Veveheaga 125

Mamahi Lahi ki Luga he Akau

HA HA i ai tokoua e tagata fofo mena ne takitaki atu fakalataha mo Iesu ke kelipopo. Nakai mamao mo e loto maaga, ne tutu a lautolu he matakavi ne higoa ko Kolokota, po ke Tokaaga Ulupoko.

Ne akiaki e tau tapulu he tau pagota. Ati tamai e uaina ne fiofio aki e muro. Ko e mena taute ni he tau fifine Ierusalema, ti talia he tau Roma e vai fakaligo mamahi nei ki a lautolu kua fakatautau. Ka e taha e mena, ko e magaaho ne kamata e Iesu, ne nakai talia e ia ke inu. Ko e ha? Ko e manako ni a ia ke katoatoa hana a manamanatuaga ke he magaaho nei ne lahi e kamatamata ke he hana a tua.

Kua tuku a Iesu mogonei ke he akau mo e tau lima hana kua fakalago i luga he hana ulu. Ne pao he tau kautau e tau fao lalahi ke he tau lima hana mo e hana tau hui foki. Ne tutu a ia he mamahi he tau fao ne pao hifo he maga kakano mo e tau hokohoko hana. Ko e magaaho ne toko hake e akau, ne mua atu e uhu lahi, ha ko e mamafa he tino ne au atu e mahehe he tau motumotu ne pao aki e tau fao. Ka e, he nakai matakutaku, kua liogi a Iesu ma e tau kautau Roma: “Ma Matua na e, kia fakamagalo atu e koe a lautolu; ha kua nakai iloa e lautolu e mena kua eke e lautolu.”

Ne tuku e Pilato e fakamailoga ki luga he akau ne totou pehe: “Ko Iesu, ko e Nasareta, ko e Patuiki he Tau Tagata Iutaia.” Ko e moli, ne tohi e ia e mena nei nakai ni ha ko e hana a fakalilifu ki a Iesu, ka ko e hana vihiatia foki he tau ekepoa Iutaia he fakaohooho e lautolu a ia ke age e fakahala mate ki a Iesu. Ke maeke oti ke totou e fakamailoga, ne tohi e Pilato ke he tolu e vagahau​—ke he faka-Heperu, faka-Latini pauaki, mo e faka-Heleni he tau tagata oti.

Ko e tau ekepoa ne mua, fakalataha mo Kaiafa mo Ana, ne matakutaku. Ko e fakailoaaga mitaki nei kua fakakelea aki ha lautolu a magaaho kautu. Ko e mena haia ne totoko a lautolu: “Ua tohi e koe, Ko e Patuiki he tau tagata Iutaia; ka kia pehe, Kua tala mai a ia, ko au ko e Patuiki he tau tagata Iutaia.” Ne ita lahi ha kua fakaaoga he tau ekepoa a ia, ne tali a Pilato mo e vihiatia lahi: “Ko e mena ne tohi e au, kua tohi tuai e au ni.”

Ko e tau ekepoa, fakalataha mo e moto tagata, ne fakapotopoto ke he matakavi he kelipopoaga, ti totoko he tau ekepoa e moli he fakamailoga. Ne fatiaki e lautolu e fakamoliaga pikopiko ne talahau fakamua ke he Saneheturini. Ti ko e mena ia ne nakai ofo ai, ha kua vagahau kelea a lautolu ne o age, luelue ha lautolu a tau ulu he amuamu mo e pehe: “Ko koe na, ne ulu e faituga, mo e eke foki ke he tolu e aho, ati fakamoui a e koe a koe. Kaeke ko e tama he Atua a koe, ati hifo mai a he akau fakakikiveka.”

“Ne fakamomoui e ia e [falu] tagata, ka e nakai maeke ia ia ke fakamoui a ia,” he talahau auloa he tau ekepoa ne mua mo e ha lautolu a tau kapitiga fakalotu. “Kaeke ko e Patuiki a Isaraela a ia, ati hifo mai a he akau fakakikiveka mogoho nai, ti talia ai e tautolu a ia. Ne tua a ia ke he Atua, kia laveaki mai a e Ia a ia mogoho nai, kaeke ke finagalo mai a Ia kia ia; ha kua pehe mai a ia, Ko au ko e Tama he Atua.”

Ne moua foki he aga ia, kua fefeua foki he tau kautau a Iesu. Ne age fakaneinei e lautolu e vineta ki a ia, he tuku fakafiufiu ka e nakai hoko ke he tau laugutu magomago hana. “Kaeke ko e patuiki he tau tagata Iutaia a koe,” he fakafiufiu e lautolu, “ati fakamoui a e koe a koe.” Kua pihia foki e tau tagata fofo mena​—ko ia ne fakatautau he fahi matau ha Iesu, mo ia he fahi hema​—ne fefeua ki a ia. Manamanatu la ke he mena ia! Ko e tagata mua ue atu ne moui tali mai i tuai, e, ko ia ne gahua fakalataha mo Iehova ko e Atua he tufuga e tau mena oti kana, ne lahi mahaki e mamahi he tau eke fakakelea nei!

Ne uta he tau kautau e tau tapulu ha Iesu ti vevehe fa. Ne vili e lautolu po ko hai ka eke mana. Ka e taha e mena ko e tapulu loto ne nakai fai filiga, ha ko e mua ue atu he mitaki. Ti fevagavagahauaki e tau kautau: “Aua neke hēhē ai e tautolu, ka e vili e tautolu, po ko hai ka eke māna.” Ti ko e mena haia ne taute mo e nakai iloa, kua fakamoli e lautolu e kupu tohi ne pehe: “Kua tufatufa e lautolu haku a tau tapulu ma lautolu, ti kua eke e lautolu e vili ke he haku a tapulu tino.”

Ne fai magaaho, ti taha mai he tau tagata fofo mena ne loto fakaaue ko Iesu ko e patuiki moli. Ti ko e mena haia, ne hataki e ia hana kapitiga, mo e pehe a ia: “Nakai kia matakutaku a koe ke he Atua, ha kua fakahala fakalataha a tautolu? Ti kua tonu ni ha taua a fakahala; ha ko e mena kua taui mai a taua ke lata mo e tau mena ne eke e taua; ka ko ia nai, nakai fai mena hepehepe ne eke e ia.” Ati vagahau a ia ki a Iesu, mo e olelalo: “Kia manatu mai a a koe kia au ka haele mai a koe ke he hau a kautu.”

“Kua moli he tala atu e au ki a koe he aho nei,” he tali e Iesu, “To fakalataha a koe mo au i Parataiso.” To fakamoli e maveheaga nei he magaaho ka pule a Iesu ko e Patuiki he lagi mo e fakaliu tu mai e tagata kelea nei ne kua tokihala ke he moui he lalolagi he Parataiso, ka leveki e lautolu ka hao mai i Amaketo fakalataha mo e ha lautolu a tau kapitiga. Mataio 27:​33-44; Mareko 15:​22-32; Luka 23:​27, 32-43; Ioane 19:​17-24.

▪ Ko e ha a Iesu ne nakai talia ke inu e uaina ne fiofio aki e muro?

▪ Ko e ha, ne tuku e fakamailoga he akau ha Iesu, mo e ko e heigoa e fakatutalaaga ne laga mai ai ki a Pilato mo e tau ekepoa ne mua?

▪ Ko e heigoa foki e tau eke fakakelea ne taute ki a Iesu i luga he akau, mo e ko e heigoa moli ne fakalagalaga aki?

▪ Fakamoli fefe e perofetaaga ke he tau mena ne taute ke he tau tapulu ha Iesu?

▪ Ko e heigoa e hikiaga ne taute he taha mai he tau tagata fofo mena, mo e to fakamoli fefe e Iesu e ole hana?