteaga he tau mena vihi he vahaloto he tau matakainaga, ti huhu a Peteru: “Ko e Iki na e, to lagafiha kia he mahani kelea mai ai haku a matakainaga kia au, ti fakamagalo e au a ia?” Ha kua pehe e tau akoako lotu Iutaia ko e fakamagalo hake ke he laga tolu, liga ko e manatu a Peteru ko e fakamokoi lahi ke pehe “to lagafitu kia?”

Ka ko e manatu hepe lahi a ia ka taute e fakamauaga pihia. Ne fakahako e Iesu a Peteru: “Nakai tala atu e au kia koe ke lagafitu, ka kia laga fitugofulu kua taki fitu.” Ko e fakakite e ia e nakai fai fakakaupaaga ko e laga fiha e fakamagalo e Peteru hana a matakainaga.

Ke peehi ke he tau tutaki e ha lautolu a lata ke fakamagalo atu, ne tala age a Iesu ki a lautolu e tala fakatai. Ne hagaao ia ke he patuiki ne manako ke taute e totogiaga kaitalofa mo e hana a tau fekafekau. Ne taha e fekafekau ne ta mai ki a ia ne lahi mahaki e kaitalofa ko e 60,000,000 e tau tenari. Ne nakai fai puhala a ia ke totogi e kaitalofa. Ti ko e mena ne taute, he fakamaama e Iesu, ne ui e patuiki ke fakafua he tagata hana hoana mo e hana fanau ke totogi aki e kaitalofa.

Ko e mena ia ne fakaveli hifo e fekafekau ke he tau hui he hana a iki mo e olelalo: “Kia fakamanavalahi mai a koe kia au, to taui atu e au hau a tau mena oti.”

Ne hofihofi e fakaalofa ki a ia, ti fekau he iki ke tiaki fakaalofa noa e kaitalofa lahi mahaki ia he fekafekau nakai totogi. Ne nakai la leva e tauteaga ia, he matutaki e Iesu, ne kumi he fekafekau nei e matakainaga fekafekau ne kaitalofa ki a ia taha ni e 100 tenari. Ne tapaki he tagata nei hana a matakainaga mo e fofota e ua hana mo e pehe: “Kia taui mai a haku a tau mena ne toka ia koe.”

Ka e nakai ha ha he matakainaga fekafekau e tupe. Ti fakaveli fakafohifo a ia ke he tau hui he fekafekau ne kaitalofa a ia ki ai, mo e olelalo: “Kia fakamanavalahi mai a koe kia au, to taui atu e au hau a tau mena oti.” Ne nakai tuga e hana a iki, ne nakai fakaalofa fakaalofa noa e fekafekau, mo e tuku e ia hana a fekafekau ke he fale puipui.

Ko e mena ia, he matutaki e Iesu, ko e falu fekafekau ne kitia e mena ne tupu, ne o tala age ke he iki. Ne ui mo e ita lahi e ia e fekafekau. “Ko e fekafekau mahani kelea na e,” he talahau e ia, “ne fekau atu e au haku a tau mena oti ia ne toka ia koe, he olelalo mai a koe kia au; ka e nakai kia lata he fakaalofa noa age a koe ke he hau a matakainaga a fekafekau, ke tuga foki au ne fakaalofa noa atu kia koe?” Ha kua fakalagalaga ke ita, ne tuku atu he iki e fekafekau nakai fakaalofa noa nei ke he tau leveki pagota ato totogi oti hana a kaitalofa.

Ne fakahiku e Iesu: “To eke pihia foki haku a Matua ha he lagi kia mutolu, kaeke kua nakai takitaha a mutolu mo e fakamagalo mo e tau loto katoa ha mutolu e tau matakainaga ha mutolu ka mahani kelea mai a lautolu.”

Ko e mitaki ha ia he fakaakoaga he fakamagaloaga! Fakatatai ke he kaitalofa lahi he hala ne fakamagalo he Atua a tautolu, ko e ha holifono ne taute mai he matakainaga Kerisiano ki a tautolu kua tote lahi moli. Ko e taha mena foki, kua fakamagalo he Atua ko Iehova a tautolu laga loga e tau afe. Ne fa mahani, ke nakai mailoga e tautolu ha tautolu a tau hala ki a ia. Ti ko e mena ia, maeke nakai ia tautolu ke fakamagalo ha tautolu a tau matakainaga ke he laga fiha ni, pete ni he tonuhia a tautolu ke fai talahauaga? Manatu, ke tuga ne fakaako e Iesu he Lauga he Mouga, ko e Atua to “fakamagalo . . . kia mautolu ha mautolu a tau hala, tuga a mautolu ne fakamagalo atu kia lautolu ne eke fakakelea mai kia mautolu.” Mataio 18:21-35; 6:12; Kolose 3:13.

▪ Ko e heigoa ne fakalaga aki e huhu ha Peteru hagaao ke he fakamagaloaga he hana a matakainaga, mo e ko e ha he manatu e ia ko e fakamokoi lahi ke fakamagalo taha laga fitu?

▪ Ko e kehe fefe e tali he patuiki ke he olelalo he hana fekafekau ke he fakaalofa noa mai he tali he olelalo he fekafekau ke he taha fekafekau?

▪ Ko e heigoa ne fakaako mai e tautolu he fakataiaga ha Iesu?