Veveheaga 75

Ko e Punaaga he Fiafia

KO E hana feua fakamatala i Kalilaia, ne taute e Iesu e tau mana, mo e liu a ia taute e tau mena nei i Iutaia. Tuga a nei, ne vega kehe e ia e temoni mai he tagata ne taofi a ia ke nakai vagahau. Ne ofomate e moto tagata, ka ko e falu ne nakai fiafia ne liu fatiaki e totoko taha ia ne huhu i Kalilaia. “Ko Pelesepulo ko e iki he tau temoni kua vega ai e ia e tau temoni,” he talahau e lautolu. Ka ko e falu ne manako ke fakakite e Iesu e tau fakamailoga ko hai a ia, mo e lali a lautolu ke kamatamata a ia he ole ke he taha fakamailoga mai he lagi.

Ne iloa e Iesu ha lautolu a tau manatu, ti foaki e tali taha ia ni ke he hana a tau fakafili i Iutaia ke tuga ne foaki e ia ki a lautolu i Kalilaia. Ne kitia e ia ko e tau kautu oti ne mavehevehe to kaumahala. “Kaeke foki,” he huhu e ia, “kua feveheaki a Satani, to tumau kia fefe hana kautu?” Ne fakakite e ia e tuaga hagahaga kelea he hana a tau fakafili he pehe a ia: “Kaeke foki ko e lima he Atua kua vega ai e au e tau temoni, ti kua hoko mai tuai kia mutolu e kautu he Atua.”

Ko lautolu ne kitia e tau mana ha Iesu kua lata ke talia tuga ni a lautolu he tau senetenari fakamua ne kitia a Mose ne taute e tau mana. Ne ui a lautolu: “Ko e lima he Atua haia.” Ko e “lima he Atua” foki ne tohi e Tau Fakatufono Hogofulu he tau lapa maka. Mo e “lima he Atua”​—ko e hana agaga tapu, po ke malolo gahuahua​—ne maeke ia Iesu ke vega kehe e tau temoni mo e fakamalolo e tau tagata gagao. Ti ko e Kautu he Atua kua hoko mai moli tuai ke he tau tagata fakafili ia, ha ko Iesu, ko e Patuiki he Kautu kua fita e fifili, ne fakalataha ai mo lautolu.

Ne fakakite e Iesu ke he tau fakatai hana a malolo ke vega kehe e tau temoni ko e fakamoliaga he hana malolo ki a Satani, tuga ni e tagata ne mahomo hake e malolo ka hau mo e pule ke he tagata ne katoatoa e puipuiaga ke leveki hana a fale patuiki. Ne liu foki a ia fatiaki e fakataiaga ne talahau e ia i Kalilaia hagaao ke he agaga kelea. Ne toka he agaga e tagata, ka e nakai fakapuke he tagata e pu ia aki e tau mena mitaki, ne liu mai e agaga mo e tokofitu foki, ti mua atu e kelea he tuaga he tagata he magaaho ia ke he magaaho fakamua.

Ha kua fanogonogo ke he tau fakaakoaga nei, ko e taha e fifine he moto tagata ne fakaohooho ke ui fakalahi: “Uhoaki e manava ne fanau mai ai a koe, mo e tau huhu foki ne kai e koe.” Ha ko e manako he tau fifine Iutaia oti ke eke mo matua fifine he perofeta ka e mua atu ke he Mesia, ati maama e kakano ne vagahau pihia e fifine nei. Ko e moli ne manatu a ia kua mua atu e fiafia ha Maria ha ko ia e matua fifine ha Iesu.

Ka e taha e mena, ne mafiti a Iesu ke fakahako e fifine hagaao ke he punaaga moli he fiafia. “Nakai,” he tali e ia, “ka e mua e fiafia he tau tagata ka fanogonogo ke he kupu he Atua mo e omaoma ki ai.” Ne nakai talahau e Iesu ha mena ke he hana matua fifine, ko Maria, ke tuku ki a ia e lilifu pauaki. Ka e fakakite e ia, ko e fiafia moli ka moua he fekafekau fakamoli he Atua, nakai ko e faoa ke he tino po ke tau mena ne kautu ki ai.

Tuga ni he taute e ia i Kalilaia, ne akonaki foki e Iesu e tau tagata i Iutaia he ole ke he taha fakamailoga mai he lagi. Ne tala age e ia ki a lautolu to nakai fai fakamailoga ka foaki ka ko e fakamailoga ni ha Iona. Kua eke a Iona mo fakamailoga ke he hana tolu e aho he manava he ika mo e hana a malolo he fakamatala, ati tokihala ai e tau Nineva. “Kitiala,” he talahau e Iesu, “ha hinai taha kua mua kia Iona.” Ko e pihia ni e patuiki fifine Sihipa ne nava ke he pulotu ha Solomona. “Kitiala,” he talahau foki e Iesu, “ha hinai taha kua mua kia Solomona.”

Ne fakamaama e Iesu ko e tagata ka tugi e lamepa, ne nakai tuku e ia he mena galo po ke i lalo he kumete ka e tuku ki luga he tokaaga lamepa ke kitia he tau tagata e maama. Liga ko e fakamaama e ia ko e fakaako mo e taute mana ki mua he tau tagata ulu uka nei ke he hana a tau tagata fanogonogo kua tatai ni mo e fufu e maama he lamepa. Ko e tau mata he tau tagata pihia ne nakai mitaki, po ke tonu e onoonoaga, ti ko e kakano he hana tau mana kua nakai maama.

Ko e vega la ia e Iesu e temoni mo e taute e tagata kuhukuhu ke vagahau. Kua lata he mena nei ke fakaohooho e tau tagata ne mitaki e tau mata, po ke tonu e onoonoaga, ke fakaheke e lilifu lahi nei mo e fakapuloa e tala mitaki! Ka e taha e mena, ko e tau tagata fakafili nei, ne nakai pihia e mena ne tupu. Ati fakahiku ai e Iesu: “Hanai, a koe, neke pouli kikio e maama ha ia koe. Kaeke foki kua maama hau a tino oti, nakai fai pouli, ati maama oti ai, tuga ne fakamaama mai kia koe e lamepa he hana kikila mai.” Luka 11:14-36; Esoto 8:18, 19; 31:18; Mataio 12:22, 28.

▪ Ko e heigoa e taliaaga he fakamalolo e Iesu e tagata?

▪ Ko e heigoa e “lima he Atua,” ti kua hoko mai tuai fefe e Kautu he Atua ke he tau tagata fanogonogo ha Iesu?

▪ Ko e heigoa e punaaga he fiafia moli?

▪ Maeke fefe he tagata ke mitaki hana mata?