Veveheaga 79

Kua Galo e Motu, ka e Nakai Galo Oti

NAKAI la leva he mole e fakatutala ha Iesu mo lautolu ne fakapotopoto i fafo he fale he Farasaio, ne ha ha i ai falu ne tala age ki a ia “ke he tau tagata Kalilaia, ne fiofio e [kavana Roma ko Ponotio] Pilato ha lautolu a tau toto, mo e tau toto he tau poa ha lautolu.” Liga ko e tau Kalilaia nei ne mamate he magaaho ne afe e tau Iutaia ne totoko ke he puhala ne fakagahua e Pilato e tupe mai he faituga ke talaga aki e hala vai ke tafe mai e vai ki Ierusalema. Ko lautolu ne tala age e mena nei ki a Iesu liga lata ke pehe ko e matematekelea e tau Kalilaia he malaia ia ha ko e ha lautolu ni a tau mahani kelea.

Ka e taha e mena, ne fakatonu e Iesu a lautolu he huhu: “Piko kia a mutolu, kua mua e hala he tau Kalilaia ia ke he tau tagata Kalilaia oti, ha kua mamahi ai a lautolu ke he tau mena pihia? . . . Nakai,” he tali e Iesu. Ko e magaaho ia ne fakaaoga e ia e mena ne tupu ke fakamafana aki e tau Iutaia: “Kaeke ke nakai tokihala a mutolu, ti malaia pihia a mutolu oti ni.”

Ko e fakamatutakiaga, ne liu a Iesu fakamanatu e taha malaia, liga ko e matutakiaga foki ia ni he talagaaga he hala vai. Ne huhu a ia: “Mo e tokohogofulu ma valu, ne to ki luga ia lautolu e kolo i Siloa, ne mamate ai a lautolu; piko kia a mutolu kua mua ha lautolu a tau hala ke he tau tagata oti ne nonofo i Ierusalema?” Nakai, ai ko e tau mahani kelea he tau tagata nei ati mamate ai a lautolu, he talahau e Iesu. Ko e kakano, “ko e vaha mo e tau mena ke tutupu ai” ati tutupu ai e tau malaia pihia. Ka e taha e mena, ko Iesu, ne fakaaoga foki e mena nei ke poaki: “Kaeke ke nakai tokihala a mutolu, ti malaia pihia a mutolu oti ni.”

Ne matutaki a Iesu ke talahau e fakatai kua lata tonu, he fakamaama: “Ha he taha tagata e mati, ne to ke he hana ulu vine ne fano a ia ke kumi ai e tau fua, ka e nakai moua. Ati tala age ai a ia ke he gahua vine, Kitiala, ko e mena hau au ke he tolu a tau ia, ke kumi [falu] fua ke he mati nai, ka e nakai moua e au, ati hio a ia ki lalo; ko heigoa foki e mena kua fakalavelave ai e ia e kaina? Ka e tala age a ia, kua pehe age kia ia, Ko e Iki na e, toka ai a ke he tau nai foki, ato keli takai e au, mo e age e tau mena ke tanu aki. Kaeke foki ke fua mai, ti mitaki; kaeke kua nakai, ka mole ia, ati hio a e koe ki lalo.”

Ne lali a Iesu ke molea e tolu e tau ke feaki e tua ke he motu Iutaia. Ka e fiha ne teau he tau tutaki ne maeke ke totou mai he fua he hana tau gahua. Ka ko e magaho nei, ke he tau ke fa aki he hana feua fakamatala, kua fakalahi ki mua hana malolo, ko e fakatai ke keli mo e tanu viko aki e tau mena fakatalumelie e mati Iutaia ha ko e fakamatala mo e fakaako fakamakutu i Iutaia mo Perea. Ka e nakai kautu! Ne nakai talia e motu ke tokihala mo e kua fakatali ke he moumouaga. Ko e tokogahoa ni he motu ne talia.

Nakai la leva e mole he fakaako a Iesu he sunako ke he Sapati. Ke he mena ia ne kitia e ia e fifine, ha kua fakakelea he temoni a ia, ti fakatolotolo a ia ke he 18 e tau tau. He fakaalofa hofihofi noa, ti pehe a Iesu ki a ia: “Teme na e, kua vevete tuai hau a lolelole.” Ko e magaaho ia ne fakalago e ia hana tau lima ki a ia, ti hako agataha a ia mo e kamata ke fakaheke ke he Atua.

Ka ko ia ne pule ke he sunako kua ita. “Ne ono e aho ke lata he gahua ai,” he totoko atu e ia. “Ko e tau aho ia ke o mai ai a mutolu ke fakamalolo ai, ka e toka ni e sapati.” Ne mailoga he pule e malolo ha Iesu ke fakamalolo ka e vale ke he tau tagata he o mai ke fakamaulu he Sapati!

“Ko e fakavai na e,” he tali e Iesu, “ka e nakai kia kua takitokotaha a mutolu mo e vevete ke he sapati hana povi po ke asini ke he fale povi, mo e takitaki ke fakainu? Ka ko e fifine nai, ko e tama fifine a Aperahamo, kua lili tuai e Satani, kitiala, ko e hana tau tau ia kua hogofulu ma valu; ka e nakai kia lata ke vetevete e liliaga nai kia ia ke he sapati?”

Ko e magaaho ne logona e mena nei, ko lautolu ne totoko a Iesu, kua kamata ke logona e ma. Ko e moto tagata, kua fiafia ke he tau fakahekeaga oti ne kitia e lautolu ne taute e Iesu. Ko e tali ha Iesu, ne fatiaki ua e ia e tau fakatai fakaperofeta hagaao ke he Kautu he Atua, ko e tau fakatai ne talahau e ia he foulua he Tahi Kalilaia he tau fakamua. Luka 13:​1-21; Fakamatalaaga 9:11; Mataio 13:​31-33.

▪ Ko e heigoa e tau malaia ne tokutoku he mena nei, mo e ko e heigoa e fakaakoaga ne moua mai e Iesu ia lautolu?

▪ Ko e heigoa e kakano hagaao ke he mati ne nakai fai fua, fakalataha mo e laliaga ke taute ke fua?

▪ Mailoga fefe he pule he sunako e malolo ha Iesu ke fakamalolo, ka e taha e mena, ko e fakakite fefe e Iesu e fakatupua he tagata?